អន្តរជាតិ
រុស្ស៊ីបញ្ចូលវិទ្យុ RFE និង VOA ក្នុងបញ្ជីភ្នាក់ងារបរទេស ដើម្បីសងសឹកអាមេរិក រូបភាព៖ Sputnik
× រដ្ឋបាលក្រុងមូស្គូ បានបញ្ចូលប្រព័ន្ធផ្សព្វផ្សាយអាមេរិកចំនួនពីរ គឺវិទ្យុអឺរ៉ុបសេរីនិងវិទ្យុសេរីភាព (RFE/RL) និងវិទ្យុសំឡេងអាមេរិក (VOA) ទៅក្នុងបញ្ជីភ្នាក់ងារបរទេស ដើម្បីជាការសងសឹកនឹងការដាក់សម្ពាធរបស់អាមេរិកលើសារព័ត៌មានរុស្ស៊ី។ ចាប់ពីពេលនេះ ប្រព័ន្ធផ្សព្វផ្សាយទាំងពីរត្រូវរាយការណ៍គ្រប់យ៉ាងទៅកាន់អាជ្ញាធររុស្ស៊ី ទាំងសកម្មភាពផ្សាយព័ត៌មាន ក៏ដូចជាប្រភពហិរញ្ញវត្ថុរបស់ខ្លួនផងដែរ។
ក្រសួងយុត្តិធម៌រុស្ស៊ី ដែលទើបទទួលអំណាចពីប្រធានាធិបតី វ្ល៉ាឌីមៀ ពូទីន ក្នុងចុះឈ្មោះប្រព័ន្ធផ្សព្វផ្សាយបរទេសជា «ភា្នក់បរទេស» បានបញ្ចូលប្រព័ន្ធផ្សព្វផ្សាយចំនួន៩ ទៅក្នុងបញ្ជីនេះ ដោយក្នុងនោះមានវិទ្យុអាមេរិកចំនួនពីរដែរ គឺវិទ្យុអឺរ៉ុបសេរីនិងវិទ្យុសេរីភាព (RFE/RL) និងវិទ្យុសំឡេងអាមេរិក (VOA)។ វិទ្យុទាំងពីរទទួលបានការឧបត្ថម្ភថវិកាពីរដ្ឋាភិបាលអាមេរិក ដែលតាមច្បាប់រុស្ស៊ីត្រូវចាត់ទុកជាភ្នាក់ងារបរទេស។
ការបញ្ចូលប្រព័ន្ធផ្សព្វផ្សាយអាមេរិកទៅក្នុងបញ្ជីនេះ គឺជាការឆ្លើយនឹងការចោទប្រកាន់របស់រដ្ឋបាលក្រុងវ៉ាស៊ិនតោនដែលថា រុស្ស៊ីប្រើប្រាស់សារព័ត៌មានរបស់ខ្លួនដើម្បីជ្រៀតជ្រែកការបោះឆ្នោតឆ្នាំ២០១៦ ។ ដោយប្រើមូលហេតុនេះ អាមេរិកក៏បានដាក់សារព័ត៌មាន RT ក្នុងបញ្ជីភ្នាក់ងារបរទេសតែម្ដង ទោះជារុស្ស៊ីបដិសេធដាច់អហង្ការ និងចោទសកម្មភាពរបស់អាមេរិកជាការប្រហារលើសេរីភាពសារព័ត៌មាន។
ក្រោមច្បាប់ស្ដីពីភា្នក់ងារបរទេស ដែលទើបត្រូវបានលោក ពូទីន ចុះហត្ថលេខាឲ្យអនុវត្តកាលពីខែមុន អង្គការទាំងឡាយដែលជាប់ឈ្មោះក្នុងបញ្ជី ត្រូវប្រាប់អ្នកតាមដានថាខ្លួនជាភ្នាក់ងារបរទេស ត្រូវផ្ញើរបាយការណ៍ជាប្រចាំទៅឲ្យអាជ្ញាធររុស្ស៊ីរួមមាន ប្រភពហិរញ្ញវត្ថុនិងការចំណាយ បេសកកម្មការងារ និងឈ្មោះថ្នាក់ដឹកនាំជាដើម។ លើសពីនោះ អាជ្ញាធររុស្ស៊ីក៏មានសិទ្ធិឆែកឆេរដែរដើម្បីប្រាកដថា ប្រព័ន្ធផ្សព្វផ្សាយទាំងនោះគោរពច្បាប់ត្រឹមត្រូវ។
ច្បាប់ថ្មីនេះ ត្រូវបានអនុម័តយ៉ាងប្រញាប់ប្រញាល់បំផុត ដើម្បីឆ្លើយតបឲ្យទាន់សភាពការណ៍។ ពោល គឺសភាជាន់ទាបអនុម័តនៅថ្ងៃទី១៥ ខែវិច្ឆិកា ហើយឆ្លងសភាជាន់ខ្ពស់នៅ៧ថ្ងៃក្រោយ និងចុងក្រោយត្រូវលោក ពូទីន ចុះហត្ថលេខានៅថ្ងៃទី២៥ ខែដដែល។ ប្រព័ន្ធផ្សព្វផ្សាយរុស្ស៊ី ដែលត្រូវអាមេរិកចោទថា មានចំណែកជួយឲ្យលោក ត្រាំ ឈ្នះឆ្នោតប្រធានាធិបតីក្នុងឆ្នាំ២០១៦ រងការរឹតត្បិតខ្លាំងពីសំណាក់អាមេរិក ហើយក្រសួងយុត្តិធម៌អាមេរិកបានចាត់វិធានការផ្សេងៗដើម្បីដាក់សម្ពាធដែរ។
ច្បាស់ណាស់ថា ច្បាប់សងសឹកមួយ នឹងធ្វើឲ្យទំនាក់ទំនងរុស្ស៊ីនិងអាមេរិកដែលកំពុងអាប់អួរស្រាប់នោះ កាន់តែធ្លាក់ដុនដាបថែមទៀត។ សំណុំរឿងរុស្ស៊ីលូកលាន់កិច្ចការបោះឆ្នោតអាមេរិក នៅមិនទាន់បញ្ចប់នៅឡើយទេ ខណៈការស៊ើបអង្កេតកំពុងធ្វើឡើងក្ដៅគគុកនៅឯអាមេរិកឯណោះ។ ជាមួយនឹងការចោទប្រកាន់របស់ខ្លួន អាមេរិកក៏បានដាក់ទណ្ឌកម្មជាច្រើនលើរុស្ស៊ី ឯរុស្ស៊ីវិញក៏ប្រកាសសងសឹកវិញ ដោយមិននៅស្ងៀមឲ្យអាមេរិកធ្វើតាមចិត្តឡើយ៕
© រក្សាសិទ្ធិដោយ thmeythmey.com