អន្តរជាតិ
នៅបាងកក នំពុម្ពរាងលិង្គលក់ដាច់ ប៉ុន្តែក៏រងនូវការរិះគន់ខ្លាំងផងដែរ
×![]()
ដោយ: ធីតា
ការភ្លក់រសជាតិនំពុម្ពមិនមានអ្វីចោទជាបញ្ហានោះឡើយ ប៉ុន្តែនៅទីក្រុងបាងកក ប្រទេសថៃ នំដែលមានស្នូល Hot Dog នេះ កំពុងរងនូវការរិះគន់យ៉ាងខ្លាំង ដោយសារតែវាមានរូបរាងដូចលិង្គ។ ទោះ បីជាយ៉ាងណាក៏ដោយ របរថ្មីរបស់ស្ត្រីឈ្មោះ Ketnita Prasertsomboon កំពុងលក់ដាច់ និងទាក់ទាញអតិថិជនដែលជាទេសចរបរទេសជាច្រើន។
ឃ្លីបវីដេអូស្តីពីអាជីវកម្មលក់នំពុម្ពរាងលិង្គនៅក្នុងទីក្រុងបាងកក ទាក់ទាញបានចំនួនទស្សនាជិត២០លានដង បើគិតចាប់តាំងពីថ្ងៃទី១៦ ខែកញ្ញាមក។ វាជារបររកស៊ីថ្មីរបស់អ្នកស្រី Ketnita Prasertsomboon បន្ទាប់ពីបានឃើញការរកស៊ីទំនិញដែលមានរូបលិង្គតាមបណ្តាញអ៊ីនធ័រណិត។
នំចំណីដែលប្រកបដោយការច្នៃប្រឌិតរបស់អ្នកស្រី Ketnita មានទីផ្សារយ៉ាងខ្លាំង ជាពិសេសភ្ញៀវទេសចរបរទេស។ ទន្ទឹមនឹងទទួលបានចំណូលកាក់កប អតីតបុគ្គលិកក្រុមហ៊ុនឯកជនរូបនេះ ក៏ទទួលរងនូវការរិះគន់យ៉ាងខ្លាំងផងដែរ។
ក្នុងបទសម្ភាសជាមួយទូរទស្សន៍ Amarin TV អ្នកស្រី Ketnita បានរៀបរាប់ថា៖ «មនុស្សមួយចំនួនស្តីបន្ទោសថា ខ្ញុំបានធ្វើទង្វើមិនគប្បី។ ខ្ញុំពិតជាស្មុគ្រស្មាញណាស់ ប៉ុន្តែខ្ញុំមិនព្យាយាមតវ៉ាអ្វីឡើយ។ ខ្ញុំនៅតែបន្តធ្វើរហូតដល់មនុស្សទូទៅគិតថា វាជានំចំណីដ៏សាមញ្ញមួយ»។
មេចុងភៅដ៏ល្បីល្បាញម្នាក់នៅបាងកក បានណែនាំអ្នកស្រុកឲ្យធ្វើពហិកាញ៉ាំនំរាងលិង្គរបស់អ្នកស្រី Ketnita។ លោក Yingsak Chonglertjetsadawong បានអះអាងថា៖ «ខ្ញុំប្រកបរបរចុងភៅរាប់សិបឆ្នាំ តែខ្ញុំមិនដែលប្រទះចំណីអាហារដូចប្រដាប់ភេទបែបនេះឡើយ»។
លោកបានចោទជាសំណួរតាមហ្វេសប៊ុកថា៖ «តើអ្នកនឹងទិញនំបែបនេះ ជូនឪពុកម្តាយដែរទេ? តើអ្នកទិញវាប្រគេនព្រះសង្ឃដែរទេ? ចុះបើក្មេងស្រីអាយុ៧ ឬ៨ឆ្នាំ ដើរញ៉ាំតាមផ្លូវ តើអ្នកឃើញរូបភាពអ្វីខ្លះ? នារីៗនាំគ្នាថតរូបពីសកម្មភាពញ៉ាំនំលិង្គ វាជាគំរូដ៏អាក្រក់បំផុតសម្រាប់យុវជន»។
ថៃជាប្រទេសដែលកាន់ព្រះពុទ្ធសាសនា ដូច្នេះរូបភាពបែបនេះ បង្ករឲ្យមានការរិះគន់យ៉ាងចាស់ដៃ ប៉ុន្តែជាមួយគ្នា គេសង្កេតឃើញថា ទង្វើប្លែកៗដូចបណ្តាពលរដ្ឋនៅអឺរ៉ុប បានធ្វើឲ្យអាជីវករកាក់កបយ៉ាងខ្លាំងលើមុខជំនួញរបស់ខ្លួន៕
Tag:
ប្លែកៗ
នំពុម្ព
© រក្សាសិទ្ធិដោយ thmeythmey.com
