ជាតិ
កម្ពុជាពន្យល់ EU ថា ស្ថានការណ៍ចុងក្រោយជាការពង្រឹងនីតិរដ្ឋ
× លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា បានពន្យល់ទៅ លោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា ថាកម្ពុជាកំពុងពង្រឹងនីតិរដ្ឋ។ លោក ជុំ សុន្ទរី អ្នកនាំពាក្យក្រសួងការបទេសកម្ពុជា ថ្លែងប្រាប់អ្នកកាសែតដូច្នេះ បន្ទាប់ពីជំនួបពន្យល់ទៅកាន់សហភាពអឺរ៉ុប នៅព្រឹកថ្ងៃទី១៦ ខែវិច្ឆិកានេះ នាទីស្តីការក្រសួងបញ្ចប់។
តាមអ្នកនាំពាក្យដដែល នៅក្នុងជំនួបនោះ សហភាពអឺរ៉ុប នៅតែលើកឡើងពីកង្វល់ និងបារម្ភរបស់ខ្លួន ជុំវិញការរិតដ្បិតសេរីភាពសារព័ត៌មាន និងអង្គការសង្គមស៊ីវិលនៅកម្ពុជា និងពិសេសការចាប់ និងឃុំខ្លួន ឯកឧត្តម កឹម សុខា ប្រធានគណបក្សសង្គ្រោះជាតិ ទន្ទឹមនឹងនីតិវិធីរបស់តុលាការកំពូលលើបណ្តឹងសុំរំលាយគណបក្សប្រឆាំងមួយនេះ កំពុងតែដំណើរការនោះ។
ជាការកត់សម្គាល់នេះមិនមែនជាលើកទី១ទេ ដែលកម្ពុជា ជួបជាមួយសហភាពអឺរ៉ុប ជជែកគ្នាពីករណីការចាប់ខ្លួន ឯកឧត្តម កឹម សុខា និងបណ្តឹងរំលាយគណបក្សប្រឆាំងមួយនេះ។ កាលពីចុងខែតុលា លោក ប្រាក់ សុខុន ក៏បានជួបជាមួយលោក Werner Langen ប្រធានគណៈកម្មាធិការ កិច្ចការសេដ្ឋកិច្ច និងរូបិយវត្ថុរបស់សភាអឺរ៉ុបដែរ។ ក្នុងជំនួបនោះ ប្រតិភូសហភាពអឺរ៉ុប បាននិយាយភ្ជាប់រឿងអនុគ្រោះពន្ធពាណិជ្ជកម្ម នៅក្នុងសំណើឲ្យរដ្ឋាភិបាលកម្ពុជា ដោះលែងឯកឧត្តម កឹម សុខា ប្រធានគណបក្សសង្គ្រោះជាតិ ហើយបញ្ឈប់ការប៉ុនប៉ងរំលាយបក្សប្រឆាំងមួយនេះ៕
© រក្សាសិទ្ធិដោយ thmeythmey.com