អន្តរជាតិ
អតីតមន្ត្រីរដ្ឋបាល ត្រាំ កុហក FBI រឿងលួចទាក់ទងជាមួយរុស្ស៊ី អតីតទីប្រឹក្សាសន្តិសុខជាតិអាមេរិក ម៉ៃឃើល ហ្វ្លីន ដើរចេញពីតុលាការ (រូបភាព៖ Xinhua)
× អតីតទីប្រឹក្សាសន្តិសុខជាតិ ម៉ៃឃើល ហ្វ្លីន (Michael Flynn) បានសារភាពថា បានកុហកការិយាល័យស៊ើបអង្កេតសហព័ន្ធ (FBI) ជុំវិញទំនាក់ទំនងសម្ងាត់ជាមួយទូតរុស្ស៊ីកាលពីឆ្នាំ២០១៦ ។ លោក ហ្វ្លីន បានប្រកាសសហការជាមួយក្រុមស៊ើបអង្កេតពិសេសដើម្បីគាស់កកាយសំណុំរឿងរុស្ស៊ីលូកលាន់កិច្ចការបោះឆ្នោតអាមេរិក និងទំនាក់ទំនងរវាងមនុស្សជំនិតរបស់លោក ដូណាល់ ត្រាំ ជាមួយរុស្ស៊ី មុនពេលលោក ត្រាំ ចូលកាន់តំណែង។
ឧត្តមសេនីយ៍ចូលនិវត្តន៍ ម៉ៃឃើល ហ្វ្លីន គឺជាអតីតមន្ត្រីរដ្ឋបាលប្រធានាធិបតី ដូណាល់ ត្រាំ ដំបូងគេ ដែលសារភាពថាបាននិយាយមិនពិតប្រាប់ FBI ជុំវិញសំណុំរឿងកកូរកកាយការបោះឆ្នោតឆ្នាំ២០១៦ ដែលកំពុងស៊ើបអង្កេតដោយលោក Robert Mueller ។ ការសារភាពនេះ នឹងផ្ដល់ពន្លឺខ្លះដល់ការស្វែងរកការពិតនៃទំនាក់ទំនងរវាងរុស្ស៊ី និងមន្ត្រីជំនិតរបស់លោក ត្រាំ ទោះជាលោក ត្រាំ បដិសេធរាប់ដងហើយក្ដី។
បើតាមទីភ្នាក់ងារព័ត៌មាន Reuters លោក ហ្វ្លីន បានប្រាប់តុលាការក្នុងទីក្រុងវ៉ាស៊ិនតោនថា លោក បានកុហក ពេល FBI សួរលោកពីជំនួបរវាងលោក និងអគ្គរដ្ឋទូតរុស្ស៊ីប្រចាំអាមេរិក Sergei Kislyak ក្នុងខែធ្នូ គឺប៉ុន្មានថ្ងៃមុនលោក ត្រាំ ចូលកាន់តំណែង។ ក្រុមរដ្ឋអាជ្ញាអះអាងថា មានមន្ត្រីពីរនាក់បាននិយាយរឿងទណ្ឌកម្មអាមេរិកជាមួយទូតរុស្ស៊ី ហើយលោក ហ្វ្លីន បានស្នើឲ្យលោក Kislyak ជួយពន្យារពេលការបោះឆ្នោតនៅអង្គការសហប្រជាជាតិស្ដីពីបញ្ហាអ៊ីស្រាអែល ដែលនេះអាចចាត់ទុកបានថាជាការបង្កបញ្ហាសម្រាប់នយោបាយការបរទសរបស់លោក បារ៉ាក់ អូបាម៉ា ។
អ្វីគួរឲ្យចាប់អារម្មណ៍នោះ កូនប្រសារលោក ត្រាំ គឺ Jared Kushner ក៏ទំនងជាត្រូវជាប់ពាក់ព័ន្ធសំណុំរឿងនេះដែរ។ ក្រុមរដ្ឋអាជ្ញានិយាយថា មន្ត្រីជាន់ខ្ពស់នៃក្រុមការងារលោក ត្រាំ បានប្រាប់ឲ្យលោក ហ្វ្លីន ទាក់ទងរុស្ស៊ី និងរដ្ឋាភិបាលបរទេសផ្សេងទៀតមុនការបោះឆ្នោតខាងលើដែរ។ ប្រភពជាច្រើនបញ្ជាក់ថា មន្ត្រីជាន់ខ្ពស់នោះ គ្មាននរណាក្រៅពីលោក Kushner ដែលបច្ចុប្បន្នជាទីប្រឹក្សាជាន់ខ្ពស់នៅសេតវិមានឡើយ។
ទាក់ទងបញ្ហានេះ Abbe Lowell មេធាវីលោក Kushner ធ្លាប់លើកឡើងថា កូនក្ដីរបស់លោកនឹងសហការជានិច្ចសម្រាប់ការស៊ើបអង្កេតនានា។ ដោយឡែក មេធាវីសេតវិមានម្នាក់និយាយថា ការសារភាពរបស់លោក ហ្វ្លីន មិនបានចង្អុលមុខអ្នកផ្សេងឡើយ ក្រៅពីខ្លួនលោកឡើយ។ យ៉ាងណាក្ដី កូនប្រសារលោក ត្រាំ នៅតែប្រឈមមុខបញ្ហាដដែល បើចម្លើយរបស់ខ្លួន ខុសពីសម្ដីសារភាពលោក ហ្វ្លីន នោះ។
ក្រុមស៊ើបអង្កេតពិសេសរបស់លោក Mueller កំពុងវែកមុខសមាជិកក្រុមការងាររបស់លោក ត្រាំ លើសសំណុំរឿងជាមួយរុស្ស៊ី ដែលសូម្បីលោក ត្រាំ ផ្ទាល់ក៏អាចជាប់ពាក់ព័ន្ធដែរ។ លោក ត្រាំ អាចរួចខ្លួន ក្នុងករណីរកឃើញថា លោកបញ្ជាឲ្យលោក ហ្វ្លីន ទាក់ទងមន្ត្រីរុស្ស៊ី តែលោកនឹងប្រឈមមុខផ្លូវច្បាប់មិនខាន បើក្រុមពិសេសរកឃើញថា លោកបានបញ្ជាឲ្យលោក ហ្វ្លីន ផ្ដល់សក្ខីកម្មក្លែងក្លាយទៅឲ្យ FBI នោះ៕
Tag:
អាមេរិក
រុស្ស៊ី
ដូណាល់ ត្រាំ
Michael Flynn
© រក្សាសិទ្ធិដោយ thmeythmey.com