ឆែក ចង់មានកិច្ចសហប្រតិបត្តិការជាមួយកម្ពុជា លើការគ្រប់គ្រងទឹកស្អុយ ធនធានរ៉ែ និងថាមពល និងការការពារជាតិ

ជាតិ

ឆែក ចង់មានកិច្ចសហប្រតិបត្តិការជាមួយកម្ពុជា លើការគ្រប់គ្រងទឹកស្អុយ ធនធានរ៉ែ និងថាមពល និងការការពារជាតិ

10, Nov 2017 , 7:19 pm

រូបភាព

ដោយ:

ភ្នំពេញ៖ សាធារណរដ្ឋឆែក ចង់បង្កើតឲ្យមានកិច្ចសហប្រតិបត្តិការ លើផ្នែកគ្រប់គ្រងទឹកស្អុយ ថាមពលពន្លឺព្រះអាទិត្យ ធនធានរ៉ែ និងបច្ចេកវិទ្យាការពារជាតិ ជាមួយកម្ពុជានាអនាគត។ តាមក្រសួងការបរទេសកម្ពុជា សាធារណៈរដ្ឋឆែក គ្រោងបញ្ជូនគណៈប្រតិភូនៃសភាពាណិជ្ជកម្មរបស់ខ្លួនមកកម្ពុជា ដើម្បីពិភាក្សាជាមួយសភាពាណិជ្ជកម្មកម្ពុជា លើគម្រោងសហប្រតិបត្តិការខាងលើនេះ នៅឆ្នាំ២០១៩ខាងមុខ។

លោក ប្រាក់ សុខុន រដ្ឋមន្ត្រីការបរទេសកម្ពុជា បានជួបពិភាក្សាការងារ ជាមួយលោកTomas Kuchta អនុរដ្ឋមន្ត្រីការពារប្រទេស នៃសាធារណរដ្ឋឆែក និងប្រតិភូដទៃទៀត កាលពីថ្ងៃទី៨ ខែវិច្ឆិកា។ តាមសេចក្តីប្រកាសព័ត៌មានរបស់ក្រសួងការបរទេសកម្ពុជា ដំណើរទស្សនកិច្ចរបស់ប្រតិភូសាធារណរដ្ឋឆែកនៅកម្ពុជានេះ គឺដើម្បីពង្រឹងបន្ថែមទៀតភាពជាដៃគូរវាងប្រទេសទាំង២ និងពិភាក្សាស្វែងរកវិធីដើម្បីលើកស្ទួយបន្ថែមទៀត នូវទំនាក់ទំនង និងកិច្ចសហប្រតិបត្តិការ និងការផ្លាស់ប្តូរពាណិជ្ជកម្មរវាងកម្ពុជា និងសាធារណរដ្ឋឆែក។

ក្នុងជំនួបនេះ អនុរដ្ឋមន្ត្រីការពារជាតិឆែក ក៏ថ្លែងពីបំណងរបស់ប្រទេសឆែក ក្នុងការបង្កើតឲ្យមានកិច្ចសហប្រតិបត្តិការលើផ្នែកគ្រប់គ្រងទឹកស្អុយ (waste water management) ថាមពលពន្លឺព្រះអាទិត្យ ធនធានរ៉ែ និងបច្ចេកវិទ្យាការពារជាតិ ជាមួយកម្ពុជាក្នុងពេលអនាគត។

លោករដ្ឋមន្ត្រីក្រសួងការបរទេសកម្ពុជា បានស្វាគមន៍ចំពោះគំនិតផ្ដើមនេះ។ នេះបើតាមក្រសួងការបរទេសកម្ពុជា រួចបន្តថា កម្ពុជា គឺជាប្រទេសដៃគូយុទ្ធិសាស្ត្រកិច្ចសហប្រតិបត្តិការអភិវឌ្ឍន៍មួយ ក្នុងចំណោម៦ របស់ប្រទេសឆែកសម្រាប់ឆ្នាំ២០១៨ ដល់ឆ្នាំ២០២០។ នៅឆ្នាំ២០១៩ខាងមុខ សាធារណៈរដ្ឋឆែក ក៏មានគម្រោងបញ្ជូនគណៈប្រតិភូ នៃសភាពាណិជ្ជកម្មរបស់ខ្លួនមកកម្ពុជា ដើម្បីពិភាក្សាជាមួយសភាពាណិជ្ជកម្មកម្ពុជាលើគម្រោងសហប្រតិបត្តិការខាងលើនេះ។

សូមបញ្ជាក់ថា ការផ្លាស់ប្ដូពាណិជ្ជកម្មរវាង កម្ពុជា និងសាធារណរដ្ឋឆែក នៅឆ្នាំ២០១៤ មានទំហំ ២៨លានដុល្លារ និង១៧០លានដុល្លារ នៅឆ្នាំ២០១៦៕