កីឡាជាតិ
ជាតិ
អត្តពលិកប៉េតង់កម្ពុជា៨រូបចេញទៅប្រជែងដណ្តើមមេដាយពិភពលោកនៅដើមខែវិច្ឆិកា កីឡាការិនី កែ ឡេង វាយប៊ូលក្នុងជំនួបជាមួយឥណ្ឌូណេស៊ី, រូបភាពពីហ្វេសប៊ុកនាយកដ្ឋានកីឡា
× អត្តពលិកកីឡាប៉េតង់កម្ពុជាចំនួន៨រូប(ស្រី៤រូប)នឹងចូលរួមប្រកួតប្រជែងដណ្តើមមេដាយពីព្រឹត្តិការណ៍ជើងឯកពិភពលោកនៅទីក្រុង Kaihua ប្រទេសចិនចន្លោះពីថ្ងៃទី៤ ដល់ថ្ងៃទី១២ ខែវិច្ឆិកា ឆ្នាំ២០១៧ ខាងមុខនេះ។ អត្តពលិកកម្ពុជាទាំងនេះប្រកួតលើពីរប្រភេទវិញ្ញាសា គឺវិញ្ញាសាវាយយកពិន្ទុ និង៣នាក់ទល់៣នាក់។
អត្តពលិកកីឡាប៉េតង់កម្ពុជារួមមានកីឡាករ ឃួន លីហ៊, ភាព រ៉ាឃីម, កុយ ច័ន្ទសុភត្រា, កៅ ភក្តី, កីឡាការិនី កែ ឡេង, អ៊ុក ស្រីមុំ, អ៊ុន ស្រីយ៉ា និងកីឡាការិនី ស្រ៊ាង សុរ៉ាឃីម ត្រូវបំពេញបេសកកម្មដណ្តើមមេដាយក្នុងព្រឹត្តិការណ៍លំដាប់ពិភពលោកនៅទីក្រុង Kaihua ប្រទេសចិននាដើមខែវិច្ឆិកា ខាងមុខនេះ។
ការប្រកួតនេះបែងចែកជាពីរផ្នែកក្នុងនោះជើងឯកពិភពលោកកម្រិតយុវជនដែលមានកីឡាករ ឃួន លីហ៊, ភាព រ៉ាឃីម, កុយ ច័ន្ទសុភត្រា និងកីឡាករ កៅ ភក្តី ប្រកួតចាប់ពីថ្ងៃទី៤ ដល់ថ្ងៃទី៨ ខែវិច្ឆិកា ខណៈផ្នែកនារីដែលមានកីឡាការិនី កែ ឡេង, អ៊ុក ស្រីមុំ, អ៊ុន ស្រីយ៉ា និងកីឡាការិនី ស្រ៊ាង សុរ៉ាឃីម ប្រកួតចាប់ពីថ្ងៃទី៨ ដល់ថ្ងៃទី១២ ខែវិច្ឆិកា ឆ្នាំ២០១៧។ អត្តពលិកកម្ពុជាទាំងនេះត្រូវប្រកួតប្រជែងលើពីរវិញ្ញាសារៀងៗខ្លួន គឺវិញ្ញាសាវាយយកពិន្ទុ និងវិញ្ញាសា៣នាក់ទល់៣នាក់។
ម្ចាស់មេដាយមាសពិភពលោកពីរជំនាន់កីឡាការិនី កែ ឡេង ត្រូវបានសហព័ន្ធកីឡាប៊ូល និងប៉េតង់កម្ពុជាដាក់តួនាទីឲ្យការពារតំណែងជើងឯកលើវិញ្ញាសាវាយយកពិន្ទុ ដែលជាវិញ្ញាសាសក្តានុពលរបស់កម្ពុជា។ ការកំណត់បែបនេះ ដោយសារកីឡាការិនីរូបនេះមានជំនាញផ្នែកវាយយកពិន្ទុ ម្យ៉ាងទៀតមេដាយមាសពិភពលោកពីរកន្លងមកក៏ឈ្នះលើវិញ្ញាសានេះផងដែរ៕
Tag:
ប៉េតង់
កែ ឡេង
អ៊ុក ស្រីមុំ
អ៊ុន ស្រីយ៉ា
ស្រ៊ាង សុរ៉ាឃីម
© រក្សាសិទ្ធិដោយ thmeythmey.com