អន្តរជាតិ
ប្រមុខការទូតរុស្ស៊ី៖ ជប៉ុននិងកូរ៉េខាងត្បូងរងគ្រោះមុនគេ បើសង្គ្រាមផ្ទុះឡើងនៅឧបទ្វីបកូរ៉េ
× រដ្ឋមន្ត្រីការបរទេសរុស្ស៊ី Sergey Lavrov បានព្រមានថា ជប៉ុន និងកូរ៉េខាងត្បូង គឺជាជនរងគ្រោះដំបូងគេ បើសង្គ្រាមនៅឧបទ្វីបកូរ៉េពិតជាកើតឡើងមែន។ ប្រមុខការទូតរុស្ស៊ី ដែលទើបតែទាត់ចោលសំណើរបស់អាមេរិកដែលចង់ឲ្យពិភពលោកផ្ដាច់ទំនាក់ទំនងជាមួយកូរ៉េខាងជើង និយាយត្រង់ថា អាមេរិកតែងរករឿងកូរ៉េខាងជើងដូចជាការធ្វើសមយុទ្ធជាបន្តបន្ទាប់។ ឯកូរ៉េខាងជើងក៏យកសមយុទ្ធនេះធ្វើលេសដើម្បីអភិវឌ្ឍកម្មវិធីនុយក្លេអ៊ែររបស់ខ្លួន ដែលបង្កការគំរាមពេញពិភពលោកតែម្ដង។
ជប៉ុន និងកូរ៉េខាងត្បូង ត្រូវបានអាមេរិកអូសទាញឲ្យចូលរួមសកម្មភាពបង្ករឿងប្រឆាំងកូរ៉េខាងជើង ហើយប្រទេសទាំងពីរនេះ នឹងរងគ្រោះមុនគេ ពេលជម្លោះប្រដាប់អាវុធផ្ទុះឡើងនៅឧបទ្វីបកូរ៉េ។ នេះជាការព្រមានប្រមុខការទូតរុស្ស៊ី Sergey Lavrov ក្នុងកិច្ចសម្ភាសជាមួយទូរទស្សន៍បេលឡារុស។ បើតាមសម្ដីលោក Lavrov អាមេរិកតែងធ្វើទង្វើបង្កហេតុជាញឹកញាប់ ដែលទំនងចង់ឲ្យកូរ៉េខាងជើងធ្លាក់ចូលក្នុងល្បិចបង្ករឿងរបស់ខ្លួន។
លោក Lavrov បញ្ជាក់ថា នៅពេលដែលថ្កោលទោសការផ្សងព្រេងកម្មវិធីនុយក្លេអ៊ែររបស់កូរ៉េខាងជើង រុស្ស៊ីក៏ត្រូវរិះគន់ទង្វើញុះញង់របស់អាមេរិកដែរ។ កាន់តែអកុសលនោះ អាមេរិកកំពុងព្យាយាមអូសទាញជប៉ុន និងកូរ៉េខាងត្បូងឲ្យដើរលើផ្លូវតែមួយ ដែលនាំឲ្យរដ្ឋទាំងពីរក្លាយជាជនរងគ្រោះក្នុងជម្លោះមិនខាន។ នេះបើតាមការផ្សាយរបស់សារព័ត៌មានរុស្ស៊ី RT ។
នៅមុននេះ រដ្ឋមន្ត្រីការបរទេសរុស្ស៊ីរូបនេះក៏បានព្រលះអាមេរិករួចម្ដងហើយជុំវិញការបន្តចាក់សាំងលើវិបត្តិនុយក្លេអ៊ែរកូរ៉េខាងជើងនោះ។ រុស្ស៊ីមើលឃើញរឿងអវិជ្ជមានច្រើនពាក់ព័ន្ធសកម្មភាពក្រុងវ៉ាស៊ីនតោនក្នុងសំណុំរឿងនេះ ហើយជឿថា ដាក់ទណ្ឌកម្មទាំងអម្បាលម៉ាន លែងមានប្រសិទ្ធភាពទៀតហើយ។ លោក Lavrov ធ្លាប់អះអាងថា សកម្មភាពបង្ករឿងកន្លងមករបស់អាមេរិក គឺបានជំរុញឲ្យកូរ៉េខាងជើងបង្កបញ្ហាកាន់តែច្រើនឡើងទៅវិញ។
ជុំវិញទង្វើរបស់អាមេរិក លោក Lavrov បានរំឭកពីការសន្យារបស់អាមេរិកក្នុងខែកញ្ញាដែលថា សមយុទ្ធលើកក្រោយរបស់ខ្លួននឹងចាប់ផ្ដើមនៅរដូវផ្ការីកឆ្នាំក្រោយ។ ដោយសារតែការសន្យានេះ រុស្ស៊ីបានប្រឹងប្រែងបញ្ចុះបញ្ចូលកូរ៉េខាងជើងឲ្យរក្សាភាពស្ងៀមស្ងាត់ដើម្បីសន្តិភាព និងស្ថិរភាពតំបន់។ ការផ្អាកសមយុទ្ធរបស់អាមេរិក និងកូរ៉េខាងត្បូង គឺជាសញ្ញានាំទៅរកស្ថានភាពល្អប្រសើរសម្រាប់ការចរចាមិនខាន។
ការសន្យារបស់អាមេរិកមិនមានអាយុវែងឡើយ។ ក្រុងវ៉ាស៊ិនតោនបានរៀបចំសមយុទ្ធជាបន្តបន្ទាប់ក្នុងខែតុលា វិច្ឆិកា និងខែធ្នូនេះទៀត ដោយលោក Lavrov ជឿថា ក្រុងវ៉ាស៊ិនតោនចង់រករឿងក្រុងព្យុងយ៉ាងតែម្ដង។ នៅថ្ងៃទី៣ ខែធ្នូ សមយុទ្ធរួមគ្នាអាមេរិក និងកូរ៉េខាងត្បូងចាប់ផ្ដើមហើយនៅសមុទ្រខាងកើត ដែលសមយុទ្ធនេះធ្វើឡើងប៉ុន្មានថ្ងៃក្រោយកូរ៉េខាងជើងបាញ់មីស៊ីលប្រភេទថ្មី ហើយត្រូវអះអាងថា បាញ់ដល់គ្រប់ផ្នែករបស់អាមេរិក៕
Tag:
រុស្ស៊ី
ជប៉ុន
អាមេរិក
កូរ៉េខាងត្បូង
កូរ៉េខាងជើង
Sergey Lavrov
© រក្សាសិទ្ធិដោយ thmeythmey.com