ជាតិ
នយោបាយជាតិ
តុលាការកំពូល ជម្រះបណ្តឹងសារទុក្ខលើករណីឃុំខ្លួន ឯកឧត្តម កឹម សុខា
× តុលាការកំពូល នៅព្រឹកថ្ងៃទី៣១ ខែវិច្ឆិកានេះ កំពុងបើកសវនាការជំនុំជម្រះ លើបណ្តឹងចោទឯកឧត្តម កឹម សុខា ពីបទក្បត់ជាតិ។ សវនាការនេះ ប្រព្រឹត្តទៅ ដោយគ្មានវត្តមាន ឯកឧត្តម កឹម សុខា ដែលជាជនត្រូវចោទ។
តុលាការកំពូល កំពុងបើកសវនាការលើបណ្តឹងសារទុក្ខរបស់ក្រុមក្រុមមេធាវីរបស់ ឯកឧត្តម កឹម សុខា ដែលបានប្តឹង ជំទាស់នឹងការសម្រេចរបស់សាលាឧទ្ធរណ៍ដែលរក្សាការសម្រេចរបស់សាលាដំបូងរាជធានីភ្នំពេញ ក្នុងការបន្តឃុំខ្លួនឯកឧត្តម កឹម សុខា។ ម្យ៉ាងទៀត សហមេធាវី ក៏មិនអាចទទួលយកបានដែរ ចំពោះសាលាឧទ្ធរណ៍ ដែលធ្វើសេចក្តីសម្រេចខាងលើ តាមរយៈការបើកសវនាការ ដោយមិនមានវត្តមានរបស់ឯកឧត្តម កឹម សុខា។
សវនាការរបស់តុលាការកំពូលនេះ ក៏ប្រព្រឹត្តទៅដោយគ្មានវត្តមាន ជនត្រូវចោទឯកឧត្តម កឹម សុខា ប្រធានគណបក្សសង្គ្រោះជាតិដែរ។
ឯកឧត្តម កឹម សុខា ត្រូវបានសមត្ថកិច្ចចាប់ខ្លួននៅពាក់កណ្តាលអធ្រាត្រ ថ្ងៃទី២ ឈានចូលថ្ងៃទី៣ ខែកញ្ញា ឆ្នាំ២0១៧។ ក្រោយឃាត់ខ្លួន សមត្ថកិច្ច បានបញ្ជូនឯកឧត្តម កឹម សុខា ទៅឃុំបណ្តោះអាសន្ន នៅពន្ធនាគារត្រពាំងផ្លុង ខេត្តត្បូងឃ្មុំ។ តុលាការដំបូងរាជធានីភ្នំពេញ បានសម្រេចចោទប្រកាន់ឯកឧត្តម កឹម សុខា ប្រធានគណបក្សសង្គ្រោះជាតិ ពីបទសន្ទិដ្ឋិភាពជាមួយបរទេស តាមបញ្ញត្តិមាត្រា ៤៤៣ នៃក្រមព្រហ្មទណ្ឌ ដែលបទល្មើសនេះ ស្ថិតនៅក្នុងក្របខណ្ឌនៃអំពើក្បត់ជាតិ៕
© រក្សាសិទ្ធិដោយ thmeythmey.com