ជាតិ
នយោបាយជាតិ
សម្ដេច ហ៊ុន សែន បន្តរិះគន់អាមេរិក ខណៈអាមេរិករក្សាភាពស្ងប់ស្ងាត់វិញ
×
ភ្នំពេញ៖ រហូតមកដល់ពេលនេះសម្ដេចនាយករដ្ឋមន្ត្រី ហ៊ុន សែន នៅតែបន្តរិះគន់រដ្ឋាភិបាលអាមេរិក ពាក់ព័ន្ធនឹងបញ្ហានៅក្នុងប្រទេសកម្ពុជា ខណៈអាមេរិកថមថយសម្ដីតបតជាមួយរដ្ឋាភិបាល។
បើទោះជាអាមេរិក បានថមថយពាក្យសម្ដីចេញមុខតវ៉ា ជាមួយរដ្ឋាភិបាលកម្ពុជាហើយក្តី ប៉ុន្តែសម្ដេច ហ៊ុន សែន ហាក់មិនទាន់បញ្ឈប់សម្តីរិះគន់ទៅលើអាមេរិកឡើយ។ បន្ទាប់ពីចោទរដ្ឋាភិបាលអាមេរិក នៅពីក្រោយខ្នងប្រធានគណបក្សសង្គ្រោះជាតិ ឯកឧត្តម កឹម សុខា ដែលរដ្ឋាភិបាលកម្ពុជា ហៅថា អំពើក្បតជាតិ ក្នុងគោលបំណងចង់ផ្ដួលរំលំ និងបង្កអសន្តិសុខក្នុងប្រទេសនោះ នាយករដ្ឋមន្ត្រី ក៏បន្តរិះគន់អាមេរិកដដែល លើបញ្ហាទម្លាក់គ្រាប់បែកក្នុងប្រទេសកម្ពុជា ។
ប្រមុខរដ្ឋាភិបាល បានថ្លែងបែបចំអកឲ្យអគ្គរដ្ឋទូតអាមេរិកប្រចាំកម្ពុជា ទៅពិនិត្យមើលគ្រាប់បែកគីមី ដែលរដ្ឋាភិបាល បានរកឃើញនៅក្នុងទឹកដីខេត្តស្វាយរៀង និងស្នើឲ្យរកដំណោះស្រាយយកគ្រាប់បែកគីមីនេះចេញពីប្រទេសកម្ពុជាផង ដោយកុំចេះតែទារប្រាក់បំណុលពីកម្ពុជា។ ថ្លែងបែបនេះហើយ នាយករដ្ឋមន្ត្រី ក៏រិះគន់ទៀតថា អាមេរិកមិនដែលអើពើនឹងការស្នើសុំរបស់រដ្ឋាភិបាល ឲ្យជួយសម្អាតនិងប្រមូលយកគ្រាប់បែកគីមីកប់ក្នុងដីទាំងនេះចេញឡើយ។
ថ្លែងក្នុងពិធីប្រគល់សញ្ញាបត្រដល់និស្សិត កាលពីថ្ងៃទី២៨ កញ្ញា សម្ដេច ហ៊ុន សែន និយាយបែបផ្លែផ្កាឲ្យអាមេរិកយ៉ាងដូច្នេះថា៖«ឥឡូវ គ្រាប់បែកគីមីនេះ វានៅខេត្តស្វាយរៀងរបស់យើង អញ្ចឹងដើម្បីយកវាចេញត្រូវជម្លៀសប្រជាជនប៉ុន្មានពាន់នាក់ ប៉ុន្មានពាន់គ្រួសារនោះ បើទោះបីយ៉ាងម៉េចក៏ដោយ នេះជាបញ្ហារបស់យើង។ ខ្ញុំបាននិយាយថា សុំឲ្យអាមេរិកមកយក ប៉ុន្តែចាំទៅ ដេកទាល់តែថ្ងៃងាប់ទៀត ក៏មិនទាន់អាមេរិក មកយកដែរគ្រាប់[បែក]ហ្នឹងនោះ អញ្ចឹងទេសុវត្ថិភាពខ្លួនឯង យើងត្រូវដោះស្រាយបញ្ហានេះ តាមរយៈគណៈកម្មការជាតិ អាវុធគីមីរបស់យើង»។
ក្រៅពីលើកឡើងនូវចំណុចទាំងនេះ សម្ដេច បានរំឮកពីការជ្រៀតជ្រែកកិច្ចការផ្ទៃក្នុងកម្ពុជា ពីសំណាក់បរទេសថា ការលូកដៃពីប្រទេសខាងក្រៅនេះ បានធ្វើឲ្យប្រទេសកម្ពុជាជួបប្រទះនៅបញ្ហាឥតឈប់ឈរ។ ត្រង់ចំណុចនេះ ប្រមុខរដ្ឋាភិបាល បានអំពាវនាវឲ្យប្រជាពលរដ្ឋទាំងអស់ ប្រកាន់យកគោលនយោបាយជាតិនិយម ដើម្បីប្រឆាំងនឹងការជ្រៀតជ្រែករបស់បរទេសផងដែរ។
តែយ៉ាងណាការរិះគន់របស់រដ្ឋាភិបាលកម្ពុជា មកលើអាមេរិកជាបន្តបន្ទាប់នេះ មិនមានការប្រតិកម្មតបតពីសំណាក់ទូតអាមេរិកប្រចាំកម្ពុជាឡើយ។ ទូតអាមេរិក ហាក់ដូចជាថមថយសម្តីខ្លួននិងរក្សាភាពស្ងប់ស្ងាត់វិញ បន្ទាប់ពីចេញសារចុងក្រោយ ដែលបានប្រាប់ឲ្យប្រជាជនអាមេរិក កំពុងរស់នៅប្រទេសកម្ពុជា បង្កើនការប្រុងប្រយ័ត្ននៅពេលធ្វើដំណើរទៅណាមកណា ដោយសារតែអាចមានភាពចលាចលកើតឡើងជាយថាហេតុ នៅពេលណាមួយដែលមិនបានដឹងមុន ។ ដោយសារតែសារនយោបាយបែបនេះហើយ ទើបធ្វើឲ្យសម្ដេចនាយករដ្ឋមន្ត្រី ហ៊ុន សែន មានការមិនពេញចិត្ត និងរិះគន់អាមេរិកម្ដងហើយម្ដងទៀតបែបនេះ។
សម្រាប់អ្នកវិភាគវិញ សម្ដីប្រមុខរដ្ឋាភិបាលរិះគន់អាមេរិកនេះ វាមិនមែនជារឿងដែលខុសឆ្គងនោះទេ ខណៈកម្ពុជា គឺជាប្រទេសមានឯករាជ្យ និងអធិបតេយ្យភាពពេញលេញ។ ប៉ុន្តែអ្នកវិភាគ ឲ្យយោបល់ថា រដ្ឋាភិបាល គួតែរកដំណោះស្រាយជាមួយអាមេរិកឲ្យបានត្រឹមត្រូវដែរ ពោលគឺកុំទាន់អាលឈ្លោះជាមួយ
ប្រទេសមហាអំណាច ដរាបណាកម្ពុជា មិនទាន់អាចពឹងពាក់ខ្លួនបាន៕
© រក្សាសិទ្ធិដោយ thmeythmey.com