កីឡាជាតិ
ជាតិ
FFC សម្រេចរៀបចំពានរង្វាន់យុវជនចំនួន៣បន្ថែមទៀតដើម្បីត្រៀមស៊ីហ្គេមឆ្នាំ២០២៣
× សហព័ន្ធកីឡាបាល់ទាត់កម្ពុជា(FFC)នឹងរៀបចំពានរង្វាន់៣បន្ថែមទៀត រួមមានការប្រកួតជម្រើសជើងឯកយុវជន U14, U16 និងបាល់ទាត់នារីប្រចាំឆ្នាំ២០១៧ ដើម្បីត្រៀមការប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ ការប្រកួតនេះនឹងចាប់ផ្តើមប្រកួតវគ្គជម្រុះតាមពូលនីមួយៗចន្លោះពីថ្ងៃទី២៦ វិច្ឆិកា ឆ្នាំ២០១៧ ដោយគ្រោងបញ្ចប់នៅថ្ងៃទី១៨ មីនា ឆ្នាំ២០១៨។ ការប្រកួតបែងចែកជាពូល និងពីរដំណាក់កាល ដោយដំណាក់ប្រកួតវិលជុំប្រើប្រាស់ទីលានម្ចាស់ផ្ទះរៀងៗខ្លួន និងដំណាក់កាលជម្រុះប្រើទីលានមជ្ឈមណ្ឌលបាល់ទាត់ជាតិបាទី។
យោងតាមសេចក្តីជូនដំណឹងកាលពីថ្ងៃទី៤ ខែតុលា សហព័ន្ធកីឡាបាល់ទាត់កម្ពុជាបានសម្រេចរៀបចំការប្រកួតពានរង្វាន់ក្រមខណ្ឌយុវជនអាយុក្រោម១៤ឆ្នាំ និង១៦ឆ្នាំ និងពានរង្វាន់បាល់ទាត់នារីនាខែវិច្ឆិកា ខាងមុខនេះ។ ព្រឹត្តិការណ៍នេះធ្វើឡើងដើម្បីឆ្លើយតបនឹងផែនការអភិវឌ្ឍន៍កីឡាបាល់ទាត់ទូទាំង២៥រាជធានី-ខេត្តឆ្ពោះទៅការប្រកួតកីឡាស៊ីហ្គេមលើកទី៣២កម្ពុជាជាម្ចាស់ផ្ទះ ដែលជាផែនការយុទ្ធសាស្ត្ររបស់ FFC សហការជាមួយក្រសួងអប់រំ យុវជន និងកីឡា។
សេចក្តីជូនដំណឹងដែលចុះហត្ថលេខាដោយអគ្គលេខាធិការស្តីទីលោក ម៉ៃ តុលា សម្រាប់ការរៀបចំលើកដំបូងពានរង្វាន់បាល់ទាត់នារីមាន១១ក្រុមចូលរួម ខណៈជម្រើសយុវជន U14 និង U16 មាន១៦ក្រុមចូលរួមដូចគ្នា។ ក្នុងនោះបាល់ទាត់នារីចែកចេញជា២ពូលដោយពូល A មានបាត់ដំបង សៀមរាប បន្ទាយមានជ័យ កំពង់ឆ្នាំង ព្រះវិហារ និងកំពង់ចាម រីឯពូល B មានកណ្តាល ក្រចេះ កំពង់ស្ពឺ តាកែវ និងភ្នំពេញក្រោន។
ពានរង្វាន់នេះចែកចេញជាពីរដំណាក់កាលក្នុងនោះដំណាក់កាលទី១(វិលជុំ)ចាប់ពីថ្ងៃទី២៦ វិច្ឆិកា ដល់ថ្ងៃទី៣១ ធ្នូ ឆ្នាំ២០១៧ ខណៈដំណាក់កាលទី២(ជម្រុះ)ចាប់ពីថ្ងៃទី១២ ដល់ថ្ងៃទី១៤ ខែមករា ឆ្នាំ២០១៨។ ការប្រកួតនេះធ្វើឡើងរៀងរាល់ថ្ងៃអាទិត្យលើទីលានម្ចាស់ផ្ទះ(សម្រាប់វគ្គវិលជុំ) និងទីលានមជ្ឈមណ្ឌលបាល់ទាត់ជាតិបាទី(វគ្គជម្រុះ)។
ចំណែកជម្រើសជើងឯកយុវជនអាយុក្រោម១៤ឆ្នាំ និង១៦ឆ្នាំចែកជា៤ពូលដូចគ្នា ក្នុងនោះ U14 ពូល A មានស្វាយរៀង ព្រៃវែង កំពង់ចាម និងត្បូងឃ្មុំ, ពូល B កំពត កែប ព្រះសីហនុ និងកោះកុង, ពូល C កណ្តាល កំពង់ស្ពឺ តាកែវ និងសាលាបាល់ទាត់រាជធានីភ្នំពេញ និងពូល D ព្រះខ័នរាជស្វាយរៀង ក្រសួងការពារជាតិ ភ្នំពេញក្រោន និងបឹងកេត។
រីឯ U16 ពូល A មានស្វាយរៀង ព្រៃវែង កំពង់ចាម និងត្បូងឃ្មុំ, ពូល B កំពត កែប ព្រះសីហនុ និងកោះកុង, ពូល C កណ្តាល កំពង់ស្ពឺ តាកែវ និងសាលាបាល់ទាត់ជាតិបាទី និងពូល D សាលាបាល់ទាត់រាជធានីភ្នំពេញ ក្រសួងការពារជាតិ ភ្នំពេញក្រោន និងបឹងកេត។
ការប្រកួតបាល់ទាត់ជម្រើសជើងឯកយុវជន U14 និង U16 ចែកចេញជាពីរដំណាក់កាលក្នុងនោះដំណាល់ទី១ដែលប្រើប្រាស់កីឡដ្ឋានម្ចាស់ផ្ទះរៀងៗខ្លួនធ្វើឡើងចន្លោះពីថ្ងៃទី២៦ វិច្ឆិកា ដល់ថ្ងៃទី៣១ ខែធ្នូ ឆ្នាំ២០១៧ ខណៈដំណាក់កាលទី២ដែលរៀបចំនៅទីលានមជ្ឈមណ្ឌលបាល់ទាត់ជាតិបាទីចន្លោះពីថ្ងៃទី៨ ដល់ថ្ងៃទី១៨ ខែមីនា ឆ្នាំ២០១៨៕
Tag:
បាល់ទាត់
FFC
ជម្រើសជើងឯកយុវជន
© រក្សាសិទ្ធិដោយ thmeythmey.com