អន្តរជាតិ
មន្ត្រីយោធាចិនជាន់ខ្ពស់ធ្វើអត្តឃាត ក្រោយសង្ស័យជាប់ពាក់ព័ន្ធពុករលួយ
× អតីតសមាជិកគណៈកម្មការយោធាមជ្ឈិមដ៏មានឥទ្ធិពលនៃបក្សកុម្មុយនីស្តចិន លោក ចាង យ៉ាង (Zhang Yang) បានធ្វើអត្តឃាតនៅក្នុងផ្ទះរបស់ខ្លួន ខណៈរូបលោកកំពុងជាប់ពាក់ព័ន្ធក្នុងសំណុំរឿងពុករលួយ។ ទីភ្នាក់ងារព័ត៌មានរដ្ឋ Xinhua ផ្សាយថា លោក ចាង យ៉ាង បានស្លាប់តាំងពីថ្ងៃទី២៣ ខែវិច្ឆិកាមកម្លេះ។ គណៈកម្មការយោធាមជ្ឈិមអះអាងថា លោក ចាង បានបំពានវិន័យបក្ស និងមានទ្រព្យសម្បត្តិមិនច្បាស់លាស់ជាច្រើន។
ឧត្តមសេនីយ៍ផ្កាយបួន ចាង យ៉ាង អតីតប្រធាននាយកដ្ឋានកិច្ចការនយោបាយនៃគណៈកម្មការយោធាមជ្ឈិមបក្សកុម្មុយនីស្តចិន បានចងកសម្លាប់ខ្លួនក្នុងផ្ទះ ស្របពេលដែលអាជ្ញាធរកំពុងស៊ើបអង្កេតករណីពុករលួយ។ លោក ចាង យ៉ាង ជាមន្ត្រីជាន់ខ្ពស់យោធាដំបូងគេ ដែលសម្លាប់ខ្លួនដើម្បីគេចពីការចោទប្រកាន់ ដោយជាប់សង្ស័យថាមានទំនាក់ទំនងជាមួយអតីតមន្ត្រីយោធាពីររូបទៀត ដែលអស់តំណែងដោយសារអំពើពុលរលួយនេះដែរ។
មុនហេតុការណ៍កើតឡើង គណៈកម្មការយោធាមជ្ឈិមដែលដឹកនាំដោយលោក ស៊ី ជិនភីង បានជួបជាមួយលោក ចាង ដើម្បីសួរនាំពីការចូលរួមរបស់លោកក្នុងការប្រព្រឹត្តអំពើពុករលួយរបស់អតីតឧត្តមសេនីយ៍ Guo Boxiong និង Xu Caihou ។ ក្រុមស៊ើបអង្កេតអះអាងថា លោក ចាង បានល្មើសវិន័យបក្ស និងច្បាប់ធ្ងន់ធ្ងរ ជាប់ពាក់ព័ន្ធករណីផ្ដល់ និងទទួលសំណូករាប់លានដុល្លារ ព្រមទាំងមានទ្រព្យសម្បត្តិសន្ធឹកសន្ធាប់ទៀតផង។
លោក ចាង យ៉ាង ត្រូវបានដកហូតតំណែងប្រធាននាយកដ្ឋានកិច្ចការនយោបាយកាលពីចុងខែសីហា ព្រមគ្នានឹងមន្ត្រីជាន់ខ្ពស់យោធាម្នាក់ទៀត គឺលោក Fang Fenghui ដែលជាអតីតប្រធាននាយកដ្ឋានសេនាធិការចម្រុះ។ អ្នកទាំងពីរនេះក៏គ្មានឈ្មោះជាប្រតិភូតំណាងកងទ័ពរំដោះប្រជាជនចិនសម្រាប់មហាសន្និបាតបក្សលើកទី១៩ ខែតុលាដែរ។ ក្រោយអស់តំណែង អតីតមន្ត្រីយោធាទាំងពីរនេះ ក៏ត្រូវជាប់ឃុំខ្លួនក្នុងផ្ទះរហូតមក ហើយលោក ចាង ក៏សម្រេចចិត្តបញ្ចប់ជីវិតតែម្ដងទៅ។
មកទល់ពេលនេះ មន្ត្រីលើសមួយលាននាក់ត្រូវរងទណ្ឌកម្មដោយសារជាប់ពាក់ព័ន្ធអំពើពុករលួយនេះ។ ចំណែកឯក្នុងជួរយោធាវិញ មន្ត្រីទាំងតូចទាំងធំចំនួនជាង១៣០០០នាក់ ត្រូវបានដាក់ពិន័យដោយសារកំហុសក្នុងរយៈពេល៥ឆ្នាំមកនេះ ដោយខ្លះត្រូវបណ្ដេញចេញពីបក្ស ហើយខ្លះទៀតជាប់ពន្ធនាគារអស់មួយជីវិតជាដើម។
តាំងពីកាន់អំណាចក្នុងមហាសន្និបាតបក្សលើកទី១៨ ឆ្នាំ២០១២ ដល់មហាសន្និបាតបក្សលើកទី១៩ ឆ្នាំ២០១៧ អគ្គលេខាធិការបក្ស ស៊ី ជិនភីង បានអនុវត្តយ៉ាងតឹងរ៉ឹងយុទ្ធនាការបោសសម្អាតមន្ត្រីពុករលួយ។ លោក ស៊ី ជិនភីង បានចេញបញ្ជាដាច់ណាត់ក្នុងយុទ្ធនាការនេះ ដោយមិនត្រូវរើងអើងឋានៈអ្វីទេ មិនថា «មន្ត្រីខ្លា» និង «មន្ត្រីរុយ» ឡើយ។ ពោល គឺមន្ត្រីថ្នាក់ណាក៏ដោយឲ្យតែជាប់ពាក់ព័ន្ធពុករលួយ ត្រូវតែកាត់ទោសទាំងអស់៕
© រក្សាសិទ្ធិដោយ thmeythmey.com