ពលរដ្ឋជាង ១លាននាក់ ត្រូវបាត់បង់សិទ្ធិបោះឆ្នោត នៅឆ្នាំ២០១៨

ជាតិ

ពលរដ្ឋជាង ១លាននាក់ ត្រូវបាត់បង់សិទ្ធិបោះឆ្នោត នៅឆ្នាំ២០១៨

10, Nov 2017 , 9:19 pm

រូបភាព

ដោយ: ថ្មីៗ

ភ្នំពេញ៖ ការចុះឈ្មោះបោះឆ្នោតថ្មី ត្រូវបានបិទបញ្ចប់ហើយ នៅថ្ងៃទី៩ ខែកញ្ញា ឆ្នាំ២០១៧ ដោយបន្សល់ទុកនូវប្រជាពលរដ្ឋប្រមាណ ១.១ លាននាក់ ដែលមិនបានទៅចុះឈ្មោះបោះឆ្នោត។ រយៈពេល៧០ថ្ងៃ ដែលបានចាប់ផ្តើមពីថ្ងៃទី១ ខែកញ្ញា ឆ្នាំ២០១៧មក មានប្រជាពលរដ្ឋ តែជាង ៥សែននាក់ប៉ុណ្ណោះ ដែលបានទៅចុះឈ្មោះបោះឆ្នោត។ នេះបើតាមគណៈកម្មាធិការជាតិរៀបចំការបោះឆ្នោត (គ.ជ.ប)។

ប្រជាពលរដ្ឋប្រមាណ ១.១លាននាក់ ដែលមិនបានចុះឈ្មោះបោះឆ្នោត នឹងមិនមានសិទ្ធិដើម្បីចូលរួមបោះឆ្នោតជ្រើសតាំងតំណាងរាស្ត្រ នីតិកាលទី៦ ក្នុងឆ្នាំ២០១៨ នោះទេ។ លោក ហង្ស ពុទ្ធា អ្នកនាំពាក្យគ.ជ.ប បានលើកឡើងកាលពីពេលថ្មីៗនេះថា គ.ជ.ប មិនពន្យារពេល ឬបន្ថែមថ្ងៃសម្រាប់ការចុះឈ្មោះបោះឆ្នោតឡើយ។ លោកបញ្ជាក់ថា ប្រជាពលរដ្ឋប្រមាណ ១.១លាននាក់នោះ ភាគច្រើនជាអ្នកចំណាកស្រុក ដែលកំពុងធ្វើការនិងរស់នៅឯក្រៅប្រទេស។

កាលពីឆ្នាំ២០១៦ ប្រជាពលរដ្ឋជិត ៨លាននាក់ បានទៅចុះឈ្មោះបោះឆ្នោត។ ប្រជាពលរដ្ឋទាំងនោះ ត្រូវមានឈ្មោះក្នុងបញ្ជីដោយស្វ័យប្រវត្តិ ហើយអាចទៅចូលរួមបោះឆ្នោតក្នុងឆ្នាំ២0១៨តែម្តង ដោយមិនចាំបាច់ចុះឈ្មោះសាជាថ្មីទេ។

បើបូកបញ្ជូលប្រជាពលរដ្ឋ ដែលបានចុះឈ្មោះក្នុងឆ្នាំ២០១៦ (ចំនួនចាស់) ជាមួយប្រជាពលរដ្ឋ ដែលទើបនឹងបានចុះឈ្មោះក្នុង២០១៧ (ចំនួនថ្មី) ប្រជាពលរដ្ឋសរុបទាំងអស់ គឺមានជាង ៨.៣ លាននាក់ ដែលមានឈ្មោះក្នុងបញ្ជីបោះឆ្នោតបច្ចុប្បន្ន។ ប្រជាពលរដ្ឋជាង ៨.៣លាននាក់នេះ នឹងត្រូវមានសិទ្ធិបោះឆ្នោតក្នុងឆ្នាំ២០១៨៕