អន្តរជាតិ
អាមេរិកនិងកូរ៉េខាងត្បូងធ្វើសមយុទ្ធដែនអាកាស ដោយមិនខ្វល់ការគំរាមរបស់កូរ៉េខាងជើង យន្តហោះចម្បាំងចំបាំងកាយ F-22 Raptor របស់អាមេរិក (រូបភាព៖ Reuters)
× សមយុទ្ធដែនអាកាសរួមគ្នារបស់អាមេរិក និងកូរ៉េខាងត្បូង បានចាប់ផ្ដើមនៅថ្ងៃទី៤ ខែធ្នូនេះ ទោះជាកូរ៉េខាងជើងបានព្រមានពីគ្រោះថ្នាក់ក្ដី។ យន្តហោះចម្បាំង២៣០គ្រឿង និងទាហានប្រទេសទាំងពីរជាង១២០០០នាក់ បានចូលរួមក្នុងសមយុទ្ធទ្រង់ទ្រាយធំនេះ ដែលធ្វើឡើងប៉ុន្មានថ្ងៃប៉ុណ្ណោះ ក្រោយកូរ៉េខាងជើងសាកល្បងមីស៊ីល Hwasong-15 ។ កូរ៉េខាងជើងចាត់ទុកសមយុទ្ធនេះជាការបង្ករឿងដែលអាចឈានដល់ការផ្ទុះសង្គ្រាមនុយក្លេអ៊ែគ្រប់ពេល។
សមយុទ្ធដែនអាកាសរួមគ្នាអាមេរិក និងកូរ៉េខាងត្បូង Vigilant ACE នឹងធ្វើឡើងរយៈពេល៥ថ្ងៃ ចាប់ពីថ្ងៃទី៤ ដល់ថ្ងៃទី៨ ខែធ្នូ នៅតំបន់សមុទ្រខាងកើត ស្របពេលដែលកូរ៉េខាងជើងព្រមានផ្ទុះសង្គ្រាម។ នេះជាសមយុទ្ធដែនអាកាសធំជាងគេក្នុងចំណោមសមយុទ្ធកន្លងមករបស់សម្ព័ន្ធមិត្តទាំងពីរនេះ ដោយមានការចូលរួមយន្តហោះចម្បាំងទំនើបៗជាច្រើនគ្រឿង រួមនឹងទាហានជាច្រើនទៀត។ អាមេរិកក៏បានបញ្ជូនយន្តហោះបំបាំងកាយមួយចំនួនផងដែរ។
បើតាមការប្រកាសរបស់កងទ័ពអាកាសទី៧ នៃកងទ័ពអាមេរិក យន្តហោះបំបាំងកាយ F-22 Raptors ចំនួន៦គ្រឿង និងយន្តហោះ F-35A ចំនួន៦គ្រឿង ត្រូវបានពង្រាយនៅកូរ៉េខាងត្បូងបណ្ដោះអាសន្នដើម្បីចូលរួមក្នុងសមយុទ្ធនេះ។ ក្រៅពីយន្តហោះទាំងពីរប្រភេទ យន្តហោះចម្បាំង F-35B ដែលបានហោះមកពីជប៉ុន យន្តហោះទម្លាក់គ្រាប់បែក B-1B Lancer យន្តហោះ EA-18G Growler យន្តហោះចម្បាំង F-15C ក៏ដូចជាF-16 ក៏បង្ហាញមុខក្នុងសមយុទ្ធនេះដែរ។
យោងតាមទីភ្នាក់ងារព័ត៌មាន Yonhap យោធាកូរ៉េខាងត្បូងក៏បានបញ្ចេញយន្តហោះស៊េរីទំនើបៗជាច្រើនដូចជាយន្តហោះចម្បាំងធុន F-15K, KF-16, FA-50 និងយន្តហោះ F-5 ព្រមទាំងគ្នានឹងយន្តហោះប្រភេទផ្សេងមួយចំនួនទៀត។ ក្រសួងការពារជាតិកូរ៉េខាងត្បូងនិយាយថា សមយុទ្ធរួមគ្នានេះមានគោលដៅពង្រឹងសមត្ថភាពដែនអាកាសរបស់ប្រទេសទាំងពីរ ហើយកងទ័ពសម្ព័ន្ធមិត្តទាំងពីរក៏វាយប្រហារត្រាប់លើគោលដៅកូរ៉េខាងជើងផង។
សមយុទ្ធដែនអាកាសរួមគ្នាលើកនេះ ទាក់ទាញការចាប់អារម្មណ៍ជាច្រើន ទោះជាបានប្រកាសតាំងពីយូរមកហើយក្ដី។ កូរ៉េខាងជើងជាអ្នកចេញមុខបង្ហាញប្រតិកម្មខ្លាំងជាងគេ ដោយគំរាមថា សមយុទ្ធនេះអាចឆ្នួនបញ្ឆេះសង្គ្រាមនៅឧបទ្វីបកូរ៉េទៅទៀត។ ប្រព័ន្ធផ្សព្វផ្សាយបក្សពលករកូរ៉េខាងជើង នៅថ្ងៃទី៣ ខែធ្នូ បានហៅសមយុទ្ធនេះជាការបង្ករឿងដោយចំហ ដែលអាចនាំទៅដល់ការកើតឡើងសង្គ្រាមនុយក្លេអ៊ែរបានគ្រប់ពេល។
សមយុទ្ធដែនអាកាសរបស់អាមេរិក និងកូរ៉េខាងត្បូង ក៏ធ្វើឡើងក្រោយកូរ៉េខាងជើងបាញ់មីស៊ីល Hwasong-15 កាលពីសប្ដាហ៍មុន។ ជាមីស៊ីលប្រភេទថ្មី ខ្លាំងជាងមុន រត់បានឆ្ងាយជាងមុន និងអាចបំពាក់ក្បាលគ្រាប់ធំជាងមុន។ មេដឹកនាំកូរ៉េខាងជើង គីម ជុងអ៊ុន ក៏បានប្រកាសថា កូរ៉េខាងជើងសម្រេចបានគោលដៅរបស់ខ្លួនក្នុងការក្លាយខ្លួនជារដ្ឋនុយក្លេអ៊ែរ និងមានសមត្ថភាពបាញ់មីស៊ីលដល់គ្រាប់ផ្នែករបស់អាមេរិក៕
Tag:
អាមេរិក
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com