ពីនេះ ពីនោះ
ព័ត៍មានសុខភាព
ការហាត់យូហ្គាអាចជួយបន្ថយការប្រឈមនឹងការឈឺចង្កេះរ៉ាំរ៉ៃបាន
× យោងទៅតាមសេចក្តីរាយការណ៍របស់ The Guardian បានឲ្យដឹងថា ការហាត់យូហ្គាប្រហេលជាមានប្រសិទ្ធភាពកាន់តែល្អក្នុងការបំបាត់ការឈឺចាប់នៅចង្កេះជាងការព្យាបាលធម្មតា។ រឿងនេះគឺបានមកពីការសិក្សាមួយដែលបានរកឃើញថា អ្នកឈឺខ្នងចង្កេះគឺមានចលនាកាន់តែល្អឡើងវិញជារៀងរាល់ថ្ងៃនៅពេលដែលពួកគេចូលរួមហាត់យូហ្គាជារៀងរាល់សប្តាហ៍។
ការសិក្សានេះមានការចូលរួមពីអ្នកឈឺចង្កេះរ៉ាំរ៉ៃប្រមាន ៣១៣នាក់ និងបានផ្តល់ឲ្យពួកគេចូលរួមក្នុងកម្មវិធីហាត់យូហ្គាចំនួន ៣ខែ និងមានការថែរក្សាភាពឈឺចាប់នៅខ្នងធម្មតា។ ពួកគេបានបំពេញនូវតារាងកម្រងសំណួរទៅលើកម្រិតនភាពមិនអាចធ្វើចលនាបានរបស់ពួកគេខណៈពេលដែលកំពុងតែឈឺចង្កេះនៅពេលចាប់ផ្តើមនៃការសិក្សា និងនៅពេលហាត់បាន ៣ខែ ៦ខែ និង ១២ខែក្រោយ។ ខណៈពេលដែលមានការប្រែប្រួលតិចតួចទៅលើពិន្ទុនៃភាពមិនអាចធ្វើចលនាលើក្រុមដែលមានការថែរក្សាភាពឈឺចាប់នៅខ្នងធម្មតានោះ តែអ្នកដែលចូលរួមហាត់យូហ្គាបែរជាមានការធូរស្បើយពីការឈឺចង្កេះបានល្អជាងទៅវិញ។
ការព្យាបាលការឈឺចង្កេះរ៉ាំរ៉ៃនាពេលបច្ចុប្បន្ននេះនៅតែតម្រូវឲ្យអ្នកជំងឺរក្សាភាពសកម្មក្នុងការរស់នៅដដែលទេ។ បន្ទាប់មកក៏តម្រូវឲ្យពួកគេចូលរួមក្នុងកម្មវិធីហាត់ប្រាណ ឬព្យាបាលដោយចលនាដដែរបើសិនជាមិនមានភាពធូរស្រាលទេនោះ។ ដូច្នេះការសិក្សានេះក៏មិនខុសគ្នានឹងការតម្រូវឲ្យអ្នកជំងឺហាត់ប្រាណឲ្យបានច្រើនដែរក្នុងពេលសិក្សា។ យ៉ាងណាមិញ ការហាត់យូហ្គាប្រហែលជាមិនស័ក្តិសមបំផុតសម្រាប់មនុស្សគ្រប់គ្នាឡើយ តែស័ក្តិសមច្រើនសម្រាប់អ្នកឈឺចង្កេះ និងខ្នង៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com