ជាតិ
ក្រសួងបរិស្ថាន គ្រោងបង្កើតឧទ្យានជាតិសមុទ្រដំបូងគេ នៅកោះរ៉ុង
× កម្ពុជា នឹងបង្កើតឧទ្យានជាតិសមុទ្រដំបូងគេនៅកោះរ៉ុង ខេត្តព្រះសីហនុ ក្នុងពេលឆាប់ៗខាងមុខ។ នេះជាការលើកឡើងរបស់លោក សាយ សំអាល់ រដ្ឋមន្ត្រីក្រសួងបរិស្ថាន នាជំនួបជាមួយ លោក Ahab CW Downer នាយកប្រចាំប្រទេសអង្គការសត្វព្រៃ និងរុក្ខជាតិអន្តរជាតិ FFI កាលពីថ្ងៃទី ៧ ខែវិច្ឆិកា កន្លងទៅ។
«ក្នុងពេលខាងមុខនេះក្រសួង នឹងបង្កើតឧទ្យានជាតិសមុទ្រដំបូងគេក្នុងប្រវត្តិសាស្ត្រ នៃប្រទេសកម្ពុជា នៅលើតំបន់ឧទ្យាជាតិជាតិកោះរ៉ុង»។ នេះជាការបញ្ជាក់របស់លោក រដ្ឋមន្ត្រីបរិស្ថាន មុននឹងបន្តថា ក្រសួង ក៏កំពុងពិនិត្យមើលលទ្ឋភាពដៃគូសហការជួយពង្រឹងសមត្ថភាពឧទ្យានុរក្ស ដើម្បីពង្រឹងបណ្តាញការពារសមុទ្រ និងអភិវឌ្ឍន៍ធនធានមនុស្ស ដូចជាអ្នកស្រាវជ្រាវ អ្នកវិទ្យាសាស្ត្រ ដើម្បីកំណត់ព្រំប្រទល់ និងផែនការការពារ និងអភិរក្សធនធានធម្មជាតិជីវៈចម្រុះនៅតំបន់សមុទ្រ។
សូមបញ្ជាក់ថា កម្ពុជាមានឧទ្យានជាតិចំនួន១២ ក្នុងនោះឧទ្យានជាតិចំនួន៧ បានបង្កើតឡើងដោយព្រះរាជក្រឹត្យ និងឧទ្យាន៥តំបន់ទៀត បានបង្កើតឡើងដោយអនុក្រឹត្យ ដែលគ្របដណ្តប់លើផ្ទៃដីសរុប១.៧២០.២៦៩,៣៥ហិកតា ស្មើនឹង៩,៥ភាគរយ នៃផ្ទៃដីប្រទេស ស្ថិតក្នុងភូមិសាស្ត្រខេត្តកំពង់ស្ពឺ កោះកុង កំពត ពោធិ៍សាត់ សៀមរាប រតនគិរី ព្រះសីហនុ និងខេត្តស្ទឹងត្រែង ។ ឧទ្យានកោះរ៉ុង មានផ្ទៃដី២.៦៥៥, ៣៥ហិកតា ស្ថិតក្នុងខេត្តព្រះសីហនុ ត្រូវបានបង្កើតដោយអនុក្រឹត្យ ថ្ងៃទី១៣ ខែកញ្ញា ឆ្នាំ២០១៦ ។
«តំបន់ឧទ្យានជាតិ» សំដៅដល់តំបន់ធម្មជាតិក្នុងដែនដីគោក ឬដែនទឹក ដែលត្រូវបានកំណត់ដើម្បីការពារខាងផ្នែកប្រព័ន្ធអេកូឡូស៊ីមួយ ឬច្រើនរបស់តំបន់ ដែលបានកំណត់សម្រាប់ជាប្រយោជន៍ដល់មនុស្សគ្រប់ជំនាន់។ នេះបើតាមក្រសួងបរិស្ថាន ដែលបន្តថាតំបន់នេះ ក៏កម្រិតការប្រើប្រាស់ ដែលអាចធ្វើឲ្យខូចខាត ឬបំផ្លិចបំផ្លាញដល់ធនធានជីវៈចម្រុះ ធនធានធម្មជាតិ ធនធានវប្បធម៌ និងមុខងារ តួនាទីរបស់តំបន់នោះ ជាមួយនឹងគោលបំណង នៃការកំណត់តំបន់ និងការផ្តល់មូលដ្ឋានសម្រាប់ការកម្សាន្ត ការទស្សនា ការអប់រំ ការសិក្សាស្រាវជ្រាវ វិទ្យាសាស្ត្រ និងជំនឿ ដែលគ្រប់សកម្មភាពទាំងនេះ ដោយពុំបង្កការគំរាមកំហែងដល់បរិស្ថានធម្មជាតិ និងវប្បធម៌នៅក្នុងមូលដ្ឋានឡើយ៕
Tag:
បរិស្ថាន
កោះរ៉ុង
ឧទ្យាន
© រក្សាសិទ្ធិដោយ thmeythmey.com