ថ្នាក់ដឹកនាំបក្សប្រឆាំង១១៧រូប ត្រូវបានមហាផ្ទៃ ស្នើឲ្យតុលាការ ផ្អាកការធ្វើនយោបាយ ៥ឆ្នាំ

ជាតិ

នយោបាយជាតិ

ថ្នាក់ដឹកនាំបក្សប្រឆាំង១១៧រូប ត្រូវបានមហាផ្ទៃ ស្នើឲ្យតុលាការ ផ្អាកការធ្វើនយោបាយ ៥ឆ្នាំ

13, Nov 2017 , 5:17 pm

រូបភាព

រូបភាព៖ លោក គី តិច មេធាវិមួយរូបរបស់ក្រសួងមហាផ្ទៃ ឈរនៅមុខតុលាការកំពូល នៅថ្ងៃទី១៣ ខែវិច្ឆិកា ឆ្នាំ២0១៧ ដោយបង្ហាញបញ្ជីឈ្មោះទាំង១១៧រូបនៃថ្នាក់ដឹកនាំគណបក្សសង្គ្រោះជាតិ ដែលត្រូវស្នើឲ្យផ្អាកការធ្វើនយោបាយរយៈពេល៥ឆ្នាំ

ដោយ: ថ្មីៗ

ភ្នំពេញ៖ សមាជិកចំនួន១១៧រូប ក្នុងជូរគណៈកម្មាធិការអចិន្ត្រៃយ៍ និងគណៈកម្មាធិការនាយក ដែលចាត់ទុកថាជា ថ្នាក់ដឹកនាំគណបក្សសង្គ្រោះជាតិ ត្រូវបានក្រុមមេធាវីរបស់ក្រសួងមហាផ្ទៃ ស្រង់ឈ្មោះជាផ្លូវការ ហើយបញ្ជូនទៅដល់ដៃតុលាការកំពូលហើយ នៅរសៀលថ្ងៃ១៣ ខែវិច្ឆិកា ឆ្នាំ២0១៧នេះ ដើម្បីសុំឲ្យផ្អាកអ្នកទាំងនោះ ក្នុងការធ្វើនយោបាយរយៈពេល៥ឆ្នាំ។ ក្រុមមេធាវីរបស់ក្រសួងមហាផ្ទៃ បានស្នើឲ្យតុលាការកំពូល បិទសិទ្ធិនយោបាយរយៈពេល៥ឆ្នាំ ពីថ្នាក់ដឹកនាំទាំង១១៧រូបនោះ ឲ្យស្របនឹងពេលតែមួយនៃការរំលាយគណបក្សសង្គ្រោះជាតិ តែម្តង។

ថ្នាក់ដឹកនាំគណបក្សសង្គ្រោះជាតិ ដែលស្ថិតក្នុងបញ្ជីនៃការស្នើឲ្យផ្អាកសកម្មភាពផ្នែកនយោបាយរយៈពេល៥ឆ្នាំ មានដូចជា ឯកឧត្តម កឹម សុខា (ប្រធានគណបក្សសង្គ្រោះជាតិ), លោក ប៉ុល ហំម លោក អេង ឆៃអ៊ាង លោកស្រី មូរ សុខហួរ (អនុប្រធានទាំងបី), កញ្ញា កឹម មនោវិទ្យា (កូនស្រីរបស់ឯកឧត្តម កឹម សុខា), លោកស្រី ជូឡុង សូមួរ៉ា (ភរិយារបស់លោក សម រង្ស៊ី), និងលោក ម៉ៅ មុន្នីវណ្ណ ជាដើម។

ក្រៅពីបញ្ជីឈ្មោះនៃអ្នកនយោបាយទាំង១១៧រូប ក្រុមមេធាវី ក៏មានឯកសារនិងភស្តុតាងផ្សេងទៀតដែរ ដែលប្រគល់ជូនទៅតុលាការកំពូល ដើម្បីដាក់បន្ទុកបន្ថែម លើបណ្តឹងសុំឲ្យរំលាយគណបក្សសង្គ្រោះជាតិ។ ក្រុមមេធាវី សង្ឃឹមយ៉ាងមុតមាំថា ដោយផ្អែកលើភស្តុតាងយ៉ាងច្រើនសន្ធឹកសន្ធាប់បែបនេះ តុលាការកំពូល នឹងរំលាយគណបក្សសង្គ្រោះជាតិចោល។

លោក គី តិច មេធាវីមួយរូបរបស់ក្រសួងមហាផ្ទៃ បានបញ្ជាក់ប្រាប់ក្រុមអ្នកកាសែត ក្រោយចាកចេញពីតុលាការកំពូលយ៉ាងដូច្នេះ៖«ក្រុមមេធាវី អាចវាយតម្លៃថា សឹងតែ ១00 ភាគរយ ក្នុងការឈ្នះក្តី។ ការតុលាការកំពូល នឹងពិនិត្យ ហើយសម្រេចរំលាយគណបក្សសង្គ្រោះជាតិ»៕