ជាតិ
ព្រឹទ្ធាចារ្យ វណ្ណ ម៉ូលីវណ្ណ ៖«រៀន និងស្រាវជ្រាវមិនចេះចប់ទេ»
×
ភ្នំពេញ៖ ស្ថាបត្យករ វណ្ណ ម៉ូលីវណ្ណ កើតនៅឆ្នាំ១៩២៦ នៅក្នុងខេត្តកំពត ។ លោក គឺជាសិស្សទី១ដែលបានប្រឡងជាប់បាក់ឌុបនៅវិទ្យាល័យស៊ីសុវត្ថិនៅឆ្នាំ១៩៤៤ ។ នៅឆ្នាំ១៩៤៧-១៩៥៦ លោកបានទៅសិក្សាផ្នែកស្ថាបត្យកម្មនៅទីក្រុងប៉ារីស ប្រទេសបារាំង។ ព្រឹទ្ធាចារ្យ វណ្ណ ម៉ូលីវណ្ណ បានទទួលមរណភាពក្នុងអាយុ៩១ឆ្នាំ កាលពីថ្ងៃទី២៨ ខែកញ្ញា នៅខេត្តសៀមរាប។
បើទោះបីជាលោក វណ្ណ ម៉ូលីវណ្ណ មានវ័យចំណាស់ក៏លោកនៅតែស្រឡាញ់សៀវភៅដដែល។ នៅក្នុងគេហដ្ឋានរបស់លោកនៅក្នុងខេត្តសៀមរាប គេសង្កេតឃើញសៀវភៅជាច្រើនក្បាលដែលភាគច្រើននិយាយពីស្ថាបត្យកម្ម ហើយជាពិសេស គឺជាសៀវភៅដែលលោកសរសេរ ឬសៀវភៅដែលអ្នកនិពន្ធផ្សេងសរសេរពីស្នាដៃស្ថាបត្យកម្មរបស់លោក។
លោក វណ្ណ ម៉ូលីវណ្ណ គឺជាស្ថាបត្យករឯករបស់ខ្មែរដែលទទួលបានភាពល្បីល្បាញនៅលើពិភពលោក។ លោកត្រូវបានគេចាត់ទុកថា ជាបុគ្គលស្មោះត្រង់ ហ្មត់ចត់ និងចេះតស៊ូក្នុងជីវិតគួរអោយកត់កោតសរសើរ។ កើតក្នុងត្រកូលក្រីក្រ តែលោក វណ្ណ តស៊ូព្យាយាមសិក្សារហូតទទួលបានអាហារូបករណ៍ទៅសិក្សារនៅក្នុងប្រទេសបារាំង។ ហើយនៅទីបញ្ចប់ លោកទទួលបានកេរ្តិ៍ឈ្មោះល្បីរន្ទឺគ្រប់ទីកន្លែង។
នៅក្នុងបទសម្ភាសន៍ជាមួយសារព័ត៌មានអេឡិចត្រូនិកកាលពីដើមឆ្នាំ២០១៥កន្លងមកនៅក្នុងខេត្តសៀមរាប លោក វណ្ណ ម៉ូលីវណ្ណ បាននិយាយថា៖«រៀន និងស្រាវជ្រាវ មិនចេះចប់ទេ។ ខ្ញុំអាយុប៉ុនហ្នឹងហើយ ខ្ញុំនៅតែសរសេរនិក្ខេបបទ។ មិនមែនចេញមកពីសាលា ហើយចប់នោះទេ»។ នេះគឺជាអត្ថាធិប្បាយរបស់លោកឆ្លើយទៅកាន់អ្នកកាសែតដែលសួរលោកថា តើរៀនដូចម្តេចដើម្បីឲ្យពូកែដូចលោក។
លោក វណ្ណ ម៉ូលីវណ្ណ កើតនៅឆ្នាំ១៩២៦ នៅក្នុងខេត្តកំពត ហើយលោកទើបទទួលបានសញ្ញាបត្របណ្ឌិតកាលពីឆ្នាំ២០០៨កន្លមក ពោលគឺក្នុងពេលដែលលោកមានអាយុ៨២ឆ្នាំ។ និក្ខេបបទបណ្ឌិតរបស់លោកនិយាយពីទីក្រុងភូមិភាគអាស៊ីអាគ្នេយ៍-អតីតកាល និងបច្ចុប្បន្ន»៕
© រក្សាសិទ្ធិដោយ thmeythmey.com