កម្ពុជា គ្រោងបង្កើតតំបន់ខ្លាធំ នៅដែនជម្រកសត្វព្រៃស្រែពក ខេត្តមណ្ឌលគីរី

ជាតិ

កម្ពុជា គ្រោងបង្កើតតំបន់ខ្លាធំ នៅដែនជម្រកសត្វព្រៃស្រែពក ខេត្តមណ្ឌលគីរី

30, Sep 2017 , 7:59 pm

រូបភាព

Front រូបភាពីហ្វេសប៊ុកក្រសួងបរិស្ថាន

ដោយ:

កម្ពុជា កំពុងសិក្សា និងប្រមូលព័ត៌មានមួយចំនួន ដើម្បីបង្កើតតំបន់សត្វខ្លាធំ ក្នុងដែនជម្រកសត្វព្រៃស្រែពក ខេត្តមណ្ឌលគីរី។ ទន្ទឹមនឹងនេះ អ្នកពាក់ព័ន្ធ ក៏បានជួបជុំគ្នា ដើម្បីសិក្សា ប្រមូលព័ត៌មានពីរបៀបដែលកម្ពុជា អាចនាំសត្វខ្លា ពីប្រទេសឥណ្ឌាមកបង្កាត់ និងចុះទៅខេត្តមណ្ឌលគីរីផ្ទាល់ ដើម្បីពិនិត្យទីតាំងគម្រោងនេះផង។

មន្ត្រីជំនាញនៃក្រសួងបរិស្ថាន អង្គការWWF ដៃគូពាក់ព័ន្ធដែលធ្វើការលើផ្នែកបរិស្ថាន និងមកពីប្រទេសឥណ្ឌា បានជួបជុំគ្នានៅភ្នំពេញ និងចុះទៅពិនិត្យជាក់ស្តែងនៅខេត្តមណ្ឌលគីរី រយៈពេល៥ថ្ងៃ ចាប់ពីថ្ងៃទី២៥ ដល់ថ្ងៃទី២៩ ខែកញ្ញា ឆ្នាំ២០១៧ ដើម្បីបង្កើតតំបន់សត្វខ្លាធំនៅកម្ពុជា។ នេះបើតាមហ្វេសប៊ុកក្រសួងបរិស្ថាន ដែលបានស្រង់សម្តី លោក មាស សុផល អគ្គនាយករងនៃអគ្គនាយកដ្ឋានរដ្ឋបាលការពារ ទៀតថា ការជួបជុំនេះ ក៏ដើម្បីប្រមែប្រមូលព័ត៌មាននានា ពីរបៀបដែលកម្ពុជា អាចនាំសត្វខ្លា ពីប្រទេសឥណ្ឌាមកបង្កាត់ផងដែរ។ ព័ត៌មានទាំងនោះ នឹងត្រូវបញ្ចូលទៅក្នុងការបង្កើតផែនការប្រតិបត្ដិការ សម្រាប់ការដាក់កម្រិតសត្វព្រៃ នៅដែនជម្រកសត្វព្រៃស្រែពក ក្នុងខេត្តមណ្ឌលគិរី។ នេះបើតាម លោក មាស សុផល ដដែល។

ក្រសួងបរិស្ថាន ក៏បានស្រង់សម្តី លោក សេង ទៀក នាយកប្រចាំប្រទេសអង្គការ WWF ចំពោះគម្រោងបង្កើតតំបន់សត្វខ្លាធំ នៅក្នុងដែនជម្រកសត្វព្រៃស្រែពក ខេត្តមណ្ឌលគីរីនេះដែរ។ លោក សេង ទៀក បញ្ជាក់ថា ការនាំចូលសត្វខ្លាធំត្រឡប់មកវិញ អាចធ្វើឲ្យតំបន់ពិសេសមួយនេះ អាចរក្សាបានទៅអនាគត និងក្លាយជាតំបន់អភិវឌ្ឍន៍មួយនៅខេត្តប៉ែកឦសាននៃកម្ពុជាមួយនេះ។

សូមបញ្ជាក់ថា ការសិក្សាកាលពីឆ្នាំ២០០៧ បានរកឃើញថា សត្វខ្លាធំ មានប្រមាណពី១០ ទៅ១៥ក្បាល នៅក្នងព្រៃកម្ពុជា ហើយតាមការពិនិត្យ និងវាយតម្លៃ សត្វខ្លាធំ បានបាត់វត្តមានអស់ជាងមួយឆ្នាំកន្លងមក។

សម្រាប់ លោក មាស សុផល ការបង្កើតតំបន់ខ្លាធំ គឺឈានឆ្ពោះទៅរកការការពារ និងអភិរក្សធនធានធម្មជាតិនៅកម្ពុជា ដើម្បីផលប្រយោជន៍សម្រាប់ជំនាន់នេះ និងក្រោយ និងប្រយោជន៍សម្រាប់តំបន់អភិរក្សផងដែរ។

សូមជម្រាបថា បច្ចុប្បន្ន កម្ពុជាមានតំបន់អភិរក្ស និងការពារធនធានធម្មជាតិចំនួន៤៦ កន្លែង និងច្រកអភិរក្សជីវចម្រុះ (ភាគខាងកើតខាងជើងនិងភ្នំក្រវាញ) គ្របដណ្តប់លើផ្ទៃដី សរុបជាង៧.៤ លានហិកតា។ ដោយឡែក ដែនជម្រកសត្វព្រៃស្រែពក ក្នុងខេត្តមណ្ឌលគីរី គ្របដណ្តប់លើផ្ទៃដី ៣៧២,៩៧១ហិកតា ដែលជាតំបន់សម្បូរជីវៈចម្រុះ ដែលរក្សាបានប្រព័ន្ធអេកូស៊ីយ៉ាងប្រសើរ ភ្ជាប់ជាមួយនឹងដែនជម្រកសត្វព្រៃភ្នំព្រិច និងជម្រកសត្វព្រៃលំផាត់ ក្នុងខេត្តនេះផងដែរ៕