កម្ពុជា និងវៀតណាម ប្ដេជ្ញាបោះបង្គោលព្រំដែនឲ្យចប់ ត្រឹមឆ្នាំ២០១៨

ជាតិ

នយោបាយជាតិ

កម្ពុជា និងវៀតណាម ប្ដេជ្ញាបោះបង្គោលព្រំដែនឲ្យចប់ ត្រឹមឆ្នាំ២០១៨

11, Nov 2017 , 10:56 am

រូបភាព

រូបពីហ្វេសប៊ុកសម្ដេច ហ៊ុន សែន

ដោយ: រំដួល ចិត្រា (Romdoul Chetra)

ភ្នំពេញ៖ កម្ពុជា និងវៀតណាម ប្ដេជ្ញាបោះបង្គោលព្រំដែនឲ្យចប់ ត្រឹមឆ្នាំ២០១៨ខាងមុខ ដើម្បីរក្សា សន្តិភាព និងស្ថេរភាព នៅតំបន់ព្រំដែនរវាងប្រទេសទាំងពីរ។ សម្ដេចនាយករដ្ឋមន្ត្រី ហ៊ុន សែន ជួបពិភាក្សាជាមួយនាយករដ្ឋមន្ត្រីវៀតណាម លោក ង្វៀន សួនហ្វុក នៅក្នុងកិច្ចសន្ទនាក្រៅផ្លូវការរវាងមេដឹកនាំអាស៊ាន ជាមួយមេដឹកនាំ APEC ឆ្នាំ២០១៧។

ថ្លែងនៅក្នុងជំនួបពិភាក្សាគ្នានោះ ប្រមុខរដ្ឋាភិបាលទាំងពីរ បានសន្យារួមគ្នាថា នឹងខិតខំជំរុញគណៈកម្មាធិការព្រំដែន បោះបង្គោលព្រំដែនគោកឲ្យហើយរួចរាល់ នៅក្នុងរដូវប្រាំងឆ្នាំ២០១៨ខាងមុខ ដើម្បីធ្វើយ៉ាងណាប្រែក្លាយតំបន់ព្រំដែននៃប្រទេសទាំងពីរ ឲ្យមានសន្តិភាព ស្ថេរភាព និងការអភិវឌ្ឍ។ ជាពិសេសការផ្លាស់ប្តូរទំនិញ ពាណិជ្ជកម្ម ទេសចរណ៍ និងការធ្វើដំណើរឆ្លងដែនទៅមករបស់ប្រជាជននៃប្រទេសទាំងពីរ ក៏ដូចជាភ្ញៀវទេសចរណ៍ ដោយគ្មានការភ័យខ្លាច។

ក្រៅពីនេះមេដឹកនាំរដ្ឋាភិបាលកម្ពុជា -វៀតណាម ក៏បានប្ដេជ្ញាជំរុញទំនាក់ទំនង និងកិច្ចសហប្រតិបត្តិការនៃប្រទេសទាំងពីរឲ្យកាន់តែរឹងមាំទ្វេរឡើង ដើម្បីបងកើនទំហំពាណិជ្ជកម្មឲ្យកាន់តែខ្ពស់ថែមទៀត។ នេះបើតាមហ្វេសប៊ុកសម្ដេចនាយករដ្ឋមន្ត្រី ហ៊ុន សែន។

កន្លងមកកម្ពុជា-វៀតណាម បានស្នើទៅបារាំងដើម្បីផ្ដល់ជំនួយបច្ចេកទេស និងជួយផ្ទេរផែនទីពីខ្នាត១លើ១០០ពាន់ មកខ្នាត១លើ៥០ពាន់វិញ គឺដើម្បីងាយស្រួលក្នុងការកំណត់ការបោះបង្គោលព្រំដែន ដែលនៅមានភាពចម្រូងចម្រាសគ្នា។

គួរបញ្ជាក់ថា កម្ពុជា-វៀតណាម បានព្រមព្រៀងគ្នាបោះបង្គោលព្រំដែន កាលពីឆ្នាំ២០០៦មក ក្នុងបណ្តោយព្រំដែនរវាងប្រទេសទាំងពីរប្រវែង១២៧០គីឡូម៉ែត្រ ដោយកំណត់បោះបង្គោលព្រំដែនចំនួន៣៧៥បង្គោល។ មកដល់ពេលនេះកម្ពុជា-វៀតណាម បានបោះបង្គោលព្រំដែន ចំនួន៨៣ភាគរយហើយ។នេះបើតាមរបាយការណ៍គណៈកម្មាធិការព្រំដែនកម្ពុជា៕