ពីនេះ ពីនោះ
ជនជាតិចាមខ្លះ រស់នៅលើទូកនេសាទតជំនាន់
× ក្នុងរូបភាពនេះ គឺទូក និងឧបករណ៍នេសាទ របស់ជនជាតិចាមនៅក្នុងស្ទឹងព្រែកត្នោត ដែលជាដៃទន្លេបាសាក់តភ្ជាប់ទៅតំបន់ភ្នំក្នុងខេត្តកំពង់ស្ពី ស្ថិតនៅក្នុងភូមិព្រែកតាពៅ ក្បែរវិហារ អាល់ សាហីម។ ធម្មតា ជនជាតិចាមរស់នៅក្បែរប្រភពទឹក ជាពិសេសក្នុងបឹងទន្លេសាប តាមដងទន្លេសាប ទន្លេមេគង្គ និងទន្លេបាសាក់ជាដើម។
ពួកគេស្ទាត់ជំនាញខាងការងារនេសាទត្រី តពីមួយជំនាន់ទៅមួយជំនាន់ទៀត ពោលគឺតាំងពីគេបានចាប់កំណើតដឹងក្តីមកម្ល៉េះ។ ក្រៅពីធ្វើជាមធ្យោបាយម្រាប់ការងារនេសាទ ទូកគឺជាផ្ទះ ដូចអ្នករស់នៅលើគោគដែរ។ បច្ចុប្បន្ននេះ យុវជនក្មេងៗជំនាន់ក្រោយ ដោយមិនចង់រស់នៅ និងបន្តមុខរបរនេសាទជាប្រពៃណីពីឪ-ម្តាយរបស់ខ្លួន ក៏ស្វែងរកមុខរបបថ្មីនៅលើគោកវិញ។
ជាក់ស្តែង ក្រៅពីជំនាញនេសាទត្រី ជនជាតិចាមក្នុងសហគមមូស្លីមកម្ពុជា ក្នុងក្រុងតាខ្មៅ ខេត្តកណ្តាល ពួកគេមានជំនាញផ្សេងមួយទៀតគឺផលិតមង និងសំណាញ់ដោយដៃ។ អ្នកខ្លះផលិតដោយខ្លួនឯង ឯអ្នកខ្លះទៀត ទិញផលិតផលមិនទាន់សម្រេចពីប្រទេសជិតខាងដូចជា ថៃ ម៉ាឡេស៊ី និងវៀតណាមជាដើម មកបំពេញបន្ថែមនូវឧបករណ៍ចាំបាច់ផ្សេងៗ ដូចជាសំណាញ់ត្រូវដាក់ថែមខ្សែ និងច្រវាក់តាមជើង។ ចំណែកឯមង គឺត្រូវបន្ថែមខ្សែរនង និងកំសួលជាដើម ដើម្បីឲ្យក្លាយទៅជាផលិតផលសម្រេចសម្រាប់ដាក់លក់លើទីផ្សារ។ មានយុវជនខ្លះ ក៏បានស្វែងរកការងារផ្សេងក្រៅពីនេះដែរ។
(អត្ថបទ និងរូបភាពដោយ Chhut Chheana / USAID Wonders of the Mekong).
© រក្សាសិទ្ធិដោយ thmeythmey.com