ក្រុមជម្រើសជាតិកម្ពុជាជួបប្រកួតមិត្តភាពជាមួយឥណ្ឌូណេស៊ីមុនធ្វើដំណើរទៅជួបវៀតណាម

កីឡាជាតិ

ជាតិ

ក្រុមជម្រើសជាតិកម្ពុជាជួបប្រកួតមិត្តភាពជាមួយឥណ្ឌូណេស៊ីមុនធ្វើដំណើរទៅជួបវៀតណាម

30, Sep 2017 , 3:14 pm

រូបភាព

លោក Leonardo និយាយពេលចូលរួមសន្និសីទសារព័ត៌មានមុនជំនួបជាមួយអាហ្វហ្គានីស្ថាន

ដោយ:

ក្រុមជម្រើសជាតិកម្ពុជាត្រូវជួបប្រកួតមិត្តភាពអន្តរជាតិកំដៅសាច់ដុំជាមួយក្រុមឥណ្ឌូណេស៊ីនៅសប្តាហ៍ក្រោយនេះ។ ការប្រកួតនេះធ្វើឡើងដើម្បីពង្រឹងបច្ចេកទេសសម្រាប់ត្រៀមជួបជាមួយវៀតណាមក្នុងវគ្គជម្រុះជើងទី២នៃព្រឹត្តិការណ៍ AFC Asian Cup 2019 នាថ្ងៃទី១០ ខែតុលា ខាងមុខនេះ។

ដើម្បីត្រៀមជួបក៏ដូចជាសងសឹកវៀតណាមនាថ្ងៃទី១០ ខែតុលា នៅកីឡដ្ឋាន My Dinh Stadium ក្នុងទីក្រុងហូជីមិញប្រទេសវៀតណាម ក្រុមជម្រើសជាតិកម្ពុជាដែលដឹកនាំដោយ Leonardo Vitorino ត្រូវជួបប្រកួតមិត្តភាពអន្តរជាតិជាមួយក្រុមឥណ្ឌូណេស៊ីនាវេលាម៉ោង៩យប់ថ្ងៃទី៤ ខែតុលា នៅកីឡដ្ឋានជាតិ Patriot Candrabaga Stadium។

មុនជំនួបរវាងក្រុមទាំងពីរខាងលើក៏មានការប្រកួតមិត្តភាពអន្តរជាតិរវាងក្រុម U19 កម្ពុជាជាមួយក្រុម U19 ឥណ្ឌូណេស៊ីមួយគូទៀតផងដែរ ដោយជំនួបនេះធ្វើឡើងនាវេលាម៉ោង៦ល្ងាចនៅលើកីឡដ្ឋានដូចគ្នា។ តែយ៉ាងណា ពេលវេលាទាំងនេះអាចមានការប្រែប្រួល ព្រោះកំពុងរងចាំសេចក្តីសម្រេចរបស់សហព័ន្ធកីឡាបាល់ទាត់ពិភពលោក។

ក្រុមជម្រើសជាតិកម្ពុជានឹងចាប់ផ្តើមប្រមូលផ្តុំហ្វឹកហាត់ពង្រឹងសមត្ថភាពសម្រាប់ការប្រកួតទាំងនេះនៅថ្ងៃទី១ ខែតុលា មុនធ្វើដំណើរទៅកាន់ឥណ្ឌូណេស៊ីនៅថ្ងៃទី២ ខែតុលា។ គួររំលឹកថា ក្រុមជម្រើសជាតិកម្ពុជាបានប្រកួតចាញ់ក្រុមវៀតណាមក្នុងលទ្ធផល ២-១ នាវគ្គជម្រុះជើងទី១នៃព្រឹត្តិការណ៍ AFC Asian Cup 2019 នៅពហុកីឡដ្ឋានជាតិកាលពីថ្ងៃទី៥ ខែកញ្ញា។

ក្រុមកីឡាករជម្រើសជាតិកម្ពុជាទាំង២៣នាក់រួមមាន៖ - អ្នកចាំទី ស៊ូ យ៉ាទី, អ៊ុំ សេរីរ័ត្ន, កែវ សុខសិលា - ខ្សែការពារ ណុប តុលា, សឿយ វិសាល, នេន សុធារ័ត្ន, ឆុំ ភីសា, សឿត បារាំង និង ស ពិសិដ្ឋ - ខ្សែបម្រើ ប្រាក់ មុន្នីឧត្តម, រស់ សំអឿន, ឈិន ឈឿន, ទិត្យ ឌីណា, ប៊ីន ចន្ថាធារី, សុះ ស៊ូហាណា, អ៊ិន សូដាវីដ, ប្រាក់ ធីវា, ជួន ចាន់ចាវ និង អ៊ន ចាន់ប៉ូលីន - ខ្សែប្រយុទ្ធ ចាន់ វឌ្ឍនាកា, កែវ សុខផេង, ឃួន ឡាបូរ៉ាវី និង ពេជ្រ សុវណ្ណខេមរិន្ទ្រ៕