អន្តរជាតិ
អឺរ៉ុបកាត់លុយតួកគីជាង១២៥លានដុល្លារ ព្រោះមិនគោរពសិទ្ធិមនុស្សនិងនីតិរដ្ឋ កិច្ចប្រជុំសភាអឺរ៉ុប (រូបភាព៖ Xinhua)
× សហភាពអឺរ៉ុបបានសម្រេចកាត់ផ្ដាច់ទឹកប្រាក់ចំនួន១០៥លានអឺរ៉ូ ស្មើជាង១២៥លានដុល្លារ សម្រាប់តួកគីក្នុងឆ្នាំ២០១៨ ក្រោមហេតុផលថា តួកគីមិនគោរពសិទ្ធិមនុស្ស និងនីតិរដ្ឋ។ អឺរ៉ុបក៏បានបង្កកទឹកប្រាក់ចំនួនជាង៨៣លានដុល្លារទៀត ដែលត្រូវផ្ដល់ឲ្យតួកគីក្រោមក្របខណ្ឌនៃការចរចាចូលជាសមាជិកសហភាពអឺរ៉ុប។ ប៉ុន្តែការចរចានេះមិនមានដំណើរការអ្វីឡើយ ស្របពេលទំនាក់ទំនងទ្វេភាគីដុបដាបខ្លាំង ក្រោយរដ្ឋប្រហារនៅតួកគីឆ្នាំ២០១៦ ។
ដោយមើលឃើញពីការធ្លាក់ចុះស្ថានភាពសិទ្ធិមនុស្ស និងនីតិរដ្ឋនៅតួកគី សហភាពអឺរ៉ុបបានកាត់ផ្ដាច់ទឹកប្រាក់ចំនួន១២៥លានដុល្លារ ដែលត្រូវផ្ដល់ឲ្យតួកគីអំឡុងពេលចរចាចូលជាសមាជិក។ នេះបើតាមច្បាប់ថវិកាសម្រាប់ឆ្នាំ២០១៨ ដែលត្រូវបានអនុម័តក្រុមប្រឹក្សាអឺរ៉ុប និងសភាអឺរ៉ុបនៅថ្ងៃទី៣០ ខែវិច្ឆិកា។ តួកគីក៏ប្រឈមមុខអស់ទឹកប្រាក់ចំនួនជាង៨៣លានដុល្លារទៀត បើមិនព្រមគោរពសិទ្ធិមនុស្សឲ្យពេញលេញទេនោះ។
ក្នុងសេចក្ដីប្រកាសព័ត៌មានរបស់ខ្លួន ក្រុមប្រឹក្សាអឺរ៉ុបបានលើកឡើងពីមូលហេតុនៃការកាត់លុយទៅឲ្យតួកគី ដោយផ្អែកតាមស្ថានភាពនៃលទ្ធិប្រជាធិបតេយ្យ សិទ្ធិមនុស្ស ការគោរពនីតិរដ្ឋ និងសេរីភាពសារព័ត៌មាន។ តំណាងចរចាថវិកាឆ្នាំ២០១៨ របស់សភាអឺរ៉ុប Siegfried Muresan និយាយថា បើតួកគីមិនគោរពសិទ្ធិមនុស្ស ប្រជាធិបតេយ្យ និងងាកឆ្ងាយពីស្ដង់ដាប្រជាធិបតេយ្យរបស់អឺរ៉ុប អឺរ៉ុបនឹងមិនផ្ដល់លុយតួកគីឡើយ។
ទំនាក់ទំនងអឺរ៉ុប និងតួកគី ចាប់ផ្ដើមល្អក់កករ បន្ទាប់ពីរដ្ឋប្រហារមិនបានសម្រេចក្នុងខែកក្កដា ឆ្នាំ២០១៦ ។ ក្រោយព្រឹត្តិការណ៍នេះ រដ្ឋាភិបាលក្រុងអង់ការ៉ាបានបើកយុទ្ធនាការស្វែងរកមេខ្លោងនៅពីក្រោយ និងបានកាត់ទោសមនុស្សជាច្រើន។ គ្រូបង្រៀន មន្ត្រីរាជការស៊ីវិល និងយោធា រាប់ពាន់នាក់ត្រូវបានបញ្ឈប់ពីការងារ ឯអ្នកសារព័ត៌មានមួយចំនួនត្រូវបានចាប់យកឃុំខ្លួន។ សិទ្ធិមនុស្សត្រូវបានបំពានធ្ងន់ធ្ងរ ខណៈលោក តៃយីប អ៊ែរដូហ្កាន់ បានកែរដ្ឋធម្មនុញ្ញបង្កើនអំណាចរបស់ខ្លួនឥតឈប់។
អឺរ៉ុប និងតួកគីកាន់តែមិនត្រូវគ្នា ក្រោយសភាអឺរ៉ុបពិភាក្សាលើផែនការកាត់ផ្ដាច់ហិរញ្ញវត្ថុទៅឲ្យតួកគីក្នុងចំនួនជាង៩៥លានដុល្លារ និងបង្កកទុកជាង៣៥លានដុល្លារ ក្នុងចំណោមទឹកប្រាក់សរុបចំនួនជិត២៦០លានដុល្លារ។ អឺរ៉ុបគ្រោងផ្ដល់ទឹកប្រាក់សន្ធឹកសន្ធាប់នេះទៅឲ្យតួកគីដើម្បីជំរុញកំណែទម្រង់នយោបាយ។ ការធ្លាក់ចុះស្ថានភាពសិទ្ធិមនុស្សនៅតួកគីក្នុងរយៈពេលលចុងក្រោយ រឹតតែធ្វើឲ្យអឺរ៉ុបមិនសប្បាយចិត្តខ្លាំង។
ការរឹតត្បិតសិទ្ធិសេរីភាពប្រជាជន ក៏ប៉ះពាល់ដល់ការចរចាចូលជាសមាជិកអឺរ៉ុបរបស់តួកគីដែរ។ សមាជិកអឺរ៉ុបជាច្រើនប្រទេស ជាពិសេសអាល្លឺម៉ង់បានចេញមុខជំទាស់សមាជិកភាពរបស់តួកគី និងបានប្រាប់ឲ្យក្រុងអង់ការ៉ាកែខ្លួនវិញ បើចង់ឲ្យការចរចាទៅមុខ។ ចំណែកឯលោក អ៊ែរដូហ្កាន់ វិញ ក៏ទំនងជាឆ្អែតចិត្តនឹងពាក្យគំរាមរបស់អឺរ៉ុប រហូតព្រលយពាក្យឌឺដងថា តួកគីលែងចង់ក្លាយជាសមាជិកអឺរ៉ុបហើយ៕
Tag:
អឺរ៉ុប
តួកគី
សិទ្ធិមនុស្ស
© រក្សាសិទ្ធិដោយ thmeythmey.com