អន្តរជាតិ
អឺរ៉ុបជួយអាហ្វ្រិកបញ្ជូនជនភៀសខ្លួននៅលីប៊ីទៅប្រទេសកំណើតវិញ ចៀសវាងការជួញដូរ រូបភាព៖ Xinhua
× មេដឹកនាំអឺរ៉ុប និងអាហ្វ្រិកនាំឯកភាពលើផែនការធ្វើមាតុភូមិនិវត្តន៍ជាបន្ទាន់មួយសម្រាប់ជនភៀសខ្លួនអាហ្វ្រិកនៅលីប៊ី ដែលកំពុងរងគ្រោះក្នុងការជួញដូរមនុស្ស។ ការជួញដូរមនុស្សនៅលីប៊ី ដែលលេចជារូបរាងកាលពីសប្ដាហ៍មុនលើសារព័ត៌មាន CNN បង្កជាស្ថានភាពក្តុកក្ដួល និងរងការថ្កោលទោសខ្លាំងនៅជុំវិញពិភពលោក។ ចំណែកឯបារាំងវិញ ចង់ប្រើកម្លាំងយោធាដើម្បីដោះស្រាយបញ្ហានេះ ព្រោះពួកឈ្មួញទាំងនោះមានជាប់ពាក់ព័ន្ធជាមួយក្រុមភេរវកម្ម។
១. បញ្ជូនជនភៀសខ្លួនទៅស្រុកវិញ ដើម្បីចៀសវាងការជួញដូរ
ជំនួបកំពូលអាហ្វ្រិក-អឺរ៉ុប នៅទីក្រុង Abidjan ប្រទេសកូតឌីវ័រ ដែលដំបូងគ្រោងពិភាក្សាលើការអភិវឌ្ឍទ្វីបអាហ្វ្រិក បែរជាគ្របដណ្ដប់ដោយវិបត្តិជួញដូរមនុស្សនៅលីប៊ីទៅវិញ។ ក្រោយជំនួបពីរថ្ងៃ ដែលបញ្ចប់នៅថ្ងៃទី៣០ ខែវិច្ឆិកា មេដឹកនាំអាហ្វ្រិក និងអឺរ៉ុប បានប្រកាសពីផែនការបន្ទាន់មួយដើម្បីជម្លៀសជនភៀសខ្លួននៅលីប៊ី ដែលរង់ចាំបន្តទៅតំបន់អឺរ៉ុប ហើយរងការគំរាមកំហែងពីសំណាក់ក្រុមជួញដូរមនុស្ស។
មេដឹកនាំចំនួន៩ មកពីប្រទេសអាហ្វ្រិក និងអឺរ៉ុប បានឯកភាពលើគំនិតផ្ដួចផ្ដើមរបស់ប្រធានាធិបតីបារាំង អេម៉ានុយអែល ម៉ាក្រុង ក្នុងការបញ្ជូនជនភៀសខ្លួនទៅកាន់ប្រទេសដើមវិញ។ លោក ម៉ាក្រុង បញ្ជាក់ថា បារាំងស្នើឲ្យបញ្ជូនភៀសខ្លួនទាំងឡាយដែលជាប់ខ្លួនក្នុងជំរំនៅលីប៊ីទៅកាន់ប្រទេសកំណើតជាមុនសិន ព្រោះពួកគេមិនអាចទទួលបានសិទ្ធិជ្រកកោនអ្វីឡើយ។
បើតាមផែនការរបស់មេដឹកនាំបារាំង អឺរ៉ុប និងអង្គការសហប្រជាជាតិ នឹងសហការគ្នាដោះស្រាយបញ្ហានេះ។ យន្តការថ្មីនឹងកំណត់គោលដៅជនរងគ្រោះទាំងឡាយដែលធ្វើដំណើរទៅកាន់លីប៊ី ជាទីសំចតមុនឆ្លងសមុទ្រម៉េឌីទែរ៉ាណេទៅកាន់អឺរ៉ុប។ សហភាពអាហ្វ្រិក សហភាពអឺរ៉ុប និងអង្គការសហប្រជាជាតិប្រកាសរួមគ្នាថា គោលដៅសំខាន់ពេលនេះ គឺការជួយសង្គ្រោះអាយុជីវិតជនភៀសខ្លួននៅលីប៊ី បញ្ជូនពួកគេទៅប្រទេសដើមវិញ ក៏ដូចជាផ្ដល់ការការពារផងដែរ។
