អន្តរជាតិ
អគ្គលេខាធិការរង UN ទស្សនកិច្ចនៅកូរ៉េខាងជើង ចំពេលស្ថានការណ៍កំពុងតានតឹង លោក Jeffrey Feltman អគ្គលេខាធិការរងអង្គការសហប្រជាជាតិទទួលកិច្ចការច្បាប់ (រូបភាពពីគេហទំព័រអង្គការសហប្រជាជាតិ)
× អង្គការសហប្រជាជាតិបានបញ្ជូនបេសកកម្មមួយក្រុមទៅកាន់កូរ៉េខាងជើង ក្នុងទិសដៅបន្ធូរបន្ថយស្ថានការណ៍នៅឧបទ្វីបកូរ៉េដែលកំពុងពុះកញ្ជ្រោលដោយសារកម្មវិធីនុយក្លេអ៊ែររបស់កូរ៉េខាងជើង។ បេសកម្មដ៏កម្រដឹកនាំដោយអគ្គលេខាធិការអង្គការសហប្រជាជាតិ Jeffrey Feltman ក៏ធ្វើឡើងចំពេលដែលអាមេរិកកំពុងធ្វើសមយុទ្ធដែនអាកាសទ្រង់ទ្រាយធំជាមួយកូរ៉េខាងត្បូង ដែលកូរ៉េខាងជើងចោទថា អាចធ្វើឲ្យសង្គ្រាមផ្ទុះឡើងគ្រប់ពេល។
អគ្គលេខាធិការរងអង្គការសហប្រជាជាតិទទួលបន្ទុកកិច្ចការច្បាប់ Jeffrey Feltman បានទៅដល់ក្រុងប៉េកាំងនៅថ្ងៃទី៤ ខែធ្នូ មុននឹងបន្តដំណើរទៅកាន់ក្រុងព្យុងយ៉ាង។ លោក Feltman ចាប់់ផ្ដើមទស្សនកិច្ចនៅកូរ៉េខាងជើង ពីថ្ងៃទី៥ ដល់ថ្ងៃទី៨ ខែធ្នូ ដែលជាទស្សនកិច្ចដ៏កម្រមួយសម្រាប់មេដឹកនាំពិភពលោកទៅកាន់រដ្ឋកុម្មុយនីស្តឯកោមួយនេះ។ នេះជាទស្សនកិច្ចទៅកាន់កូរ៉េខាងជើងលើកដំបូងរបស់លោក Feltman តាំងពីកាន់តំណែងក្នុងឆ្នាំ២០១២ មក
ទស្សនកិច្ចរបស់មន្ត្រីជាន់ខ្ពស់អង្គការសសហប្រជាជាតិ ធ្វើឡើងស្របពេលដែលស្ថានការណ៍នៅឧបទ្វីបកូរ៉េឡើងកម្ដៅខ្លាំង។ កូរ៉េខាងជើងទើបតែបាញ់មីស៊ីលថ្មីមួយគ្រាប់កាលពីសប្ដាហ៍មុន ឯអាមេរិក និងកូរ៉េខាងត្បូងកំពុងធ្វើសមយុទ្ធផ្លូវអាកាសដ៏ធំមិនធ្លាប់មាន ដែលចូលរួមដោយយន្តហោះ២៣០គ្រឿងឯណោះ។ ក្រុងព្យុងយ៉ាងបានព្រមានទុកថា សមយុទ្ធរួមគ្នានេះជាការបង្ករឿង ដែលអាចឈានដល់សង្គ្រាមនុយក្លេអ៊ែរមិនខាន។
អ្នកនាំពាក្យអង្គការសហប្រជាជាតិ Stephane Dujarric និយាយថា អំឡុងទស្សនកិច្ចនៅព្យុងយ៉ាង លោក Feltman នឹងពិភាក្សាជាមួយមន្ត្រីកូរ៉េខាងជើងពីផលប្រយោជន៍ និងការព្រួយបារម្ភរបស់ភាគីទាំងសងខាង សំដៅដោះស្រាយបញ្ហាប្រឈមដោយសន្តិវិធី។ ប៉ុន្តែគេមិនទាន់ដឹងច្បាស់ថា អគ្គលេខាធិការរងអង្គការសហប្រជាជាតិរូបនេះ ជួបជាមួយមេដឹកនាំកំពូលកូរ៉េខាងជើង គីម ជុងអ៊ុន ឬអត់ឡើយ។
ក្រៅពីជួបជាមួយមន្ត្រីកូរ៉េខាងជើង មន្ត្រីជាន់ខ្ពស់អង្គការសហប្រជាជាតិរូបនេះ ក៏មានគម្រោងជួបជាមួយទូតបរទេសនៅកូរ៉េខាងជើង និងបុគ្គលិកអង្គការសហប្រជាជាតិដែលកំពុងបំពេញបេសកកម្មនៅក្នុងរដ្ឋក្រីក្រមួយនេះ។ ស្ថាប័នចំណុះអង្គការសហប្រជាជាតិចំនួន៦ កំពុងធ្វើប្រតិបត្តិការនៅកូរ៉េខាងជើង ដោយមានបុគ្គលិកប្រមាណ៥០នាក់ ដែលផ្ដោតលើការងារមនុស្សធម៌ សុខភាព ការអប់រំ និងស្បៀងអាហារជាដើម។
កូរ៉េខាងជើង ដែលជាមិនសូវមានធនធាននោះ បានចាយប្រាក់យ៉ាងច្រើនទៅលើកម្មវិធីនុយក្លេអ៊ែររបស់ខ្លួន និងមិនសូវបានគិតពីការរស់នៅរបស់ប្រជាជនខ្លួនឡើយ។ មហិច្ឆតាដើម្បីក្លាយជាមហាអំណាចនុយក្លេអ៊ែរ ធ្វើឲ្យប្រទេសរងការងហ៊ុមព័ទ្ធសេដ្ឋកិច្ចពីសំណាក់សហគមន៍អន្តរជាតិតាមរយៈការដាក់ទណ្ឌកម្មសេដ្ឋកិច្ចឥតឈប់ឈរ៕
Tag:
UN
កូរ៉េខាងជើង
នុយក្លេអ៊ែរ
© រក្សាសិទ្ធិដោយ thmeythmey.com