ប្រធានាធិបតីបារាំង៖ ជនជាតិអាហ្វ្រិកលក់ជនជាតិខ្លួនធ្វើទាសករ មិនមែនពួកអឺរ៉ុបទេ

អន្តរជាតិ

ប្រធានាធិបតីបារាំង៖ ជនជាតិអាហ្វ្រិកលក់ជនជាតិខ្លួនធ្វើទាសករ មិនមែនពួកអឺរ៉ុបទេ

29, Nov 2017 , 2:38 pm

រូបភាព

ដោយ: តន ចាន់រិទ្ធារ៉ា

ករណីជួញដូរជនអន្តោប្រវេសន៍ដូចសត្វធាតុនៅក្នុងប្រទេសលីប៊ីនៅពេលថ្មីៗនេះ កំពុងក្លាយជាប្រធានបទដ៏សំខាន់។ ប្រទេសនានាបានស្នើឲ្យក្រុមប្រឹក្សាសន្តិសុខអង្គការសហប្រជាជាតិកោះប្រជុំដើម្បីដាក់ចេញចំណាត់ការមួយ។ ប៉ុន្តែប្រធានាធិបតីបារាំង អេម៉ានុយអែល ម៉ាក្រុង ដែលកំពុងស្ថិតនៅទ្វីបអាហ្វ្រិក បាននិយាយត្រង់ៗថា បញ្ហាជួញដូរមនុស្សនៅអាហ្វ្រិក កើតឡើងដោយសារប្រជាជនអាហ្វ្រិកខ្លួនឯង ហើយបញ្ហានេះគួរតែត្រូវដោះស្រាយក្នុងស្រុកវិញ។

ការផ្ទុះចេញរបាយការណ៍ជួញដូរមនុស្សនៅលីប៊ីកាលពីសប្ដាហ៍មុន ធ្វើឲ្យសាធារណជន និងសហគមន៍អន្តរជាតិផ្ទុះកំហឹង និងថ្កោលទោសខ្លាំងដែរ។ បារាំង បានចេញមុខស្នើឲ្យក្រុមប្រឹក្សាសន្តិសុខអង្គការសហប្រជាជាតិបើកកិច្ចប្រជុំមួយដើម្បីពិភាក្សាពីបញ្ហាជួញដូរមនុស្ស និងទាសភាពនៅលីប៊ី។ ប្រធានាធិបតីបារាំង អេម៉ានុយអែល ម៉ាក្រុង វិញ ក៏ស្នើបង្កើតយន្តការចម្រុះអឺរ៉ុប-អាហ្វ្រិកដើម្បីដោះស្រាយបញ្ហានេះ ប៉ុន្តែលោកចង់ឲ្យអាជ្ញាធរក្នុងស្រុកទទួលខុសត្រូវការងារនេះវិញ។

ថ្លែងក្នុងរដ្ឋធានីអៅហ្គាឌូហ្គូ ប្រទេសបួគីណាហ្វាសូ ថ្ងៃទី២៨ ខែវិច្ឆិកា លោក ម៉ាក្រុង និយាយចំៗថា ឈ្មួញជួញដូរមនុស្សទាំងនោះ គឺជាជនជាតិអាហ្វ្រិក មិនជនជាតិបារាំងទេ ដូច្នេះអាហ្វ្រិកគួរមានតែការទទួលខុសត្រូវខ្លួនឯងដើម្បីបោសសម្អាតក្រុមនោះឲ្យអស់។ ប្រធានាធិបតីបារាំងក៏បានស្នើឲ្យបង្ហាញមុខជនជាតិអឺរ៉ុបដែលជាឈ្នួញរត់ពន្ធមនុស្សនៅនីហ្ស៊េរីយ៉ា និងលីប៊ី។

«បង្ហាញមុខជនជាតិបារាំង បែលហ្ស៊ិក អាល្លឺម៉ង់ដែលធ្វើសកម្មភាពជួញដូរមនុស្សមក។ មនុស្សនេះគ្មានលើលោកនេះទេ។ នៅអាហ្វ្រិកបច្ចុប្បន្ន ជនជាតិអាហ្វ្រិកជាអ្នកយកអាហ្វ្រិកគ្នាឯងធ្វើជាទាសករ ហើយនេះជាការពិត។ ព្រមគ្នានេះ ជនជាតិអឺរ៉ុបខ្លះក៏ទាញយកប្រយោជន៍ពីបញ្ហានេះដែរ ហើយវាជារឿងមិនអាចទទួលយកបានដាច់ខាត។ ករណីទាំងពីរនេះសុទ្ធតែជាឧក្រិដ្ឋកម្ម ដែលត្រូវតែកម្ទេចឲ្យអស់»។ នេះជាបញ្ជាក់របស់ប្រធានាធិបតីបារាំង ផ្សាយដោយសារព័ត៌មាន RT ។

បញ្ហាជួញដូរមនុស្ស និងទាសភាពនេះនឹងត្រូវយកទៅពិភាក្សាក្នុងកិច្ចប្រជុំកំពូលអឺរ៉ុបអាហ្វ្រិកដែលរៀបចំឡើងនៅថ្ងៃទី២៩ ដល់ថ្ងៃទី៣០ ខែវិច្ឆិកា នៅទីក្រុង Abidjan ប្រទេសកូតឌីវ័រ។ លោក ម៉ាក្រុង ក៏នឹងចូលរួមក្នុងកិច្ចប្រជុំនេះដែរ ដើម្បីស្វែងរកដំណោះស្រាយសម្រាប់វិបត្តិមនុស្សជាតិក៏អាក្រក់មួយនេះ។

យោងតាមវីដេអូ ដែលចុះផ្សាយដោយសារព័ត៌មាន CNN បុរសអាហ្វ្រិកជាច្រើននាក់ពីនៅលីប៊ី ត្រូវដាក់ដេញថ្លៃយកទៅធ្វើជាកម្មករនៅកសិដ្ឋានក្នុងតម្លៃ៤០០ ដុល្លារ ហើយវីដេអូនេះក៏បានធ្វើឲ្យសាធារណជន និងសហគមន៍អន្តរជាតិផ្ទុះកំហឹង និងថ្កោលទោសខ្លាំង។ យ៉ាងណាក៏ដោយ ជុំវិញបញ្ហានេះ រដ្ឋាភិបាលលីប៊ី ក៏បានអះអាងដែរថា ខ្លួនកំពុងតែបើកការស៊ើបអង្កេត និងរង់ចាំលទ្ធផលដើម្បីនាំយកជនល្មើសមកកាន់ទោសតាមផ្លូវច្បាប់ ៕