សម្ដេច ហ៊ុន សែន អំពាវនាវឲ្យAPEC ទទួលយកកម្ពុជា ឡាវ និងមីយ៉ាន់ម៉ា ជាសមាជិកផ្លូវការ

ជាតិ

សម្ដេច ហ៊ុន សែន អំពាវនាវឲ្យAPEC ទទួលយកកម្ពុជា ឡាវ និងមីយ៉ាន់ម៉ា ជាសមាជិកផ្លូវការ

10, Nov 2017 , 10:45 am

រូបភាព

ដោយ: ថ្មីៗ

ភ្នំពេញ៖ សម្ដេចនាយករដ្ឋមន្ត្រី ហ៊ុន សែន អំពាវនាវឲ្យកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក(APEC) ទទួលយកកម្ពុជា ឡាវ និងមីយ៉ាន់ម៉ា ជាសមាជិកពេញសិទ្ធិ ។ ការអំពាវនាវរបស់ប្រមុខរដ្ឋាភិបាលនេះ ធ្វើឡើងស្របពេលដែលប្រទេសទាំង៣ កំពុងស្ថិតនៅត្រឹមជាសមាជិកសង្កេតការណ៍របស់ APECប៉ុណ្ណោះ។

សម្ដេច ហ៊ុន សែន បាននិយាយថា មូលហេតុដែល APEC មិនទាន់ទទួលយកកម្ពុជា ឡាវ និងមីយ៉ាន់ម៉ា ជាសមាជិកពេញសិទ្ធិ ដោយសារតែមានប្រទេសជាច្រើន កំពុងដាក់សំណើរចូលជាសមាជិកដែរ ទើប APEC បង្កក់ការទទួលស្គាល់ប្រទេសទាំង៣ផ្លូវការនេះ។ ថ្លែងក្នុងពិធីជួបសំណេះសំណាលជាមួយយុវជនអាស៊ាន និងជប៉ុន នៅវិមានសន្តិភាព នាថ្ងៃទី១០ វិច្ឆិកានេះ សម្ដេច ហ៊ុន សែន ចង់ឲ្យ កិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក(APEC) និងអាស៊ាន មានប្រទេសទាំង១០ផ្លូវការពេញលេញ ចូលរួមប្រជុំ។

ក្រោយបញ្ចប់ការជួបសំណេះសំណាលនេះ សម្តេចនាយករដ្ឋមន្ត្រី ហ៊ុន សែន នឹងដឹកនាំប្រតិភូចូលរួម «កិច្ចសន្ទនាក្រៅផ្លូវការរវាងថ្នាក់ដឹកនាំ នៃកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក(APEC) និងអាស៊ាន» នៅទីក្រុងដាណាំង ប្រទេសវៀតណាម តាមការអញ្ជើញ របស់ លោក ត្រាន ដាយ ក្វាង ប្រធានរដ្ឋនៃសាធារណរដ្ឋសង្គមនិយមវៀតណាម។ ថ្នាក់ដឹកនាំ នៃកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក(APEC) និងអាស៊ាន» នឹងប្រជុំផ្តោតលើមូលបទ«ការចូលរួមជាដៃគូដើម្បីថាមភាពថ្មីសម្រាប់សមាហណកម្ម និងការតភ្ជាប់គ្រប់ជ្រុងជ្រោយនៃតំបន់អាស៊ី-ប៉ាស៊ីហ្វិក»៕