កីឡាជាតិ
ជាតិ
គ្រូបង្វឹកវេស្ទើនភ្នំពេញរងពិន័យ១ប្រកួត ដោយសារប្រើសម្តីមិនល្អដាក់អាជ្ញាកណ្តាល
×
គ្រូបង្វឹកក្រុមវេស្ទើនភ្នំពេញលោក ស៊ុំ វណ្ណា ត្រូវគណៈកម្មការវិន័យរបស់សហព័ន្ធកីឡាបាល់ទាត់កម្ពុជា(FFC)ដាក់ពិន័យមិនឲ្យដឹកនាំក្រុមចូលរួមមួយប្រកួតក្នុងពានរង្វាន់ក្របខណ្ឌមិត្តហ្វូនខេមបូឌានលីកឆ្នាំ២០១៧ និងពិន័យជាប្រាក់ចំនួន៣០ម៉ឺនរៀល ក្រោយលោកប្រើប្រាស់ពាក្យសម្តីមិនសមរម្យដាក់មន្ត្រីអាជ្ញាកណ្តាល។ លោក ស៊ុំ វណ្ណា មានសិទ្ធប្តឹងទៅគណៈកម្មការឧទ្ធរណ៍បើមិនពេញចិត្តចំពោះការពិន័យនេះ បើពុំនោះទេ ការសម្រេចនេះនឹងចូលជាធរមាន។
យោងតាមសេចក្តីសម្រេចរបស់គណៈកម្មការវិន័យរបស់ FFC កាលពីថ្ងៃទី២៩ ខែកញ្ញា លោក ស៊ុំ វណ្ណា គ្រូបង្វឹកក្រុមវេស្ទើនភ្នំពេញរងពិន័យមិនអនុញ្ញាត ឲ្យចូលរួមពានរង្វាន់ក្របខណ្ឌលីកកំពូលកម្ពុជាចំនួន១ប្រកួត និងទឹកប្រាក់៣០ម៉ឺនរៀលក្រោមបទចោទជេរប្រមាទ និងគំរាមកំហែងមន្ត្រីអាជ្ញាកណ្តាល។ ការចោទប្រកាន់នេះកើតឡើងក្នុងជំនួបក្រុមវេស្ទើនភ្នំពេញ ប្រកួតចាញ់ក្រុមអគ្គស្នងការនគរបាលជាតិ ៣-២ ក្នុងពានរង្វាន់ក្របខណ្ឌលីកកំពូលនៅកីឡដ្ឋានស្តាតចាស់កាលពីថ្ងៃទី១៧ ខែកញ្ញា។
មាត្រា ៥៩ បទគំរាមកំហែង នៃក្រមសីលធម៌និងវិន័យរបស់សហព័ន្ធកីឡាបាល់ទាត់កម្ពុជាបានចែងថា ជនណាដែលបំភ័យមន្ត្រីនៃការប្រកួតដោយការគំរាមកំហែងខ្លាំងក្លា នឹងទទួលទណ្ឌកម្មដោយរងការព្យួរ១ប្រកួត និងពិន័យជាប្រាក់យ៉ាងហោចណាស់ចំនួន៣០ម៉ឺនរៀល។
សេចក្តីសម្រេចដែលចុះហត្ថលេខាដោយលោក អេង ពៅទិត្យ ប្រធានគណៈកម្មការវិន័យបានបញ្ជាក់ថា លោក ស៊ុំ វណ្ណា មានសិទ្ធប្តឹងទៅកាន់គណៈកម្មការឧទ្ធរណ៍ក្នុងរយៈពេល៥ថ្ងៃក្រោយចេញសេចក្តីសម្រេច បើមិនពេញចិត្តចំពោះការចោទប្រកាន់នេះ។ តែបើមិនមានការប្តឹងនោះទេ ការសម្រេចនេះនឹងចូលធរមានតែម្តង៕
Tag:
បាល់ទាត់
ស៊ុំ វណ្ណា
FFC
© រក្សាសិទ្ធិដោយ thmeythmey.com