អង្គការជាតិ-អន្តរជាតិ មួយចំនួន ត្រូវបានបិទនិងផ្អាកសកម្មភាពជាបន្តបន្ទាប់

ជាតិ

នយោបាយជាតិ

អង្គការជាតិ-អន្តរជាតិ មួយចំនួន ត្រូវបានបិទនិងផ្អាកសកម្មភាពជាបន្តបន្ទាប់

30, Sep 2017 , 9:58 am

រូបភាព

ដោយ: ម៉ៅ សុផា

ភ្នំពេញ៖ ក្នុងរយៈកាលចុងក្រោយនេះ យ៉ាងហោច មានអង្គការជាតិ-អន្តរជាតិចំនួនបី ត្រូវបានបិទនិងផ្អាកសកម្មភាព។ អង្គការសមធម៌កម្ពុជា ត្រូវបានផ្អាកសកម្មភាពជាបណ្តោះអាសន្ន ហើយអង្គការមាតាធម្មជាតិ ត្រូវបានបិទចោលតែម្តង។ រីឯ វិទ្យាស្ថានជាតិប្រជាធិបតេយ្យរបស់អាមេរិក ត្រូវបានបិទចោលដូចគ្នា។ ក្រៅពីអង្គការ ស្ថាប័នសារព័ត៌មួយចំនួន ក៏បានរងវិធានការក្តៅពីរដ្ឋាភិបាលដែរ។

ចុងខែកញ្ញា ឆ្នាំ២0១៧នេះ ក្រសួងមហាផ្ទៃ បានសម្រេចផ្អាកសកម្មភាពរបស់អង្គការសមធម៌កម្ពុជា ជាបណ្តោះអាសន្ន។ ការផ្អាកនេះ ធ្វើឡើងតាមរយៈសេចក្តីជូនដំណឹងមួយ ដែលក្រសួងមហាផ្ទៃ បានផ្ញើទៅកាន់អង្គការសមធម៌កម្ពុជា។

ក្រសួងមហាផ្ទៃលើកហេតុផលក្នុងលិខិតនោះថា អង្គការសមធម៌ បានធ្វើសកម្មភាពផ្ទុយទៅនឹងលក្ខន្តិករបស់ខ្លួន និងខុសទៅនឹងបទបញ្ញត្តិ ដែលមានចែងក្នុងច្បាប់ស្តីពីសមាគមនិងអង្គការមិនមែនរដ្ឋាភិបាល។ យ៉ាងណា ការផ្អាកនេះ គឺមានរយៈពេលយ៉ាងយូរ តែ៣០ថ្ងៃប៉ុណ្ណោះ អាចនឹងត្រូវបានអនុញ្ញាតឲ្យធ្វើសកម្មភាពឡើងវិញ ប្រសិនបើអង្គការសមធម៌កម្ពុជា បំពេញកាតព្វកិច្ច ឲ្យបានត្រឹមត្រូវ តាមការទាមទាររបស់ក្រសួងមហាផ្ទៃ។

អង្គការសមធម៌កម្ពុជា ត្រូវផ្តល់ឲ្យក្រសួងមហាផ្ទៃ នូវឯកសារមួយចំនួន ដែលរួមមាន គណនីសម្រាប់ប្រតិបត្តិ របាយការណ៍ហិរញ្ញវត្ថុ របាយការណ៍បូកសរុបការងារ និងរបាយការណ៍ស្តីពីជម្លោះរវាងអង្គការរបស់ខ្លួន ជាមួយក្រុមហ៊ុន ភ្នំពេញស៊ូហ្គើ (Phnom Penh Suger)។ ទាំងនេះ គឺជាការទាមទាររបស់ក្រសួងមហាផ្ទៃ ដោយបានព្រមានយ៉ាងដូច្នេះថា៖«ក្នុងករណីមិនអនុវត្តតាមការជូនដំណឹងនេះ ក្រសួងមហាផ្ទៃ នឹងចាត់វិធានការតាមផ្លូវច្បាប់»។

