អន្តរជាតិ
ការសិក្សា៖ នៅអូស្ត្រាលី ឆ្មាសម្លាប់សត្វស្លាបជាង១លានក្បាលជារៀងរាល់ថ្ងៃ
× សត្វបក្សីកំពុងប្រឈមគ្រោះថ្នាក់យ៉ាងខ្លាំងនៅអូស្ត្រាលី ដោយជីវិតរបស់ពួកវាត្រូវសត្វឆ្មាយាយី។ បើតាមការសិក្សាមួយ សត្វស្លាបជាង១លានក្បាលជារៀងរាល់ថ្ងៃ បានបាត់បង់ជីវិតដោយសារសត្វឆ្មា។ នេះបើតាមការផ្សាយរបស់ទីភ្នាក់ងារព័ត៌មាន AFP។
ក្រុមអ្នកស្រាវជ្រាវនៅសាកលវិទ្យាល័យអូស្ត្រាលី Charles Darwin បានផ្សព្វផ្សាយរបាយការណ៍មួយនៅក្នុងព្រឹត្តិបត្រ Biological Conversation ដោយបង្ហាញឲ្យឃើញថា សត្វស្លាបគ្រប់ប្រភេទក្នុងរង្វង់ ៣១៦លានក្បាលជារៀងរាល់ឆ្នាំ បានងាប់ដោយសារឆ្មាចាប់ និងខាំ។
លោក John Woinarski ប្រធានក្រុមដឹកនាំការស្រាវជ្រាវ បានលើកឡើងថា៖ «មនុស្សទូទៅដឹងថា ឆ្មាសម្រាប់សម្លាប់សត្វស្លាប់ ប៉ុន្តែការសិក្សានេះ បង្ហាញពីតួលេខថ្នាក់ជាតិពិតប្រាកដ ដែលអាចឲ្យយើងវាយតម្លៃពីការបាត់ បង់ជាបន្តបន្ទាប់នូវពូជសត្វស្លាបមួយចំនួនដោយសារតែឆ្មាស៊ី»។
សាកលវិទ្យាល័យអូស្ត្រាលី Charles Darwin ទទួលបានតួលេខទាំងនេះ តាមរយៈការសិក្សា និងសាកសួរទូទាំងប្រទេសអូស្ត្រាលី ទៅកាន់អ្នកជំនាញបរិស្ថាន អ្នកជំនាញផ្នែកសត្វ រួមទាំងទិន្នន័យនានាទាក់ទងនឹងសត្វឆ្មា ក៏ដូចជាបក្សី។
ករណីជាច្រើនកើតនៅតំបន់កោះ និងតំបន់ដាច់ស្រយាលនៃប្រទេសអូស្ត្រាលី ដោយលទ្ធផលនៃការសិក្សាបានបង្ហាញឲ្យឃើញថា រៀងរាល់ឆ្នាំឆ្មាអាចសម្លាប់សត្វស្លាបបានប្រមាណ៣៣០ក្បាលក្នុងបរិវេណដី១គីឡូម៉ែត្រការ៉េ។ ជាមួយគ្នានេះ ឆ្មាអនាថា ត្រូវបានចាត់ទុកជាឆ្មាដែលគ្រោះថ្នាក់ជាងគេសម្រាប់សត្វស្លាប។
យោងតាម AFP លោក Woinarski បានបញ្ជាក់ថា៖ «បក្សីដែលរងគ្រោះភាគច្រើន ដោយសារតែពួកវាមានរូបរាងតូច ហើយពួកវាត្រូវបានឆ្មាស្ទាក់ខាំនៅពេលដែលពួកវាចុះទៅស៊ីចំណីនៅដី។ ឆ្មាខ្លះឡើងទៅខាំដល់សំបុកបក្សី»។
ទាក់ទងនឹងករណីនេះ រដ្ឋាភិបាលអូស្ត្រាលី បានទម្លាក់កញ្ចប់ថវិកាជាង៣០លានដុល្លារអូស្ត្រាលី (ប្រមាណ២៣.៥០លានដុល្លារអាមេរិក) សម្រាប់យុទ្ធនាការកាត់បន្ថយគ្រោះថ្នាក់បក្សីដែលបង្កឡើយដោយសារសត្វឆ្មា។
តួលេខលំអិត៖
-បក្សី៣៧៧លានក្បាលត្រូវបានសម្លាប់ជារៀងរាល់ឆ្នាំ
-៩៩ភាគរយដែលបក្សីដែលត្រូវបានសម្លាប់ជាបក្សីអំបូរដើម ដែលមាន៣៧៣លានក្បាល
-បក្សី៣១៦លានក្បាលត្រូវបានសម្លាប់ជារៀងរាល់ឆ្នាំដោយសារឆ្មាដែលគ្មានម្ចាស់ ឆ្មាអនាថា
-បក្សី៦១លានក្បាលត្រូវសម្លាប់ជារៀងរាល់ឆ្នាំដោយសារឆ្មាចិញ្ចឹម
-បក្សី៣៣៨ប្រភេទ ក្នុងនោះ៧១ ជាប្រភេទរងគ្រោះ ត្រូវបានសម្លាប់៕
© រក្សាសិទ្ធិដោយ thmeythmey.com