ជាតិ
បក្ស៩ ត្រូវបានតុលាការកំពូល រំលាយចោល តាមសំណើរបស់ក្រសួងមហាផ្ទៃ
× ភ្នំពេញ៖ តុលាការកំពូល បានប្រកាសសាលដីកា ដោយសម្រេចរំលាយគណបក្សនយោបាយចំនួន៩ នៅថ្ងៃទី៣0 ខែតុលា ឆ្នាំ២0១៧។ នេះបើតាមលោក នៅ មុនីជោត អ្នកនាំពាក្យតុលាការកំពូល ដែលបានប្រាប់សារព័តមានថ្មីៗ។
ក្រសួងមហាផ្ទៃ ជាដើមបណ្តឹង ដែលប្តឹងទៅតុលាការកំពូល ដើម្បីសុំឲ្យរំលាយគណបក្សទាំងនោះ។ ក្នុងចំណោមគណបក្សទាំង៩ មានគណបក្សខ្លះ មិនបានផ្ញើរបាយការណ៍ប្រចាំឆ្នាំ ទៅកាន់ក្រសួងមហាផ្ទៃឡើយ ដែលជាទង្វើខុសទៅនឹងច្បាប់ស្តីពីគណបក្សនយោបាយ ហើយគណបក្សខ្លះទៀត បានជាប់បណ្តឹងនៅតុលាការរាជធានីភ្នំពេញ។ នេះជាមូលហេតុ ដែលក្រសួងមហាផ្ទៃ បានប្រាប់ទៅតុលាការកំពូល ដើម្បីសុំឲ្យរំលាយគណបក្សទាំងនោះចោល។
គណបក្សទាំង៩ ដែលត្រូវបានតុលាការកំពូល រំលាយចោលនោះ រួមមាន គណបក្សប្រជាជាតិខ្មែរ គណបក្សពលរដ្ឋខ្មែរ គណបក្សសង្គមខ្មែរនិយម គណបក្សសង្គមថ្មី គណបក្សខ្មែរជាតិនិយម គណបក្សនាងនាគនារីខ្មែរ គណបក្សពន្លឺសេរីភាពលោក ថាច់ រ៉េង គណបក្សស្ត្រីសង្គ្រោះកម្ពុជា និងគណបក្សសេរីបង្រួបបង្រួមជាតិ។
គណបក្សសង្គ្រោះជាតិ ដែលជាគណបក្សប្រឆាំងធំជាងគេនៅកម្ពុជា និងជាគូប្រកួតរបស់គណបក្សប្រជាជនកម្ពុជា ដែលកំពុងកាន់អំណាច ក៏ត្រូវបានក្រសួងមហាផ្ទៃ ប្តឹងទៅកាន់តុលាការកំពូល ដើម្បីសុំឲ្យរំលាយចោលផងដែរ។ សម្រាប់ក្រសួងមហាផ្ទៃ គណបក្សសង្គ្រោះជាតិ អាចជាប់ពាក់ព័ន្ធជាមួយឯកឧត្តម កឹម សុខា ដែលកំពុងជាប់ឃុំក្នុងពន្ធនាគារ ក្រោមការសង្ស័យថាបានប្រព្រឹត្តអំពើក្បត់ជាតិ។
តុលាការកំពូល បានកំណត់កាលបរិច្ឆេទរួចហើយថានឹងបើកសវនាការ នៅថ្ងៃទី១៦ ខែវិច្ឆិកា ឆ្នាំ២0១៧ ដើម្បីជំនុំជម្រះលើបណ្តឹងរបស់ក្រសួងមហាផ្ទៃ ដែលសុំឲ្យរំលាយគណបក្សសង្គ្រោះជាតិ៕
Tag:
តុលាការ
រំលាយគណបក្ស
© រក្សាសិទ្ធិដោយ thmeythmey.com