មុនអង្គការសមធម៌កម្ពុជា ត្រូវបានផ្អាកសកម្មភាព ក្រសួងមហាផ្ទៃ បានប្រកាបិទអង្គការមួយរួចទៅហើយ នោះគឺអង្គការមាតាធម្មជាតិ។ ប៉ុន្តែសេចក្តីសម្រេចរបស់ក្រសួងមហាផ្ទៃ ពុំបានបញ្ជាក់ពីហេតុផលអំពីការបិទអង្គការមាតាធម្មជាតិនោះទេ។

អង្គការមាតាធម្មតាជាតិ កាលពីមិនទាន់ត្រូវបានបិទ ហាក់សកម្មយ៉ាងខ្លាំងក្នុងកិច្ចការងារដែលពាក់ព័ន្ធនឹងព្រៃឈើ ជាពិសេសនៅក្នុងតំបន់អារ៉ែង។ ហើយរយៈកាលចុងក្រោយនេះ អង្គការមាតាធម្មជាតិ បានចេញប្រតិកម្មយ៉ាងខ្លាំងចំពោះការនាំខ្សាច់កម្ពុជា ចេញទៅក្រៅប្រទេស។

មិនមែនតែអង្គការជាតិនោះទេ អង្គការអន្តរជាតិ ដែលមានសកម្មភាពនៅកម្ពុជា ក៏ត្រូវបានបិទចោលដែរ។ កាលពីអំឡុងខែសីហា ឆ្នាំ២0១៧ វិទ្យាស្ថានជាតិប្រជាធិបតេយ្យ NDI របស់សហរដ្ឋអាមេរិក ដែលមានវត្តមាននៅកម្ពុជាតាំងពីឆ្នាំ១៩៩៣មកនោះ ត្រូវបានរដ្ឋាភិបាល ប្រកាសបិទចោល។ ការធ្វើខុសច្បាប់ស្តីពីសារពើពន្ធនិងច្បាប់ស្តីពីសមាគម គឺជាហេតុផល ដែលរដ្ឋាភិបាល សម្រេចបិទអង្គការនេះចោល។

ក្រៅពីក្រុមអង្គការខាងលើ ស្ថាប័នសារព័ត៌មានខ្លះ ក៏រងវិធានការក្តៅពីសំណាក់រដ្ឋាភិបាលផងដែរ។ កាសែត ខេមបូឌា ដេលី ត្រូវបានអគ្គនាយកដ្ឋានពន្ធដារនៃក្រសួងសេដ្ឋកិច្ច ទាមទារឲ្យបង់ពន្ធជាង៦លានដុល្លារ ចូលរដ្ឋ។ ក្រោយមក កាសែត ដែលមានអាយុកាលជាង២0ឆ្នាំនៅកម្ពុជាមួយនេះ ក៏សម្រេចបិទការិយាល័យនិងការផ្សព្វផ្សាយព័ត៌មាន ដោយខ្លួនឯង។

រីឯ វិទ្យុអាស៊ីសេរី បានសម្រេចបិទការិយាល័យរបស់ខ្លួន នៅក្នុងរាជធានីភ្នំពេញមួយរយៈ។ ការបិទការិយាល័យមួយរយៈនេះ គឺបន្ទាប់ពីមានបញ្ហាផ្លូវច្បាប់ជាមួយនឹងក្រសួងព័ត៌មាន។ សម្រាប់ក្រសួងព័ត៌មាន វិទ្យុអាស៊ីសេរី បានដាក់ការិយាល័យរបស់ខ្លួន ដោយមិនបានចុះបញ្ជីត្រឹមត្រូវ។ ប៉ុន្តែ វិទ្យុអាស៊ីសេរី អះអាងតាមរយៈសេចក្តីថ្លែងការណ៍ថា ការបិទការិយាល័យរបស់ខ្លួនមួយរយៈ គឺដោយសារតែមានការបង្ក្រាបពីសំណាក់រដ្ឋាភិបាល។

ដោយឡែក វិទ្យុពីរទៀត គឺ VOA និង VOD ក៏ត្រូវបានបញ្ឈប់ការផ្សាយបន្ត នៅតាមវិទ្យុនានា ផងដែរ៕