ជាតិ
មេទ័ពប្រកាសប្តឹង, លោក សម រង្ស៊ី ប្រកាសស្វាគមន៍ លោក ប៉ុល សារឿន អគ្គមេបញ្ជាការកងយោធពលខេមរភូមិន្ទ នៅក្នុងសន្និសីទកាសែត នៅថ្ងៃទី៦ ខែធ្នូ ឆ្នាំ២0១៧
× ភ្នំពេញ៖ អគ្គមេបញ្ជការកងយោធពលខេមរភូមិន្ទ នាយឧត្តមសេនីយ ប៉ុល សារឿន បានប្រកាសប្តឹងលោក សម រង្ស៊ី នៅក្នុងសន្និសីទកាសែតនាល្ងាចថ្ងៃទី៦ខែធ្នូនេះ។ សន្និសីទកាសែតនេះត្រូវបានរៀបចំឡើង តែប៉ុន្មានម៉ោងក្រោយពីសម្តេចនាយករដ្ឋមន្ត្រីបានបង្ហើបថា កងយោធពលខេមរភូមិន្ទនឹងប្តឹងអតីតមេដឹកនាំគណបក្សប្រឆាំង។
យ៉ាងយូរនៅព្រឹកថ្ងៃទី៧ខែធ្នូ មេធាវីតំណាងស្ថាប័នកងទ័ពនឹងនាំយកពាក្យបណ្តឹងទៅតុលាការ ដើម្បីប្តឹងលោក សម រង្ស៊ី។ នេះជាសេចក្តីប្រកាសរបស់លោក ប៉ុល សារឿន អគ្គមេបញ្ជាការកងយោធពលខេមរភូមិន្ទ នៅក្នុងសន្និសីទកាសែត។ អគ្គមេបញ្ជាការកងទ័ពបានសម្រេចចិត្តប្តឹងអតីតមេដឹកនាំគណបក្សសង្គ្រោះជាតិដែលកំពុងនិរទេសខ្លួននៅក្រៅប្រទេស បន្ទាប់ពីលោកសម រង្ស៊ី ដែលមានឈ្មោះជាទណ្ឌិតហើយនោះ បានធ្វើសេចក្តីថ្លែងការណ៍នៅក្នុងកិច្ចប្រជុំមួយក្នុងប្រទេសបារាំងដោយអំពាវនាវមិនឲ្យកងទ័ពស្តាប់បញ្ជារដ្ឋាភិបាល។
នៅក្នុងសន្និសីទកាសែត នាយឧត្តមសេនីយ ប៉ុល សារឿន បានបញ្ជាក់ប្រាប់អ្នកកាសែតថា៖«នេះជារឿងធំណាស់។ វាធ្វើឲ្យប៉ះពាល់ដល់វិន័យកងទ័ព។ យើងត្រូវតស៊ូប្រឆាំងវិញ»។ ទោះយ៉ាងណាក៏ដោយ សម្រាប់អគ្គមេបញ្ជាការរូបនេះ ការអំពាវនាវរបស់លោកសម រង្ស៊ី នឹងមិនធ្វើឲ្យប៉ះពាល់សតិអារម្មណ៍កងទ័ពឡើយ ដ្បិតពួកគេសុទ្ធតែបានឆ្លងកាត់ការហ្វឹកហាត់ និងសិក្សាបានខ្ពង់ខ្ពស់។
នៅពេលដែលមេដឹកនាំកងយោធពលខេមរភូមិន្ទកំពុងធ្វើសន្និសីទកាសែតប្រកាសប្តឹងលោក សម រង្ស៊ី អតីតមេដឹកនាំគណបក្សប្រឆាំងរូបនេះបានសរសេរនៅលើគណនី Twitter របស់លោកថា លោកស្វាគមន៍ចំពោះការប្តឹងលោកពីបទល្មើសក្បត់ជាតិ។
ការប្រកាសប្តឹងរបស់ស្ថាប័នមេទ័ពត្រូវបានធ្វើឡើងបន្ទាប់ពីមានការប្រកាសថ្កោលទោសជាបន្តបន្ទាប់តាំងពីប៉ុន្មានថ្ងៃមុនពីសំណាក់ស្ថាប័នពាក់ព័ន្ធយោធា។ នៅព្រឹកថ្ងៃទី៦ខែធ្នូនេះ ពីវេទិកានៃការជួបជុំកម្មករ កម្មការិនី សម្តេចនាយករដ្ឋមន្ត្រីក៏បានបង្ហើបដែរអំពីលទ្ធភាពនៃការដាក់ពាក្យបណ្តឹងពីសំណាក់កងទ័ពប្រឆាំងលោក សម រង្ស៊ី។
ប្រមុខរដ្ឋាភិបាលបាននិយាយខ្លាំងៗបែបនេះថា៖«ថ្ងៃនេះ ខ្ញុំដឹងថា អគ្គមេបញ្ជាការកងយុទ្ធពលខេមរភូមិន្ទ រួមទាំងនាយទាហានដទៃទៀត នឹងដាក់បណ្តឹងទៅកាន់តុលាការ ព្រោះនេះ ជាបទល្មើសក្បត់ជាតិ ជាបទល្មើសញុះញង់ ឲ្យកងទ័ពមិនគោរពបទបញ្ជា»។
បច្ចុប្បន្ន លោក សម រង្ស៊ី បានក្លាយជាអ្នកទោសស្រាប់ទៅហើយ ដោយត្រូវបានតុលាការកម្ពុជា កាត់ទោសពីបទល្មើសផ្សេងៗ កាលពីកន្លងមក ដោយមានថ្នាក់ដឹកនាំកំពូលៗរបស់គណបក្សប្រជាជនកម្ពុជា ជាដើមបណ្តឹង។ បណ្តឹងទាំងនោះហើយ ដែលបង្ខំឲ្យលោក សម រង្ស៊ី ត្រូវគេចខ្លួន ទៅបរទេសរហូតមកដល់ពេលនេះ៕
Tag:
កងទ័ព
បណ្តឹង
សម រង្ស៊ី
តុលាការ
ឈុំ សុជាតិ
ហ៊ុន សែន
© រក្សាសិទ្ធិដោយ thmeythmey.com