ជាតិ
សេដ្ឋកិច្ច
លោក ថោង ខុន៖ ពិភពលោក ក៏ដូចកម្ពុជាដែរ កំពុងខំស្រូបយកទេសចរចិន
× ភ្នំពេញ៖ រដ្ឋមន្ត្រីក្រសួងទេសចរណ៍ លោក ថោង ខុន បានថ្លែងថា មិនមែនតែកម្ពុជានោះទេ តែពិភពលោកទាំងមូល កំពុងព្យាយាមទាក់ទាញភ្ញៀវទេសចរណ៍ចិនឲ្យចូលមកប្រទេសរបស់គេរៀងៗខ្លួន។ លោក ថោង ខុន ថ្លែងបែបនេះនៅក្នុងវេទិកាលើកទី២ស្ដីពីទីផ្សារទេសចរណ៍ចិន និងការត្រៀមលក្ខណៈសម្បត្តិទទួលភ្ញៀវទេសចរចិន (China Ready) នៅថ្ងៃទី២ខែតុលា។
ក្នុងឆ្នាំ២០១៦ ទេសចរចិនធ្វើដំណើរទៅក្រៅប្រទេសចំនួន ១២២លាននាក់ កើនឡើង ៤,៣ភាគរយ ដោយចំណាយប្រមាណ ២៦១ពាន់លានដុល្លារ។ ហើយនៅឆ្នាំ២០២០ អង្គការទេសចរណ៍ពិភពលោក (UNWTO) បានព្យាករថា ទេសចរចិនទៅក្រៅប្រទេសនឹងកើនដល់ ២០០លាននាក់ ជាមួយទំហំចំណាយ ៤២០ពាន់លានដុល្លារ។ នេះបើតាមតួលេខដែលថ្លែងដោយលោក ថោង ខុន ។
កម្ពុជាកំពុងត្រៀមខ្លួនស្រូបយកភ្ញៀវទេសចរចិន ដូចបណ្ដាប្រទេសដទៃទៀតដែរ។ រដ្ឋាភិបាលបានកំណត់ទិសដៅទាក់ទាញទេសចរចិនចំនួន ២លាននាក់នៅឆ្នាំ២០២០ ខាងមុខ តាមរយៈការដាក់ចេញផែនការយុទ្ធសាស្ត្រ «China Ready» ។ ចំនួននេះ គឺស្មើនឹង ១ភាគរយនៃចំនួនទេសចរចិនទៅក្រៅប្រទេសឆ្នាំ២០២០ ។ នៅឆ្នាំ២០១៧នេះ កម្ពុជារំពឹងទាក់ទាញទេសចរចិនចំនួន ១លាននាក់ ដោយឈរលើមូលដា្ឋនកំណើនកាលពីឆ្នាំ២០១៦ ដែលមានទេសចរចិន ៨៣ម៉ឺននាក់ (មិនរាប់បញ្ចូលចិនហុងកុង ម៉ាកាវ និងតៃវ៉ាន់) កើនឡើង ២០ភាគរយ។ ដោយឡែក ក្នុងរយៈពេល៨ខែឆ្នាំនេះ កម្ពុជាទទួលបានភ្ញៀវទេសចិន ៧៤ម៉ឺននាក់ កើនឡើងជាង ៤៤ភាគរយ ដោយទេសចរចិនឈរនៅលំដាប់ទី១។
UNWTO បានផ្ដល់អនុសាសន៍ដល់ប្រទេសសមាជិកខ្លួន ឲ្យត្រៀមទទួលស្វាគមន៍ភ្ញៀវទេសចរចិន។ និន្នាការនេះ ត្រូវបានលោក ថោង ខុន លើកឡើងថាគឺស្របនឹងយុទ្ធសាស្ត្រ ខ្សែក្រវាត់មួយ វិថីមួយ របស់រដ្ឋាភិបាលចិន។ លោកឲ្យដឹងដូច្នេះទៀតថា៖«បើយើងមិនទទួលទីផ្សារទេសចរចិន គឺយើងថយក្រោយហើយ ព្រោះពិភពលោកទៅអស់ហើយ»។
ក្រៅពីសម្រួលការធ្វើដំណើរ ការផ្ដល់សេវាប្រកបដោយគុណភាព ដែលរួមបញ្ចូលទាំងផ្នែកភាសាជាដើម លោក ថោង ខុន បានជំរុញឲ្យមានការគិតគូរដល់ផលិតផលទេសចរណ៍។ រដ្ឋមន្ត្រីក្រសួងទេសចរណ៍រូបនេះ មានប្រសាសន៍ដូចនេះថា៖«ដើម្បីឲ្យទេសចរចិនមកច្រើន ទាល់តែមានផលិតផលទេសចរណ៍។ មិនមែនចិនមកកម្សាន្តតែនៅអង្គរវត្តទេ តែត្រូវបង្កើតផលិតផលទេសចរណ៍នៅតំបន់ផ្សេងទៀត ដូចជានៅតំបន់មាត់សមុទ្រ ភ្នំពេញ អេកូទេសចរណ៍ បឹងទន្លេសាប ទន្លេមេគង្គ»។ ត្រូវស្គាល់ទីផ្សារនេះឲ្យច្បាស់ ដើម្បីបង្កើតផលិតផលទេសចរណ៍»៕
© រក្សាសិទ្ធិដោយ thmeythmey.com