ថ្នាក់ដឹកនាំក្លិបបាល់ទាត់សោកស្តាយចំពោះការបាត់បង់ស្ថាបត្យករពហុកីឡដ្ឋានជាតិ

កីឡាជាតិ

ជាតិ

ថ្នាក់ដឹកនាំក្លិបបាល់ទាត់សោកស្តាយចំពោះការបាត់បង់ស្ថាបត្យករពហុកីឡដ្ឋានជាតិ

29, Sep 2017 , 5:19 pm

រូបភាព

ព្រឹទ្ធាចារ្យ វណ្ណ ម៉ូលីវណ្ណ ថតអនុស្សាវរីយ៍នៅពហុកីឡដ្ឋានជាតិ។ រូបថតហ្វេសប៊ុក

ដោយ:

មរណភាពរបស់ព្រឹទ្ធាចារ្យ វណ្ណ ម៉ូលីវណ្ណ ដែលជាកំពូលស្ថាបត្យកម្មដ៏ល្បីល្បាញនៅកម្ពុជា បានធ្វើឲ្យថ្នាក់ដឹកនាំកីឡា គណៈកម្មការប្រកួតបាល់ទាត់ជាតិកម្ពុជា (CNCC) រួមទាំងក្លិបបាល់ទាត់មួយចំនួននៅកម្ពុជាបង្ហាញនូវការសោកស្តាយ។ ថ្នាក់ដឹកនាំកីឡាទាំងនោះបានចាត់ទុកមរណភាពនេះថាជាការបាត់បង់ស្ថាបត្យករ និងធនធានមួយដ៏សំខាន់សម្រាប់កម្ពុជា។

ក្លិបបាល់ទាត់ចម្ការកៅស៊ូបឹងកេតបានផ្ញើសាររំលែកទុក្ខ និងសម្តែងការសោកស្តាយយ៉ាងខ្លាំងចំពោះមរណភាពរបស់ព្រឹទ្ធាចារ្យ វណ្ណ ម៉ូលីវណ្ណ ដែលជាកំពូលស្ថាបត្យកម្មមួយរូបរបស់កម្ពុជា។ ក្លិបនេះបានចាត់ទុកមរណភាពនេះថា ជាការបាត់បង់ធនធានស្ថាបត្យករដ៏ចំណានមួយរូបរបស់ខ្មែរ។

«លោក វណ្ណ ម៉ូលីវណ្ណ ជាបុគ្គលមានភាពល្បីល្បាញនៅក្នុងសង្គមស្ថាបត្យកម្មថ្មីរបស់ខ្មែរ ដែលមានការរីកចំរើនខ្លាំងនៅក្នុងទសវត្សឆ្នាំ១៩៥០ និងឆ្នាំ១៩៦០ លោកបានបន្សល់ទុកស្នាដៃជាច្រើនសម្រាប់ជាតិរួមមាន ពហុកីឡដ្ឋានជាតិ វិមានឯករាជ្យ សាលសន្និសីទចតុមុខ និងអាគារសំខាន់ៗផ្សេងៗជាច្រើនទៀត»។ នេះជាសាររបស់ក្លិបបឹងកេតដែលលើកសរសើរព្រឹទ្ធាចារ្យ វណ្ណ ម៉ូលីវណ្ណ និងស្នាដៃរបស់លោក។

តាមរយៈសាររំលែកទុក្ខរបស់ក្លិបព្រះខ័នរាជស្វាយរៀង និងក្លិបក្រសួងការពារជាតិ ថ្នាក់ដឹកនាំ គ្រូបង្វឹក និងកីឡាកររួមជាមួយមន្ត្រីទាំងអស់មានការរន្ធត់ចិត្តយ៉ាងខ្លាំងពេលបានលឺដំណឹងដ៏ក្រៀមក្រំនៃមរណភាពរបស់ព្រឹទ្ធាចារ្យ វណ្ណ ម៉ូលីវណ្ណ ដែលជាបិតាស្ថាបនិកកម្ពុជា។

សូមរម្លឹកថា លោកព្រឹទ្ធាចារ្យ វណ្ណ ម៉ូលីវណ្ណ បានទទួលមរណភាពក្នុងជន្មាយុ៩១ឆ្នាំនាវេលាម៉ោង៩ និង៤៥នាទីព្រឹកថ្ងៃទី២៨ ខែកញ្ញា ឆ្នាំ២0១៧។ សពរបស់ស្ថាបត្យករខ្មែរដ៏ល្បីល្បាញរូបនេះកំពុងប្រារព្ធធ្វើបុណ្យនៅគេហដ្ឋានរបស់លោកព្រឹទ្ធាចារ្យ វណ្ណ ម៉ូលីវណ្ណ ស្ថិតក្នុងភូមិមណ្ឌល ៣ សង្កាត់ស្លក្រាម ក្រុងសៀមរាប ខេត្តសៀមរាប។ ហើយសពរបស់លោកនឹងដង្ហែទៅបូជានារសៀលថ្ងៃអាទិត្យ ទី០១ ខែតុលា នៅក្នុងវត្តឥន្ទ្រកោសី ស្ថិតនៅក្នុងភូមិទ្រាំង ឃុំស្លក្រាម ខេត្តសៀមរាប៕