ជាតិ
នាយករដ្ឋមន្ត្រីបង់ក្លាដែស មកទស្សនកិច្ចកម្ពុជា ពីថ្ងៃទី៣-៥ ខែធ្នូនេះ រូបភាព៖AFP
× លោកស្រី សេក្ខ ហាស៊ីណា (Sheikh Hasina) នាយករដ្ឋមន្ត្រីបង់ក្លាដែស ផ្តើមទស្សនកិច្ចផ្លូវការនៅកម្ពុជា ពីថ្ងៃទី៣ ដល់ ថ្ងៃទី០ ខែធ្នូនេះ។ បើតាមក្រសួងការបរទេសកម្ពុជា ក្នុងដំណើរទស្សនកិច្ចនេះ លោកស្រីនឹង ចូលបង្គំគាល់ព្រះមហាក្សត្រ ព្រមទាំងមានជំនួបដោយឡែក ជួបជាមួយថ្នាក់ដឹកនាំព្រឹទ្ធសភា និងរដ្ឋសភា និងជួបទ្វេភាគីជាមួយថ្នាក់ដឹកនាំរាជរដ្ឋាភិបាលកម្ពុជា។
លោកស្រី សេក្ខ ហាស៊ីណា (Sheikh Hasina) នាយករដ្ឋមន្ត្រីបង់ក្លាដែស មកបំពេញទស្សនកិច្ចផ្លូវការ នៅកម្ពុជា ពីថ្ងៃទី៣ ដល់ ថ្ងៃទី៥ ខែធ្នូនេះ។ នេះបើតាមសេចក្តីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិផ្សាយកាលពីថ្ងៃទី២ ខែធ្នូ។
តាមសេចក្តីជូនព័ត៌មានដដែល ក្នុងដំណើរទស្សនកិច្ចនេះ លោកស្រី សេក្ខ ហាស៊ីណា នឹងចូលក្រាបបង្គំគាល់ ព្រះករុណា ព្រះបាទ សម្ដេច ព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា។
លោកស្រី ក៏នឹងជួបសម្ដែងការគួរសមដោយឡែកពីគ្នាជាមួយ សម្ដេច សាយ ឈុំ ប្រធានព្រឹទ្ធសភា សម្ដេច ហេង សំរិន ប្រធានរដ្ឋសភា និងជំនួបទ្វេភាគីជាមួយសម្ដេចនាយករដ្ឋមន្ត្រីហ៊ុន សែន។ បន្ទាប់ពីជំនួបនេះ នាយករដ្ឋមន្ត្រីទាំង២ នឹងធ្វើជាអធិបតីក្នុងពិធី ចុះហត្ថលេខា លើឯកសារសហប្រតិបត្តិការមួយចំនួន នឹងបន្តប្រកាសព័ត៌មានរួមគ្នា។
ក្នុងអំឡុងទស្សនកិច្ចនេះដែរ នាយករដ្ឋមន្ត្រីបង់ក្លាដែសរូបនេះ នឹងចូលទៅគោរពព្រះវិញ្ញាណក្ខន្ធ អតីតព្រះមហាក្សត្រកម្ពុជា ព្រះករុណា ព្រះបាទសម្ដេច ព្រះនរោត្ដម សីហនុ ព្រះបរមរតនកោដ្ឋ និងទៅដាក់កម្រងផ្កានៅវិមានឯករាជ្យ ដើម្បីគោរពវិញ្ញាណក្ខន្ធវីរបុរស វីរនារីខ្មែរ ដែលបានពលីក្នុងសម័យសង្គ្រាមផងដែរ។ បន្ទាប់មក ទៅទស្សនាសារមន្ទីរប្រល័យពូជសាសន៍ទួលស្លែង និងចូលរួមជាអធិបតី ក្នុងកិច្ចសន្ទនាធុរកិច្ច រៀបចំដោយសភាពាណិជកម្ម។
តាមក្រសួងការបរទេស លោកស្រី សេក្ខ ហាស៊ីណា ធ្លាប់ទស្សនកិច្ចផ្លូវការលើកទី១នៅកម្ពុជា នាឱកាសសន្និសីទសមាគមសភាអាស៊ីសម្រាប់សន្តិភាព នៅភ្នំពេញ នាឆ្នាំ២០០១ ហើយទស្សនកិច្ចផ្លូវការរបស់លោកស្រីនៅពេលនេះ បង្ហាញពីការពង្រឹងចំណងមិត្តភាព ដែលប្រទេសទាំងពីរបានថែរក្សាកន្លងមក៕
Tag:
ទស្សនកិច្ច
បង់ក្លាដែស
© រក្សាសិទ្ធិដោយ thmeythmey.com