ជាតិ
កំណើនសត្វផ្សោតចំនួន៩ក្បាល ក្នុងឆ្នាំ២០១៧ រូបភាពពីហ្វេសប៊ុកអង្គការ WWF-Cambodia
× ខេត្តក្រចេះ៖ គិតត្រឹមរយៈពេល១០ខែ ក្នុងឆ្នាំ២០១៧នេះ មានសត្វផ្សោតចំនួន៩ក្បាល ដែលទើបតែកើតនៅក្នុងប្រទេសកម្ពុជា ។ អង្គការមូលនិធិសកលសម្រាប់អភិរក្សធនធានធម្មជាតិ (WWF) ចាត់ទុកកំណើនសត្វផ្សោតនេះ គឺជាជោគជ័យមួយរបស់ប្រទេសកម្ពុជា ក្នុងការអភិរក្សសត្វផ្សោត។
អង្គការWWF បានបង្ហាញរបាយការណ៍ថា រយៈពេល១០ខែនេះ មានសត្វផ្សោតចំនួន៩ក្បាលបានកើត និងមានសត្វផ្សោតតែ២ប៉ុណ្ណោះដែលបានស្លាប់។ អង្គការWWF ចាត់ទុកលទ្ធផលនេះ គឺជាសញ្ញាវិជ្ជមានមួយ ក្នុងការថែរក្សាសត្វផ្សោតទន្លេមេគង្គ បើធៀបរយៈពេលដូចគ្នាក្នុងឆ្នាំ២០១៦ ដែលមានសត្វផ្សោតកើតចំនួន១១ក្បាល ហើយមានសត្វផ្សោតស្លាប់៦ក្បាល។ អង្គការWWF បានលើកឡើងថា ៖«ចំនួននៃកំណើតសត្វផ្សោតទន្លេថ្មីនៅឆ្នាំនេះ ត្រូវបានផ្ដល់ក្ដីសង្ឃឹមថា ចំនួនសត្វផ្សោតនឹងមានការកើនឡើងនៅថ្ងៃអនាគត»។
ជាមួយគ្នានេះអគ្គនាយកនៃរដ្ឋបាលជលផលរបស់ក្រសួងកសិកម្ម រុក្ខាប្រម៉ាញ់និងនេសាទលោក អេង ជាសាន បាននិយាយថា លទ្ធផលល្អនេះ ដោយសារតែមានការប្ដេជ្ញាចិត្តពីគ្រប់ភាគីទាំងអស់ ក្នុងការអភិរក្សសត្វផ្សោត ។ ជាពិសេសការសហការពីប្រជាពលរដ្ឋ។ លោក អេង ជាសាន បានបញ្ជាក់ដូច្នេះថា៖«យើងក៏យល់ដឹងថាការអភិវឌ្ឍន៍សេដ្ឋកិច្ច ក៏ជាការចាំបាច់ក្នុងការលើកកម្ពស់ជីវៈភាពប្រជាពលរដ្ឋ និងជួយដល់សហគមន៍នេសាទ និងសហគមន៍ព្រៃឈើ ដែលសហគមន៍ក្នុងតំបន់ទាំងនោះអាចត្រូវបានលើកកម្ពស់ដោយចូលរួមក្នុងការការពារធនធានធម្មជាតិផងដែរ»។
ការការពារសត្វផ្សោត ជម្រកត្រីពងកូន និងជីវចម្រុះជាច្រើនទៀត គឺជាកត្តាចាំបាច់ក្នុងការយកចិត្តទុកដាក់ពីសំណាក់ប្រជាពលរដ្ឋ និងអាជ្ញាធរពាក់ព័ន្ធ ដើម្បីឲ្យធនធានធម្មជាតិក្នុងសហគមន៍មូលដ្ឋានមាននិរន្តភាព។នេះបើនាយកអង្គការ WWF លោក សេង ទៀក។
លោក សេង ទៀក បានបញ្ជាក់ដូច្នេះថា៖«ការអភិរក្សសត្វផ្សោតទន្លេមេគង្គដែលជារតនៈសម្បត្តិជាតិ មានជីវិត គឺផ្ដល់អត្ថប្រយោជយូរអង្វែងដល់យើងគ្រប់គ្នា តាមរយៈវិស័យទេសចរណ៍ធម្មជាតិ»។
សូមបញ្ជាក់ថា សត្វផ្សោតទន្លេមេគង្គ ត្រូវបានគេប៉ាន់ប្រមាណថានៅសល់តែ៨០ក្បាលប៉ុណ្ណោះ បើប្រៀបធៀបកាលពី១០ទសវត្សរ៍មុន ដែលមានសត្វផ្សោតប្រហែល ៣,០០០ក្បាល រស់នៅតាមទន្លេមេគង្គនិងទន្លេសាប៕
Tag:
សត្វផ្សោត
កម្ពុជា
ទិវាសត្វផ្សោតអន្តរជាតិ
© រក្សាសិទ្ធិដោយ thmeythmey.com