លើសពីនោះ វិធានការរួមគ្នានេះ ក៏នឹងផ្ដោតសំខាន់លើការបោសសម្អាតបណ្ដាញឧក្រិដ្ឋជនដែលជាប់ពាក់ព័ន្ធករណីជួញដូរមនុស្សនេះ។ ចំពោះមេដឹកនាំអាហ្វ្រិក និងអឺរ៉ុប អគ្គលេខាធិការអង្គការសហប្រជាជាតិ អង់តូនីញ៉ូ ហ្គូតេរ៉េស លើកឡើងថា បើចង់ដោះស្រាយបញ្ហានេះត្រូវតែជីកឬសគល់បញ្ហាតែម្ដង ព្រោះបញ្ហានឹងនៅតែបន្ត បើគេមិនបង្កើតច្បាប់អន្តោប្រវេសន៍ត្រឹមត្រូវ និងធានាពីការទទួលបានអនាគតប្រសើរនៅប្រទេសនីមួយៗទេនោះ។
២. បារាំងចង់ប្រើកម្លាំងទ័ពបោសសម្អាតការជួញដូរមនុស្សនៅលីប៊ី
ក្រៅពីការបញ្ជូនជនភៀសខ្លួនទៅស្រុកទេសវិញ ប្រធានាធិបតី ម៉ាក្រុង ក៏ចង់ប្រើប្រាស់កម្លាំងទ័ព និងប៉ូលិស ដើម្បីបោសម្អាតក្រុមជួញដួរមនុស្សនៅលីប៊ីផងដែរ។ ក្នុងកិច្ចសម្ភាសជាមួយសារព័ត៌មានបារាំងនៅពាក់កណ្ដាលសប្ដាហ៍នេះ លោក ម៉ាក្រុង ដែលកំពុងស្ថិតក្នុងដំណើរទស្សនកិច្ចតំបន់អាហ្វ្រិកនិយាយថា យើងនឹងចាប់ផ្ដើមពង្រាយកងទ័ព និងប៉ូលិសនៅតាមទីតាំងនានា ព្រមគ្នានឹងការដាក់ទណ្ឌកម្មផង។
តាមការអះអាងរបស់មេដឹកនាំបារាំង ក្រុមឈ្មួញជួញដូរមនុស្សនៅលីប៊ី មានទំនាក់ទំនងជិតស្និទ្ធិជាមួយក្រុមភេរវជន។ ពេលខ្លះទៀត ពួករត់ពន្ធមនុស្សនេះគឺជាក្រុមតែមួយដែលធ្វើសង្គ្រាមជាមួយយើង និងបង្កើតជាបញ្ហាមិនចេះចប់នៅតំបន់ Sahel និងតំបន់វាលខ្សាច់សាហារ៉ាជាដើម។ ដោយសារមូលហេតុនេះ ទើបលោក ម៉ាក្រុង ចង់ប្រើធម៌ក្ដៅដើម្បីកម្ទេចបណ្ដាញជួញដូរមនុស្ស។
សូមបញ្ជាក់ថា វីដេអូឯកសារផ្សាយដោយទូរទស្សន៍អាមេរិក CNN កាលពីខែមុន បង្ហាញពីការដេញថ្លៃជនភៀសខ្លួនអាហ្វ្រិកនៅលីប៊ីដើម្បីយកធ្វើជាទាសករក្នុងកសិដ្ឋាននានា។ ជនភៀសខ្លួនទាំងនោះធ្វើដំណើរពីរដ្ឋអាហ្វ្រិកនានាដែលជួបបញ្ហា រួចសំចតនៅលីប៊ី មុនបន្តដំណើរទៅកាន់អឺរ៉ុបដើម្បីស្វែងរកអនាគតភ្លឺស្វាង។ ប៉ុន្តែជារឿយៗ ពួកគេត្រូវបានលក់ដូរដូចសត្វធាតុ ហើយពេលខ្លះក៏ត្រូវអស់ជីវិតកណ្ដាលសមុទ្រម៉េឌីទែរ៉ាណេទៅទៀត៕
© រក្សាសិទ្ធិដោយ thmeythmey.com