ជាតិ
សម្តេច ហ៊ុន សែន ប្រកាសឡើងវិញថា មិនបិទមជ្ឈមណ្ឌលសិទ្ធិមនុស្សកម្ពុជានោះទេ រូបភាព៖ សម្តេច ហ៊ុន សែន ស្ថិតក្នុងពិធីបួងសួងសុំសេចក្តីសុខ ដែលរៀបចំឡើងនៅមុខប្រាសាទអង្គរវត្ត នៅរសៀលថ្ងៃទី២ ខែធ្នូ ឆ្នាំ២០១៧
× ភ្នំពេញ៖ មជ្ឈមណ្ឌលសិទ្ធិមនុស្សកម្ពុជា (CCHR) អាចធ្វើសកម្មភាពរបស់ខ្លួនតទៅទៀត ដោយមិនរងការបិទចោលនោះទេ។ សម្តេច ហ៊ុន សែន នាយករដ្ឋមន្ត្រីកម្ពុជា បានប្រកាសយ៉ាងដូច្នេះ ទៅកាន់សារព័ត៌មានហ្វ្រេសញូ (Fresh News)។
ការប្រកាសខាងលើ គឺធ្វើឡើងក្នុងពេលសម្តេច ហ៊ុន សែន កំពុងស្ថិតក្នុងពិធីបួងសួងចម្រើនសេចក្តីសុខ នៅមុខប្រាសាទអង្គការវត្ត នៅរសៀលថ្ងៃទី២ ខែធ្នូ ឆ្នាំ២០១៧នេះ។ ហ្វ្រេសញូ បានស្រង់ប្រសាសន៍សម្តេច ហ៊ុន សែន យ៉ាងដូច្នេះថា៖«រដ្ឋាភិបាល សម្រេចរក្សាទុកមជ្ឈមណ្ឌលនេះដដែល ដោយឲ្យស្ថាប័ននេះ នៅបម្រើសកម្មភាពសិទ្ធិមនុស្សនៅកម្ពុជាបន្តទៀត»។
បើតាមសម្តេច ហ៊ុន សែន ការសម្រេចឲ្យមជ្ឈមណ្ឌលសិទ្ធិមនុស្សកម្ពុជា បន្តសកម្មភាពរបស់ខ្លួន គឺដោយសារតែក្រសួងមហាផ្ទៃ រកមិនឃើញទោសកំហុសណាមួយរបស់អង្គការផ្នែកសិទ្ធិមនុស្សដ៏ធំមួយនេះ។
ជុំវិញបញ្ហានេះ សារព័ត៌មានថ្មីៗ មិនអាចសុំការឆ្លើយតបពីលោកស្រី ចក់ សុភាព ដែលជាប្រធានមជ្ឈមណ្ឌលសិទ្ធិមនុស្សកម្ពុជាបានទេ ដោយសារតែលោកស្រី មិនលើកទូរសព្ទ។
កាលពីប៉ុន្មានថ្ងៃមុន សម្តេច ហ៊ុន សែន បានស្នើឲ្យក្រសួងមហាផ្ទៃ ស្រាវជ្រាវផ្លូវច្បាប់ ដើម្បីបិទមជ្ឈមណ្ឌលសិទ្ធិមនុស្សកម្ពុជាចោល ដោយចោទថាស្ថិតនៅក្រោមការបង្គាប់បញ្ជារបស់បរទេស ជាពិសេសអង្គការក្រៅរដ្ឋាភិបាលមួយនេះ ត្រូវបានបង្កើតឡើងដោយលោក កឹម សុខា អតីតប្រធានគណបក្សសង្គ្រោះជាតិ ដែលកំពុងជាប់ឃុំក្នុងពន្ធនាគារ ក្រោមការសង្ស័យពីអំពើក្បត់ជាតិ៕
© រក្សាសិទ្ធិដោយ thmeythmey.com