ជាតិ
ក្រសួងធនធានទឹក៖ទឹកទន្លេហក់ឡើងជាថ្មី ខណៈរាជធានី-ខេត្ត នឹងជួបជំនន់ទឹកភ្លៀង
× ប្រព័ន្ធសម្ពាធទាប ដែលកំពុងអូសកាត់លើភាគខាងជើងកម្ពុជា នឹងបង្កើនឥទ្ធិពលកាន់តែខ្លាំងចាប់ពីថ្ងៃទី១១ ខែតុលានេះ ដែលនឹងបង្កឲ្យផ្ទៃមេឃមានសភាពអាប់អួ អាចមានភ្លៀងធ្លាក់ច្រើនជាប់ៗគ្នា ក្នុងក្របខណ្ឌទូទាំងប្រទេស ពិសេសចាប់ពីថ្ងៃទី១៣ ដល់ថ្ងៃទី២២ ខែតុលា។ ទន្ទឹមនឹងនេះ ភ្លៀងក៏ធ្លាក់រាយប៉ាយច្រើននៅលើតំបន់ផ្ទៃរងទឹកភ្លៀងរបស់ទន្លេមេគង្គ ដែលជាជំរុញឲ្យទឹកទន្លេហក់ឡើងជាថ្មី។
ក្រសួងធនធានទឹក និងឧតុនិយម បានបញ្ជាក់ដោយយោងលើការព្យាកររបស់ខ្លួនថា ប្រព័ន្ថសម្ពាធទាប បាន និងកំពុងបន្តអូសកាត់លើភាគខាងជើងកម្ពុជា។ ស្របពេលជាមួយគ្នានេះ វិសម្ពាធមួយនៅក្នុងសមុទ្រចិនខាងត្បូង បាន និងកំពុងរំកិលខ្លួនមកកាន់ឆ្នេរប្រទេសវៀតណាមភាគកណ្តាល។ ក្រសួងធនធានទឹក បញ្ជាក់ទៀតថា វិសម្ពាធនេះ នឹងបង្កឲ្យប្រព័ន្ធសម្ពាធទាបនៅលើប្រទេសកម្ពុជា បង្កើនឥទ្ធិពលកាន់តែខ្លាំង។ ហើយវានឹង បន្តស្ថិតនៅលើប្រទេសកម្ពុជា ជាច្រើនថ្ងៃបន្ថែមទៀត ដោយសារចាប់ពីថ្ងៃទី១១ ខែតុលានេះ សម្ពាធាទាបដែលកើតឡើងនៅមហាសមុទ្រប៉ាស៊ីហ្វិក និងរំកិលខ្លួនឆ្លងកាត់ប្រទេសហ្វីលីពីន ចូលមកក្នុងសមុទ្រចិនខាងត្បូងជាបន្តបន្ទាប់។
យោងតាមការព្យាករអាកាសធាតុនេះ កម្ពុជាអាចមានភ្លៀងធ្លាក់ច្រើនជាប់ៗគ្នា ក្នុងក្របខណ្ឌទូទាំងប្រទេស ពិសេសចាប់ពីថ្ងៃទី១៣ ដល់ថ្ងៃទី២២ ខែតុលា ដែលនឹងធ្វើឲ្យរាជធានី ខេត្តជាច្រើន អាចប្រឈមនឹងជំនន់ទឹកភ្លៀង។ ទន្ទឹមនឹងនេះ ភ្លៀងក៏ធ្លាក់រាយប៉ាយច្រើននៅលើតំបន់ផ្ទៃរងទឹកភ្លៀងរបស់ទន្លេមេគង្គ ដែលជាជំរុញឲ្យទឹកទន្លេហក់ឡើងជាថ្មី៕
Tag:
ជំនន់ទឹកភ្លៀង
ទឹកទន្លេ
© រក្សាសិទ្ធិដោយ thmeythmey.com