អន្តរជាតិ
ប្រធានាធិបតីចិន បន្តជំរុញ«បដិវត្តន៍បង្គន់អនាម័យ» ដើម្បីទាក់ទាញភ្ងៀវទេសចរណ៍អន្តរជាតិ
× ប្រមុខរដ្ឋចិន លោក ស៊ី ជិនភីង បានទទូចឲ្យមន្ត្រីពាក់ព័ន្ធក្រោមឱវាទបន្តជំរុញការអនុវត្តយុទ្ធនាការ «បដិវត្តន៍បង្គន់» ឲ្យកាន់តែច្រើនទៀត ។ ការបន្តយុទ្ធនាការនោះគឺ បន្តដំឡើង ឬសាងសង់បន្ទប់ទឹកសាធារណៈឲ្យកាន់ច្រើនមិនថានៅតំបន់ជនបទ ឬទីប្រជុំជនឡើយ ។
លោកប្រធានាធិបតី ស៊ី ជិនភីង បានថ្លែងក្នុងឱកាសវេទិកាទេសចរណ៍ពាក់ព័ន្ធនឹងសមិទ្ធផលនៃការសាងសង់ ថា ចិនគួរតែធ្វើឲ្យមានភាពល្អប្រសើរ និងបង្កើនបង្គន់សាធារណៈ ដែលជាផ្នែកនៃ «បដិវត្តន៍បង្គន់» ដែលបង្កើតឡើងក្នុងគោលដៅអភិវឌ្ឍវិស័យទេសចរណ៍ក្នុងស្រុក ។ នេះបើយោងតាមការចុះផ្សាយរបស់ទីភ្នាក់ងារព័ត៌មានចិន Xinhua នៅថ្ងៃ២៧ វិច្ឆិកា ។
លោកប្រធានាធិបតី ស៊ី បានពន្យល់ថា ការសាងសង់បង្គន់ដែលមានអនាម័យ គឺជាផ្នែកមួយដ៏សំខាន់នៃការជំរុញភាពជឿនលឿនទាំងនៅទីប្រជុំជន និងទីជនបទ។ វាក៏ជាអ្វីដែលមន្ត្រីពាក់ព័ន្ធគ្រប់ជាន់ថ្នាក់ គួរតែបន្តកិច្ចប្រឹងប្រែងក្នុងការអនុវត្តគោលនយោបាយនេះ ដើម្បីពង្រឹង និងធ្វើឲ្យមានភាពល្អប្រសើរក្នុងការរស់នៅរបស់ប្រជាជនផងដែរ ។
ប្រធានាធិបតីចិនសង្កត់ធ្ងន់ថា៖«ស្របតាមគោលនយោបាយបដិវត្តន៍បង្គន់ ចិន គួរតែដំឡើងសំណង់សាធារណៈឲ្យបានច្រើន និងមានគុណភាព ក៏ដូចជាសេវាសាធារណៈផ្សេងៗទៀតដើម្បីជួយជំរុញដល់វិស័យទេសចរណ៍ឲ្យកាន់តែលូតលាស់»។
គួរជម្រាបផងដែរថា បដិវត្តន៍បង្គន់ ត្រូវបានអាជ្ញាធរចិន ប្រកាសដាក់អនុវត្តចាប់ពីឆ្នាំ២០១៥មក ។ គោលនយោបាយនេះ ធ្វើឡើងបន្ទាប់ពីចិនទទួលការរិះគន់ច្រើនពីបណ្តាអ្នកទេសចរ និងអ្នកប្រើប្រាស់បង្គន់សាធារណៈ ព្រោះពីមុនក្នុងបន្ទប់មួយ អាចឲ្យអ្នកប្រើប្រាស់ចូលបានច្រើននាក់ ដោយពុំមានជញ្ជាំងអ្វីសម្រាប់បិទបាំងនៅពេលពួកគេបន្ទោរបង់នោះ ។
តាមរយៈគោលនយោបាយបីឆ្នាំ(២០១៥-២០១៧)នៃបដិវត្តន៍បង្គន់ចិន មានផែនការចង់បន្ថែមបង្គន់សាធារណៈជាងបីម៉ឺន និងប្តូរផ្លាស់ថ្មីជាងពីរម៉ឺនបង្គន់ ។ តាមសេចក្តីប្រកាសរបស់រដ្ឋបាលទេសចរណ៍ជាតិចិន រដ្ឋាភិបាលក៏មានផែនការក្នុងដំឡើងបង្គន់សាធារណៈ ជាងប្រាំមួយម៉ឺនបង្គន់នៅទិសដៅភ្ញៀវទេសចរក្នុងឆ្នាំ២០១៨-២០២០ ផងដែរ ៕
Tag:
ចិន
បង្គន់
ស៊ី ជិនភីង
© រក្សាសិទ្ធិដោយ thmeythmey.com