ជាតិ
ក្រសួងមហាផ្ទៃ ដាក់ភស្តុតាងបន្ថែមទៅតុលាការ ខណៈបក្សប្រឆាំងនៅតែមិនតប រូបភាព៖ លោក គី តិច មេធាវីមួយរូបរបស់ក្រសួងមហាផ្ទៃ ផ្តល់បទសម្ភាសដល់ក្រុមអ្នកកាសែត នៅមុខតុលាការកំពូល កាលពីកន្លងមក។ ប៉ុន្តែកាលនោះ លោក ទៅចូលរួមសវនាការនៅតុលាការកំពូល ក្នុងនាមជាមេធាវិ ដែលការពារក្តីឲ្យសម្តេច ហ៊ុន សែន ប្រឆាំងនឹងលោក គឹម សុខ អ្នកវិភាគនយោបាយ មិនមែនក្នុងនាមជាមេធាវិដែលតំណាងឲ្យក្រសួងមហាផ្ទៃ នោះទេ
× ភ្នំពេញ៖ ក្រុមមេធាវីរបស់ក្រសួងមហាផ្ទៃ នឹងយកភស្តុតាងមួយចំនួនផ្សេងទៀត ទៅជូនតុលាការកំពូល នៅរសៀលថ្ងៃទី១៣ ខែវិច្ឆិកា ឆ្នាំ២0១៧នេះ ដើម្បីដាក់បន្ទុកបន្ថែម លើបណ្តឹងសុំឲ្យរំលាយគណបក្សសង្គ្រោះជាតិ រួមទាំងសុំឲ្យផ្អាកថ្នាក់ដឹកនាំគណបក្សនេះ ក្នុងការធ្វើនយោបាយរយៈពេល៥ឆ្នាំផងដែរ។
ដោយកំពុងរវល់ជាប់ប្រជុំនោះ លោក គី តិច មិនបានបរិយាយអ្វីច្រើនឡើយ ជុំវិញការយកភស្តុតាងបន្ថែមទៅជូនតុលាការកំពូល។ លោក គី តិច មេធាវីមួយរូបរបស់ក្រសួងមហាផ្ទៃ បានប្រាប់សារព័ត៌មានថ្មីៗ តាមទូរសព្ទយ៉ាងខ្លីថា ក្រុមមេធាវីរបស់លោក នឹងបកស្រាយដល់អ្នកកាសែតតែម្តង ពីការដាក់ភស្តុតាងបន្ថែមនេះ នៅពេលទៅដល់តុលាការកំពូល ។
ការដាក់ភស្តុងតាងផ្សេងៗ ដើម្បីឲ្យមានទម្ងន់បន្ថែមទៅលើបណ្តឹងសុំឲ្យរំលាយគណបក្សសង្គ្រោះជាតិ ធ្វើឡើងស្របពេលដែលតុលាការកំពូល ជិតនឹងបើកសវនាការទៅហើយ ពោលគឺ ថ្ងៃទី១៦ ខែវិច្ឆិកា ឆ្នាំ២0១៧នេះ។ ប៉ុន្តែ គណបក្សសង្គ្រោះជាតិ ដែលជាភាគីរងបណ្តឹង ហាក់បណ្តោយឲ្យតុលាការកំពូល បន្តចាត់ការទៅតាមដំណើរ ដោយខ្លួនមិនអើពើអ្វីទាំងអស់។
រហូតមកដល់ពេលនេះ គណបក្សសង្គ្រោះជាតិ មិនបានដាក់ភស្តុតាងឬឯកសារ ទៅកាន់តុលាការកំពូលឡើយ។ សូម្បីតែមេធាវី ដើម្បីតទល់ជាមួយក្រសួងមហាផ្ទៃ ក្នុងតុលាការកំពូល ក៏គណបក្សសង្គ្រោះជាតិ មិនពឹងពាក់ដែរ។ ចំណែកឯ ឯកឧត្តម កឹម សុខា ក្នុងនាមជាប្រធានគណបក្សសង្គ្រោះជាតិ ដែលកំពុងជាប់ឃុំក្នុងពន្ធនាគារត្រពាំងផ្លុង យល់ស្របនឹងការសម្រេចរបស់គណបក្សបែបនេះ។
ឯកឧត្តម កឹម សុខា យល់ថា បណ្តឹងសុំឲ្យរំលាយគណបក្សសង្គ្រោះជាតិ ជារឿងនយោបាយ មិនមែនជាផ្លូវច្បាប់នោះទេ។ នេះបើតាមការអះអាងរបស់លោក សំ សុគង់ មេធាវីមួយរូប ដែលការពារក្តីឲ្យឯកឧត្តម កឹម សុខា។ លោកមេធាវីរូបនេះ បានយកប្រសាសន៍ឯកឧត្តម កឹម សុខា ដែលសន្ទនាជាមួយលោក ក្នុងពន្ធនាគារ មកប្រាប់សារព័ត៌មានថ្មីៗ កាលពីប៉ុន្មានថ្ងៃមុនយ៉ាងដូច្នេះថា៖«គាត់គិតថា វា ជារឿងនយោបាយ ដូច្នេះទោះដាក់ឯកសារឬមេធាវី ក៏គ្មានប្រយោជន៍ដែរ។ រឿងនយោបាយ គឺត្រូវដោះស្រាយដោយនយោបាយ»។
សូមបញ្ជាក់ថា ក្រសួងមហាផ្ទៃ បានយកករណីរបស់ឯកឧត្តម កឹម សុខា ដែលត្រូវបានសង្ស័យថាប្រព្រឹត្តអំពើក្បត់ជាតិ ទៅផ្សារភ្ជាប់ជាមួយគណបក្សសង្គ្រោះជាតិទាំងមូល។ ក្រសួងមហាផ្ទៃ យល់ថា គណបក្សសង្គ្រោះជាតិ ក៏អាចជាប់ទាក់ទងនឹងអំពើក្បត់ជាតិ ដូចឯកឧត្តម កឹម សុខា ដែរ ទើបបានជាសុំឲ្យតុលាការកំពូល រំលាយចោល ហើយថែមទាំងសុំឲ្យដកសិទ្ធិពីថ្នាក់ដឹកនាំគណបក្សប្រឆាំងដ៏ធំមួយនេះ ក្នុងការធ្វើនយោបាយដល់ទៅ៥ឆ្នាំថែមទៀត៕
Tag:
តុលាការ
មហាផ្ទៃ
មេធាវី
CNRP
© រក្សាសិទ្ធិដោយ thmeythmey.com