អន្តរជាតិ
អូបាម៉ា ចង់ឃើញស្ត្រីកាន់អំណាចឲ្យបានច្រើន ព្រោះបុរសសព្វថ្ងៃសម្បូរបញ្ហាពេក
× អតីតប្រធានាធិបតីអាមេរិក បារ៉ាក់ អូបាម៉ា បាននិយាយរិះគន់ការដឹកនាំប្រទេសរបស់មេដឹកនាំជាបុរស ដែលចោមរោមដោយបញ្ហាមិនចេះអស់។ អតីតប្រមុខអាមេរិករូបនេះចង់ឃើញស្ត្រីកាន់តែច្រើនគ្រប់គ្រងប្រទេសជាតិ ព្រោះពួកគេមានអាកប្បកិរិយាចុះសម្រុងក្នុងសង្គមជាងបុរស។ និយាយដល់រឿងនេះ លោក អូបាម៉ា ក៏ឆ្លៀតរិះគន់លោក ដូណាល់ ត្រាំ ប្រធានាធិបតីបច្ចុប្បន្នរបស់អាមេរិក ដែលសម្រេចចិត្តដើរចេញពីកិច្ចព្រមព្រៀងអាកាសធាតុពិភពលោកឆ្នាំ២០១៥ ។
អតីតប្រធានាធិបតីស្បែកខ្មៅ លោក បារ៉ាក់ អូបាម៉ា បានប្រកាសលើកតម្កើងភាពជាអ្នកដឹកនាំរបស់ស្ត្រីក្នុងការដឹកនាំប្រទេស ដោយលោកយល់ថា បុរសសព្វថ្ងៃនេះបង្កបញ្ហាច្រើនណាស់។ លោក អូបាម៉ា ទំនងចង់និយាយរឿងអាស្រូវបៀតបៀនផ្លូវភេទដែលកំពុងកើតឡើងព្រោងព្រាតក្នុងចំណោមអ្នកនយោបាយ និងសិល្បករល្បីឈ្មោះជាច្រើននាក់នៅអាមេរិក។
ក្នុងជំនួបជាមួយពាណិជ្ជករធំៗក្នុងរដ្ឋធានីប៉ារីសនៅថ្ងៃទី២ ខែធ្នូ លោក អូបាម៉ា បានបង្ហាញគំនិតរបស់លោកដែលចង់ឲ្យការផ្ដោតការយកចិត្តទុកដាក់ឲ្យបានច្រើនលើការផ្ដល់អំណាចទៅឲ្យស្ត្រី។ «មិនមែននិយាយជាទូទៅទេ ប៉ុន្តែស្ត្រីហាក់មានសមត្ថភាពខ្ពស់ជាងបុរស ដោយមួយផ្នែកព្រោះតែការចុះសម្រុងជាមួយគេឯងរបស់ស្ត្រី»។ នេះជាការបញ្ជាក់របស់លោក អូបាម៉ា ដែលផ្សាយដោយទីភ្នាក់ងារព័ត៌មាន AFP ។
ឆ្លៀតឱកាសនោះ អតីតប្រធានាធិបតីទី៤៤ ក៏បាននិយាយរិះគន់ចំៗអ្នកស្នងតំណែងរបស់ខ្លួន គឺប្រធានាធិបតីទី៤៥ ដូណាល់ ត្រាំ ។ លោក អូបាម៉ា បានបង្ហាញការខកចិត្តចំពោះលោក ត្រាំ ដែលដកខ្លួនចេញពីកិច្ចព្រមព្រៀងទីក្រុងប៉ារីសស្ដីពីការប្រែប្រួលអាកាសធាតុ។ គឺលោក អូបាម៉ា នេះហើយ ដែលនាំអាមេរិកចូលកិច្ចព្រមព្រៀងពិភពលោកមួយនេះ ប៉ុន្តែលោក ត្រាំ យល់ថា កិច្ចព្រមព្រៀងនេះប៉ះពាល់សេដ្ឋកិច្ចអាមេរិក ហើយក៏សម្រេចចិត្តដើរចេញតែម្ដង។
ចំពោះមុខអ្នកចូលរួមក្នុងវេទិកា Les Napoleons លោក អូបាម៉ា ចាត់ទុកការដើរចេញរបស់អាមេរិកពីកិច្ចព្រមព្រៀងទីក្រុងប៉ារីសក្រោមរដ្ឋបាលលោក ត្រាំ ជាអវត្តមានបណ្ដោះអាសន្ននៃការដឹកនាំរបស់អាមេរិកស្ដីពីបញ្ហាបម្រែបម្រួលអាកាសធាតុ។ ប៉ុន្តែអតីតមេដឹកនាំអាមេរិកវ័យ៥៦ឆ្នាំរូបនេះ ក៏បានសរសើរការប្ដេជ្ញាចិត្តរបស់ប្រទេសផ្សេងក្នុងការដោះស្រាយបញ្ហាពិភពលោកមួយនេះ ទោះជាគ្មានវត្តមានអាមេរិកក្ដី។
ការលើកឡើងរបស់អតីតប្រធានាធិបតីអាមេរិកខាងលើ អាចនិយាយបានថា លោក អូបាម៉ា នៅតែមិនតែអស់ចិត្តនឹងការក្លាយជាប្រធានាធិបតីអាមេរិករបស់លោក ត្រាំ ដែលផ្ដួលលោកស្រី ហ៊ីឡារី គ្លីនតុន ក្នុងការបោះឆ្នោតឆ្នាំ២០១៦ ។ លោក អូបាម៉ា បានគាំទ្រលោកស្រី គ្លីនតុន សម្រាប់តំណែងប្រធានាធិបតី ប៉ុន្តែនៅតែចាញ់លោក ត្រាំ ។ ក្រោមការដឹកនាំរបស់លោក ត្រាំ នយោបាយអាមេរិកបានប្រែប្រួលស្ទើរទាំងស្រុងទៅហើយ ឯតំណែងបងធំពិភពលោក ក៏លែងសូវមានន័យដែរ៕
Tag:
អាមេរិក
បារ៉ាក់ អូបាម៉ា
ដូណាល់ ត្រាំ
ហ៊ីឡារី គ្លីនតុន
© រក្សាសិទ្ធិដោយ thmeythmey.com