ជាតិ
ក្រសួងទេសចរណ៍បង្គាប់ឲ្យភ្នាក់ងារទេសចរណ៍ អនុវត្តក្រមវិជ្ជាជីវៈឲ្យបានត្រឹមត្រូវ រូបហ្វេសប៊ុក៖ លោក ថោង ខុន រដ្ឋមន្រ្តីក្រសួងទេសចរណ៍
× ក្រសួងទេសចរណ៍ បានណែនាំឲ្យការីទេសចរណ៍ និងភ្នាក់ងារទេចរណ៍ អនុវត្តក្រមប្រតិបត្តិវិជ្ជាជីវៈ និងក្រមសីលធម៌វិជ្ជាជីវៈឲ្យបានត្រឹមត្រូវ ដើម្បីចូលរួមពង្រឹងគុណភាពក្នុងការផ្ដល់សេវាកម្ម លើកកម្ពស់សីលធម៌សង្គម និងលើកស្ទួយវិស័យទេសចរណ៍នៅកម្ពុជា។
ការអនុវត្តក្រមប្រតិបត្តិវិជ្ជាជីវៈ និងក្រមសីលធម៌វិជ្ជាជីវៈ ដែលការីនិងភ្នាក់ងារទេសចរណ៍ ត្រូវរៀបចំឲ្យមានតម្លាភាព និងប្រសិទ្ធភាពចំពោះភ្ញៀវ ដែលបានទិញសេវាកម្ម ឬកញ្ចប់ទស្សនកិច្ចតាមស្ដង់ដារជាតិ-អន្តរជាតិ ដើម្បីឲ្យពួកគេមានទំនុកចិត្ត និងកក់ក្ដៅក្នុងដំណើរកម្សាន្ត។ នេះបើតាមក្រសួងទេសចរណ៍ ។
សេចក្ដីប្រកាសរបស់ក្រសួងទេសចណ៍ ថ្ងៃទី២៧ ខែកក្កដា ឆ្នាំ២០១៧ បានបញ្ជាក់ថា ៖«ក្រមប្រតិបត្តិវិជ្ជាជីវៈ មានគោលបំណងការពារ និងពង្រឹងប្រសិទ្ធភាពនៃ ការប្រតិបត្តិវិជ្ជាជីវៈការី-ភ្នាក់ងារទេសចរណ៍ មិនត្រឹមតែប៉ុណ្ណោះដើម្បីធានានូវសេចក្ដីថ្លៃថ្នូររបស់ពួកគេក្នុងការប្រកបរបរវិជ្ជាជីវៈ ហើយនិងបង្កើននូវទំនុកចិត្តពីភ្ញៀវទេសចរ។ចំណែកឯក្រមសីលធម៌វិជ្ជាជីវៈ មានគោលបំណងគឺ រួមចំណែកលើកកម្ពស់សីលធម៌សង្គម និងសុជីវធម៌ លើកកម្ពស់កិត្យានុភាពរបស់កម្ពុជា ដែលជាគោលដៅទេសចរណ៍វប្បធម៌ និងធម្មជាតិ។ ដោយធានាថា គ្រប់ការី-ភា្នក់ងារទេសចរណ៍ត្រូវប្រកាន់យកនូវការបម្រើសេវាកម្មទៅតាមស្ដង់ដារ ដែលប្រកដោយស្មារតីទទូលខុសត្រូវ យកចិត្តទុកដាក់ខ្ពស់ មានភាពជាក់លាក់ និងស្មោះត្រង់…»។
បន្ថែមពីនេះក្រសួងទេសចរណ៍ ក៏បានរំឮកពីទោសទណ្ឌ ដែលមានចែងក្នុងច្បាប់ ទាក់ទងនឹងក្រមប្រតិបត្តិវិជ្ជាជីវៈ ការី-ភា្នក់ងារទេសចរណ៍ផងដែរ។ ជំពូកទី៤ មាត្រា១៨ នៃក្រមប្រតិបត្តិវិជ្ជាជីវៈ ការី-ភា្នក់ងារទេសចរណ៍ លើកឡើងថា រាល់ការអនុវត្តវិជ្ជាជីវៈ ការី-ភា្នក់ងារទេសចរណ៍ ទាំងឡាយណាដែលមិនគោរព និងអនុវត្តន៍តាមបទប្បញ្ញត្តិ ដែលមានចែងក្នុងក្រមនេះ អាចត្រូវបានស៊ើបអង្កេតដោយមន្ត្រីអធិការកិច្ចទេសចរណ៍នៃក្រសួងទេសចរណ៍ ឬរដ្ឋបាលថ្នាក់ក្រោមជាតិ។ មាត្រាដដែលនេះ បន្ថែមថា ក្រោយពីការស៊ើបអង្កេត ក្រសួងទេសចរណ៍ ឬរដ្ឋបាលថ្នាក់ក្រោមជាតិត្រូវចេញលិខិតព្រមានជាលាយលក្ខណ៍អក្សរដល់ ការី-ភា្នក់ងារទេសចរណ៍ ដែលបានប្រព្រឹត្តខុស។ ករណីទទួលបានលិខិតព្រមានហើយ មិនរាងចាលត្រូវទទួលទណ្ឌកម្ម…។
បច្ចុប្បន្នមានអាជីវកម្មការីទេសចរណ៍ និងភ្នាក់ងារទេសចរណ៍ចំនួន ៦៨២ក្រុមហ៊ុន ក្នុងនោះសាខាមានចំនួន៨៨។ ក្រសួងទេសចរណ៍បានផ្តល់អាជ្ញាប័ណ្ណ ដល់ការីទេសចរណ៍នាំភ្ញៀវចូលក្នុងប្រទេស ចំនួន៤៨៧ និងនាំភ្ញៀវចេញក្រៅប្រទេសចំនួន៤៩ ហើយនិងនាំភ្ញៀវកម្សាន្តក្នុងស្រុកចំនួន៤៤ រីឯភ្នាក់ងារទេសចរណ៍ ចំនួន២៣៨។ នេះបើតាមរបាយការណ៍ក្រសួងទេសចរណ៍៕
Tag:
ទេសចរណ៍
ការី-ភា្នក់ងារទេសចរណ៍
© រក្សាសិទ្ធិដោយ thmeythmey.com