តារាភាពយន្តហ្វីលីពីន ម៉ារីម៉ា នឹងនាំស្វាមីទៅជួបសម្តេច ហ៊ុន សែន ក្នុងកិច្ចប្រជុំអាស៊ាន

ជាតិ

តារាភាពយន្តហ្វីលីពីន ម៉ារីម៉ា នឹងនាំស្វាមីទៅជួបសម្តេច ហ៊ុន សែន ក្នុងកិច្ចប្រជុំអាស៊ាន

10, Nov 2017 , 9:38 am

រូបភាព

ដោយ: ថ្មីៗ

តាមការអញ្ជើញរបស់សម្តេចនាយករដ្ឋមន្ត្រី ហ៊ុន សែន តារាភាពយន្តហ្វីលីពីន Marian Rivera ដែលពលរដ្ឋខ្មែរនិយមហៅថា «ម៉ារីម៉ា» ជាមួយស្វាមីខ្លួន លោក Dingdon Dantes នឹងបង្ហាញវត្តមាននាកិច្ចប្រជុំអាស៊ាននៅទីក្រុងម៉ានីល នាថ្ងៃទី១១ ខែវិច្ឆិកា ស្អែកនេះ ។ នេះបើតាមការផ្សាយរបស់សារព័ត៌មាន Rappler របស់ហ្វីលីពីន។

នាពិធីបើកដំណើរការហាងលក់ផលិតផលសិប្បកម្មហ្វីលីពីន Kultura តារាភាពយន្ត Marian Rivera ឬ នាង ម៉ារីម៉ា បានអះអាងប្រាប់សារព័ត៌មានថា នាងមានការភ្ញាក់ផ្អើលយ៉ាងខ្លាំង ដោយទទួលបានលិខិតអញ្ជើញឲ្យចូលរួមក្នុងកិច្ចប្រជុំដ៏ធំបែបនេះ។

«គេប្រាប់ខ្ញុំថា នាយករដ្ឋមន្ត្រីកម្ពុជាចង់ជួបខ្ញុំ ដូច្នេះខ្ញុំនឹងទៅកាន់ទីនេះ ពីព្រោះរឿងដែលខ្ញុំសំដែងកំពុងចាក់បញ្ចាំងនៅក្នុងប្រទេសរបស់គាត់»។ នេះបើតាមសម្តីដែលដកស្រង់ដោយ Rappler។

ទោះបីជាមានអារម្មណ៍អៀនខ្លួនក្នុងការចូលរួមព្រឹត្តិការណ៍កំពូលប្រចាំតំបន់ក៏ដោយ ប៉ុន្តែនាង ម៉ារីម៉ា និងលោក Dingdong Dantes ដែលជាស្វាមីនឹងទៅជួបសម្តេចនាយករដ្ឋមន្ត្រី ហ៊ុន សែន នៅថ្ងៃសៅរ៍ស្អែកនេះ៕