ខួប៧ឆ្នាំនៃការស្លាប់មនុស្សជាង៣៥០នាក់នៅកោះពេជ្រ

ជាតិ

ខួប៧ឆ្នាំនៃការស្លាប់មនុស្សជាង៣៥០នាក់នៅកោះពេជ្រ

22, Nov 2017 , 11:35 am

រូបភាព

ដោយ:

ភ្នំពេញ៖ សាលារាជធានីភ្នំពេញបានធ្វើពិធីរាប់បាត្រ បង្សុកូល ដោយមានព្រះសង្ឃចំនួន១០៨អង្គ ដើម្បីឧទ្ទិសកុសល្យដល់អ្នកដែលបានស្លាប់ចំនួន៣៥៣នៅក្នុងឧប្បត្តិហេតុរត់ជាន់គ្នានៅស្ពាននាគកោះពេជ្រ កាលពីយប់ថ្ងៃទី២២ ខែវិច្ឆិកា ឆ្នាំ២០១០ ដែលចំថ្ងៃទី៣ នៃពិធីបុណ្យអុំទូក។

ដើម្បីឧទ្ទិសកុសល្យដល់អ្នកដែលបានស្លាប់ ក្នុងឧប្បត្តិហេតុរត់ជាន់គ្នានៅកោះពេជ្រកាលពីឆ្នាំ២០១០សាលារាជធានីភ្នំពេញ បានធ្វើពិធីរាប់បាត្រ បង្សុកូលដោយមានព្រះសង្ឃសំនួន១០៨អង្គនៅព្រឹកថ្ងៃទី២២ ខែវិច្ឆិកានេះ នៅស្ដូបជិតស្ពានភ្លោះកោះពេជ្រ ក្រោមការចូលរួមពីលោកម៉ប់ សារិនប្រធានក្រុមប្រឹក្សាសាលារាជធានីភ្នំពេញ។

នៅក្នុងពិធីនេះលោកម៉ប់ សារិន ក៏បានបញ្ជាក់ថាសាលារាជធានីនឹងធ្វើពិធីបង្សុកូលនេះជារៀងរាល់ឆ្នាំជាមួយគ្រួសារនៃសព្វ នៅស្តូបជិតស្ពានភ្លោះកោះពេជ្រ។ នៅក្នុងពិធីបង្សុកូលនេះ សាលារាជធានីភ្នំពេញក៏បានផ្ដល់ថវិកាដល់គ្រួសារសពដោយក្នុងម្នាក់ទទួលបាន២០ម៉ឺនរៀល។

សូមបញ្ជាក់ថា កាលពីយប់ថ្ងៃទី២២ ខែវិច្ឆិកា ឆ្នាំ២០១០ ជារាត្រីទី៣ នៃពិធីបុណ្យអុំទូក នៅស្ពាននាគ ជាប្រភេទស្ពានយោល ដែលទើបសាងសង់ថ្មីនៅកោះពេជ្របានកើយឧប្បតិ្តហេតុផ្អើលរត់ជាន់គ្នារហូតដល់ស្លាប់មនុស្សចំនួន៣៥៣នាក់។ ករណីនេះមិនត្រូវបានស្វែងរកមូលហេតុពិតប្រាកដណាមួយ នៅពីក្រោយការផ្អើលរត់ជាន់គ្នានេះឡើយ ហើយបន្ទាប់ពីមានមនុស្សស្លាប់ជាច្រើននាក់ ស្ពាននាគ ឬស្ពានយោលនោះក៏ត្រូវវាយកម្ទេចចោលផងដែរ៕