សម្តេច ហ៊ុន សែន ប្រកាសរៀបចំព្រឹត្តិការណ៍អង្គរសង្ក្រាន្តឆ្នាំ២០១៨

ជាតិ

សម្តេច ហ៊ុន សែន ប្រកាសរៀបចំព្រឹត្តិការណ៍អង្គរសង្ក្រាន្តឆ្នាំ២០១៨

07, Oct 2017 , 2:59 pm

រូបភាព

« សម្តេច ហ៊ុន សែន ពេលសម្ពោធសណ្ឋាគារ សុខសៀមរាប នៅថ្ងៃទី២ ខែតុលា ឆ្នាំ២០១៧។

ដោយ: អុីសា រ៉ហានី (Isa Rohany)

សៀមរាប៖ ប្រមុខរាជរដ្ឋាភិបាលកម្ពុជា កាលពីពេលថ្មីៗនេះ បានប្រកាសជាសាធារណថា នឹងមានព្រឹត្តិការណ៍អង្គរសង្ក្រាន្តឆ្នាំ២០១៨។ ការប្រកាសនេះ គឺតបទៅនឹងមតិខ្លះដែលលើកឡើងថា អង្គរសង្ក្រាន្តនឹងមិនរៀបចំធ្វើទៀតទេ ក្នុងឆ្នាំ២០១៨ខាងមុខនេះ។

នៅចំពោះមុខមន្ត្រីរាជការ សិស្សានុសិស្ស និងប្រជាពលរដ្ឋជាច្រើនរយនាក់នៅក្នុងពិធីសម្ពោធជាផ្លូវការ នៅសណ្ឋាគារសុខា សៀមរាប កាលពីថ្ងៃទី២ តុលា ឆ្នាំ២០១៧ សម្តេច ហ៊ុន សែន ថាព្រឹត្តិការណ៍អង្គរសង្ក្រាន្ត នឹងរៀបចំធ្វើទៀត នៅឆ្នាំ២០១៨ខាងមុខនេះ។

គេមិនទាន់ដឹងរាល់កម្មវិធី ដែលគ្រោងរៀបចំនៅក្នុងព្រឹត្តិការណ៍អង្គរសង្ក្រាន្តនៅឆ្នាំ២០១៨នេះនៅឡើយ។ រាល់ឆ្នាំ ពិធីសំខាន់ៗ ដែលរៀបចំរួមមាន ពិធីសាសនា សម្តែងសិល្បៈ ការកម្សាន្ត និងល្បែងប្រជាប្រិយខ្មែរ។ល។

គួររម្លឹកថា ព្រឹត្តិការណ៍អង្គរសង្ក្រាន្តបានទាក់ទាញភ្ញៀវទេសចរជាតិ និងអន្តរជាតិច្រើនពីមួយឆ្នាំទៅមួយឆ្នាំ។ កាលពីលើកទីមួយឆ្នាំ២០១៣ ព្រឹត្តិការណ៍នេះទាក់ទាញភ្ញៀវទេសចរ ១៧ម៉ឺននាក់ លើកទីពីរ ឆ្នាំ២០១៤ ចំនួន ៣៨ម៉ឺននាក់ លើកទីបី ឆ្នាំ២០១៥ មានចំនួន ៩៧ម៉ឺននាក់ និងលើកទីបួន ឆ្នាំ២០១៦ គឺកើនឡើងដល់ទៅ ១,៣លាននាក់៕