ជាតិ
លោក ព្រាប កុល៖ អំពើពុករលួយតូចៗនៅកម្ពុជាថយចុះខ្លាំង
× ភ្នំពេញ៖ លោក ព្រាប កុល នាយកប្រតិបត្តិអង្គការតម្លាភាពកម្ពុជា បានលើកឡើងដោយយោងលើរបាយការណ៍ស្រាវជ្រាវមួយថា អំពើពុករលួយទ្រង់ទ្រាយតូចនៅកម្ពុជា បានថយចុះខ្លាំងគួរឲ្យកត់សម្គាល់។ ប៉ុន្តែអំពើពុករលួយទ្រង់ទ្រាយធំវិញ លោក ព្រាប កុល ដែលបានថ្លែងនៅក្នុងពិធីប្រគល់រង្វាន់អ្នកសារព័ត៌មានឆ្នើមសម្រាប់ការរាយការណ៍អំពីអំពើពុករលួយ នៅថ្ងៃទី២៧ខែវិច្ឆិកា មិនបានអះអាងពីការថយចុះ ឬកើនឡើងនោះឡើយ។ យ៉ាងណាមិញលោកសង្កេតឃើញថា រដ្ឋាភិបាលហាក់មិនមានចំណាត់ការផ្តោតខ្លាំងលើអំពើពុករលួយធំៗនោះទេ។
ប្រសាសន៍លោក ព្រាប កុល ៖
បើតាមលោក ព្រាប កុល របាយការណ៍ស្ទង់មតិមួយរបស់អង្គការតម្លាភាពអន្តរជាតិ ដែលចេញផ្សាយនៅដើមឆ្នាំ២០១៧ កន្លងទៅនេះ បានបង្ហាញថា អំពើពុករលួយតូចៗជារួមបានថយចុះគួរឲ្យកត់សម្គាល់។ លោកបន្តថា ក្នុងចំណោមអំពើពុករលួយតូចៗ អំពើពុករលួយដែលត្រូវបានប្រព្រឹត្តក្នុងសេវាសាធារណៈ ដូចជា ការធ្វើអត្តសញ្ញាណបណ្ណ, សេវាសុខាភិបាល, ការអប់រំ, សេវាទឹក-អគ្គិសនី និងសេវាដែលផ្ដល់ដោយនគរបាល បានថយចុះយ៉ាងគំហុក។
លោក ព្រាប កុល អះអាងថា សមិទ្ធិផលខាងលើនេះកើតឡើងដោយសារកំណែទម្រង់សេវាសាធារណៈរបស់រដ្ឋាភិបាល ព្រមទាំងមានការចូលរួមអប់រំផ្សព្វផ្សាយរបស់អង្គការសង្គមស៊ីវិល និងបណ្ដាញសារព័ត៌មាន។ ទន្ទឹមនឹងសរសើរលើចំណាត់ការរបស់រដ្ឋាភិបាលលើអំពើពុករលួយតូចៗ លោក ព្រាប កុល បានលើកឡើងថា រដ្ឋាភិបាលពុំសូវផ្ដោតចិត្តទុកដាក់ខ្លាំងលើអំពើពុករលួយទ្រង់ទ្រាយធំនៅឡើយទេ។
លោក ព្រាប កុល ថ្លែងយ៉ាងដូច្នេះថា«យើងអត់ទាន់ឃើញការយកចិត្តទុកដាក់ខ្លាំងលើអំពើពុករលួយធំៗ ដូចជា ការគ្រប់គ្រងធនធានធម្មជាតិ, ការងារលទ្ធកម្មដេញថ្លៃ, ការនាំចេញផលិតផលធំៗទៅក្រៅប្រទេស ឬក៏ទាក់ទងការធ្វើជំនួយទ្រង់ទ្រាយធំផ្សេងៗនៅឡើយទេ»។
ទាក់ទងនឹងអំពើពុករលួយធំៗ លោក ព្រាប កុល ថ្លែងថាមិនមានរបាយការណ៍ណាមួយបញ្ជាក់ពីការថយចុះនោះទេ។ លោកប្រាប់យ៉ាងដូចនេះថា៖«មិនមែនខ្ញុំថា អំពើពុករលួយធំៗមិនបានថយចុះនោះទេ ប៉ុន្តែខ្ញុំមិនមានភស្តុតាងបញ្ជាក់ថាបានថយនោះទេ»។
ចំពោះបញ្ហានេះ លោក នួន សុធិមន្ត អគ្គនាយករងប្រតិបត្តិការនៃអង្គភាពប្រឆាំងអំពើពុករលួយ (ACU) បានមានប្រសាសន៍ថា ACU មានសមត្ថកិច្ច និងបេសកកម្មប្រឆាំងអំពើពុករលួយទាំងទ្រង់ទ្រាយតូច និងធំ។
ថ្លែងនៅក្នុងពិធីខាងលើនោះផងដែរ លោក នួន សុធិមន្ត អះអាងថា អំពើពុករលួយជារួមបានថយចុះ។ លោកលើកឡើងដូច្នេះថា៖«អំពុករលួយជារួម យើងសង្កេតឃើញថាមានការថយចុះ ទាំងតូច ទាំងធំ បើទោះបីយើងមិនមើលឃើញនឹងភ្នែកក៏ដោយ ប៉ុន្តែតាមរយៈវិធានការ បេសកកម្មរបស់យើង យើងអាចចេញជាលទ្ធផលថាមិនមានសកកម្មភាពណាធ្វើឲ្យខ្វល់ដូចពាក្យកន្លងមកទេ»៕
Tag:
អំពើពុករលួយ
ព្រាប កុល
© រក្សាសិទ្ធិដោយ thmeythmey.com