ក្រសួងមហាផ្ទៃ ប្រកាសរើសមន្ត្រីពន្ធនាគារ៣៥០នាក់

ជាតិ

ក្រសួងមហាផ្ទៃ ប្រកាសរើសមន្ត្រីពន្ធនាគារ៣៥០នាក់

08, Oct 2017 , 10:59 am

រូបភាព

ដោយ: ថ្មីៗ

ក្រសួងមហាផ្ទៃបានប្រកាសជ្រើសរើសមន្ត្រី៣៥០នាក់ ឲ្យចូលបម្រើការងារក្នុងក្របខណ្ឌមន្ត្រីពន្ធនាគារ ក្រសួងមហាផ្ទៃ។

ឆ្នាំ២០១៧នេះ ក្រសួងមហាផ្ទៃ នឹងជ្រើសរើសមន្ត្រីពន្ធនាគារចំនួន៣៥០នាក់ ឲ្យបម្រើការងាររក្នុងក្របខណ្ឌមន្ត្រីពន្ធនាគារ ក្រសួងមហាផ្ទៃ នៅតាមមណ្ឌលកែប្រែ និងពន្ធនាគារនានាតាមខេត្តមួយចំនួន។ តាមក្រសួងមហាផ្ទៃ មន្ត្រីទាំង៣៥០នាក់នេះ នឹងត្រូវបញ្ជូលទៅបម្រើការងារនៅមណ្ឌលកែប្រែទី១ មណ្ឌលកែប្រែទី២ មណ្ឌលកែប្រែទី៣ និងមណ្ឌលកែប្រែទី៤ ពន្ធនាគារខេត្តកណ្តាល បាត់ដំបង សៀមរាប បន្ទាយមានជ័យ ខេត្តកំពង់ចាម ត្បូងឃ្មុំ និងពន្ធនាគារខេត្តពោធិ៍សាត់។

បើតាមសេចក្តីជូនដំណឹងរបស់ក្រសួងមហាផ្ទៃ បេក្ខជនអាចរកពាក្យសុំប្រឡង និងដាក់ពាក្យប្រឡងនៅនាយកដ្ឋានបុគ្គលិកនៃនាយកដ្ឋានរដ្ឋបាល សម្រាប់បេក្ខជនដែលដាក់ពាក្យប្រឡងនៅអគ្គនាយកដ្ឋានពន្ធនាគារ មណ្ឌលកែប្រែទី១ និងមណ្ឌលកែប្រទី២ ។ សាលាខេត្តត្បូងឃ្មុំ សម្រាប់បេក្ខជនដែលដាក់ពាក្យប្រឡងចូលបម្រើការងារនៅមណ្ឌលកែប្រែទី៣ និងនៅសាលាខេត្តពោធិ៍សាត់សម្រាប់បេក្ខជនដែលដាក់ពាក្យប្រឡងចូលបម្រើការងារនៅមណ្ឌលកែប្រែទី៤ និងនៅសាលាខេត្តកណ្តាល បាត់ដំបង សៀមរាប កំពង់ចាម និងបន្ទាយមានជ័យ សម្រាប់បេក្ខជនដែលចង់ចូលបម្រើការងារនៅពន្ធនាគារខេត្តទាំងនេះ។

លក្ខខណ្ឌនៃការដាក់ពាក្យ បេក្ខជនត្រូវមានសញ្ជាតិខ្មែរ មានកាយសម្បទារគ្រប់គ្រាន់ និងសុខភាពល្អ។ នារីត្រូវមានកម្ពស់ចាប់ពី១.៥៥ម៉ែត្រឡើង រីឯបុរសត្រូវមានកម្ពស់ចាប់ពី១.៦៥ម៉ែត្រឡើងទៅ ព្រមទាំងត្រូវមានសញ្ញាបត្រយ៉ាងហោចមធ្យមសិក្សាទុតិយភូមិ ឬសញ្ញាបត្រសមមូល។ បើតាមសេចក្តីជូនដំណឹងដដែល បេក្ខជនមិនត្រូវប្រាសចាកសិទ្ធិរដ្ឋប្បវេណី និងសិទ្ធិជាពលរដ្ឋ។ ជាមួយគ្នានេះ បេក្ខជន ត្រូវមានអាយុយ៉ាងតិច១៨ឆ្នាំ និងយ៉ាងច្រើន២៥ឆ្នាំ ហើយកម្រិតអាយុនេះ នឹងត្រូវរំកិលពី២៥ ទៅ៣៥ឆ្នាំ សម្រាប់អ្នកដែលមានសញ្ញាបត្របរិញ្ញាបត្រ ឬសមមូល និងរំកិលដល់៤០ឆ្នាំ ចំពោះបេក្ខជនដែលមានសញ្ញាបត្របរិញ្ញាបត្រជាន់ខ្ពស់ ឬសមមូល ព្រមទាំងត្រូវបានលើកលែងកម្រិតអាយុ សម្រាប់បេក្ខជនដែលមានសញ្ញាបត្រចាប់ពីបណ្ឌិត៕