ជាតិ
អ្នកសារព័ត៌មានថ្មីៗ កំពុងចូលរួមយកព័ត៌មានស្តីពីការប្រែប្រួលអាកាសធាតុនៅអាល្លឺម៉ង់
× ស្ថាប័នអន្តរជាតិ Internews បានជ្រើសរើសអ្នកសារព័ត៌មាន ១៤រូបឲ្យទៅចូលរួមយកព័ត៌មាននៅក្នុងសន្និសីទស្តីពីការប្រែប្រួលអាកាសធាតុលើកទី ២៣ (COP23) នៅក្នុងទីក្រុង Bonne ប្រទេសអាល្លឺម៉ង់ពីថ្ងៃ ១០ ដល់ថ្ងៃ ១៨ ខែវិច្ឆិកា។ អ្នកសារព័ត៌មានថ្មីៗស្ថិតក្នុងចំណោមអ្នកសារព័ត៌មានទាំង ១៤រូបដែលត្រូវដំណើរយកព័ត៌មានក្នុងកិច្ចចរចាអន្តរជាតិពាក់ព័ន្ធការប្រែប្រួលអាកាសធាតុដែរ។
កម្មវិធីភាពជាដៃគូប្រព័ន្ធផ្សព្វផ្សាយស្តីពីប្រែប្រួលអាកាសធាតុ (CCMP) ដែលបង្កើតឡើងដោយស្ថាប័ន Internews បាននាំយកអ្នកសារព័ត៌មានចំនួន ១៤ រូបពីទូទាំងពិភពលោកឲ្យចូលរួមក្នុងបេសកកម្មយកព័ត៌មាននាកិច្ចប្រជុំកំពូលស្តីពីការប្រែប្រួលអាកាសធាតុនាក្រុង Bonn ប្រទេសអាល្លឺម៉ង់។
ដំណើរទស្សនកិច្ចយកព័ត៌មាននេះចាប់ផ្តើមពីថ្ងៃ ១០ ខែវិច្ឆិកាដល់ថ្ងៃ ១២ ខែវិច្ឆិកា ដោយអ្នកសារព័ត៌មានទាំងអស់ត្រូវចូលរូមក្នុងសកម្មភាពយកព័ត៌មានជុំវិញការចរចាដែលមានតំណាងប្រទេសជាង ១៩០ ចូលរួមនោះ។ លោក សៅ ផលនិស្ស័យ និពន្ធនាយករងសារព័ត៌មានថ្មីៗ ទទួលបន្ទុកព័ត៌មានអន្តរជាតិក៏ស្ថិតក្នុងចំណោមអ្នកសារព័ត៌មានទាំង ១៤ រូបដែលត្រូវបានគេជ្រើសរើសផងដែរ។
អ្នកសារព័ត៌មានទាំង ១៣ រូបផ្សេងទៀតមានមកពីប្រទេសម៉ាឡេស៊ី, វៀតណាម, ប៉ាគីស្ថាន,ហ្វីជី, ម៉ាឡាវី, កេនយ៉ា, អ៊ូហ្កង់ដា, ហ្កាណា, ប្រេស៊ីល, ប៊ុលការី, កូឡុំប៊ី, សូឡូមុន និងកោះសាម៉ូ(Samoa) ។
សូមបញ្ជាក់ថា សន្និសីទអង្គការសហប្រជាជាតិស្តីពីការប្រែប្រួលអាកាសធាតុលើកទី ២៣ ចាប់ផ្តើមឡើងនៅទីក្រុង Bonne ប្រទេសអាល្លឺម៉ង់ ចាប់ពីថ្ងៃចន្ទទី ៦ ខែកញ្ញា និងបិទបញ្ចប់ទៅវិញនៅថ្ងៃ ១៧ ខែវិច្ឆិកាខាងមុខដោយមានប្រទេសហ្វីជីជាប្រធាន។ ប្រតិភូតំណាងរដ្ឋាភិបាល អង្គការអន្តរជាតិ ប្រព័ន្ធផ្សព្វផ្សាយ និងអង្គការសង្គមស៊ីវិល ២៥០០០នាក់ចូលរួមនៅក្នុងសន្និសីទកំពូលនេះ។ កិច្ចចរចារយៈពេលពីរសប្តាហ៍នេះផ្តោតសំខាន់លើការកំណត់បទបញ្ញត្តិដែលធានាការអនុវត្តពេញលេញនូវកិច្ចព្រមព្រៀងប្រែប្រួលអាកាសធាតុក្រុងប៉ារីសដែលសម្រេចបានកាលពីឆ្នាំ ២០១៥៕
Tag:
COP23
Internews
CCMP
Earth Journalism Network
© រក្សាសិទ្ធិដោយ thmeythmey.com