បុណ្យអុំទូកនៅសៀមរាបធ្វើដំណាលគ្នានៅរាជធានីភ្នំពេញ

ជាតិ

បុណ្យអុំទូកនៅសៀមរាបធ្វើដំណាលគ្នានៅរាជធានីភ្នំពេញ

31, Oct 2017 , 11:44 am

រូបភាព

ដោយ: អុីសា រ៉ហានី (Isa Rohany)

សៀមរាប៖ ព្រះរាជពិធី បុណ្យ អុំទូក បណ្តែតប្រទីប សំពះព្រះខែ និងអកអំបុក នៅខេត្តសៀមរាប នឹងរៀបចំដំណាលគ្នាទៅនឹងរាជធានីភ្នំពេញ។ ប៉ុន្តែ បុណ្យអុំទូកនៅខេត្តសៀមរាប ធ្វើឡើងតែ២ថ្ងៃប៉ុណ្ណោះ គឺនៅថ្ងៃទី២ និងទី៣ ខែវិច្ឆិកា ឆ្នាំ២០១៧។

ដូចសព្វមួយដង ពិធីបុណ្យអុំទូក តែងរៀបចំធ្វើនៅបណ្តោយស្ទឹងសៀមរាប ចាប់ពីចំណុចស្ពានថ្មព្រះរាជដំណាក់ ឆ្ពោះទៅផ្នែកខាងត្បូងមុខវេទិកាផ្តាច់ព្រ័ត្រ ត្រង់ចំណុចស្ពានថ្ម វត្តព្រះព្រហ្មរតន៍។ តាមរបាយការណ៍របស់គណៈកម្មការទូក នៅឆ្នាំនេះ មានទូកចូលរួមចំនួន ៣០ទូក ដែលមកពីបណ្តាស្រុក និងទូកខ្លះ មកពីខេត្តបន្ទាយមានជ័យក៏មាន។

គេសង្កេតឃើញថា បដាអបអរសាទេ ភ្លើងបំភ្លឺ ស្តង់លក់ទំនិញ និងការតុបតែងផ្សេងៗ ត្រៀមស្វាគមន៍នៃព្រះរាជពិធីបុណ្យអុំទូក បានរៀបចំរួចរាល់ហើយដែរ។ ចំណែកចរាចរណ៍ ហាក់ផ្តើមកកស្ទះនៅចំណុចខ្លះៗក្នុងទីក្រុង ចំណែកកម្លាំងចម្រុះ ក៏ចាប់ផ្តើមពង្រាយនៅគោលដៅរៀងៗខ្លួន ជាបណ្តើរៗហើយដែរ។

ស្នងការរងខេត្តសៀមរាប ទទួលបន្ទុកផ្នែកសេនាធិការ លោក កាន់ សម្បត្តិ បានប្រាប់សារព័ត៌មានថ្មីៗនៅព្រឹកថ្ងៃទី៣១ តុលាថា កម្លាំងចម្រុះដែលត្រៀមការពារសន្តិសុខក្នុងពិធីបុណ្យអុំទុកឆ្នាំនេះ មានចំនួន ៧២៧នាក់ ដែលរួមមាន កងរាជអាវុធហត្ថ សឹករង និងប៉ូលិស។ កម្លាំងទាំងអស់ នឹងប្រចាំការត្រង់គោលដៅរៀងៗខ្លួនចាប់ពីថ្ងៃទី១ ដល់ថ្ងៃទី៥ វិច្ឆិកា។ នេះជាការបញ្ជាក់របស់លោក កាន់ សម្បត្តិ។

គួររម្លឹកថា យោងតាមរបាយការណ៍របស់មន្ទីរទេសចរណ៍ខេត្តសៀមរាប បុណ្យអុំទូក កាលពីឆ្នាំ២០១៦ បានទាក់ទាញទេសចរសរុប ជាង ២សែននាក់ ក្នុងនោះ ទេសចរបរទេស មានជាង ៣ម៉ឺននាក់៕