អន្តរជាតិ
ប្រធានាធិបតីកូរ៉េខាងត្បូងទៅជួបមេដឹកនាំចិន និយាយរឿងកូរ៉េខាងជើង លោក មូន ចេអ៊ីន ចាប់ដៃលោក ស៊ី ជិនភីង ក្នុងជំនួបនៅវៀតណាម (រូបភាព៖ Xinhua)
× ប្រធានាធិបតីកូរ៉េខាងត្បូង មូន ចេអ៊ីន នឹងទៅទស្សនកិច្ចប្រទេសចិននៅសប្ដាហ៍ក្រោយ ដើម្បីជួបជាមួយសមភាគីចិន ស៊ី ជិនភីង ។ សំណុំរឿងនុយក្លេអ៊ែរកូរ៉េខាងជើង គឺជាប្រធានសំខាន់នៃទស្សនកិច្ចលើកដំបូងរបស់មេដឹកនាំកូរ៉េខាងត្បូងនៅចិន ខណៈកូរ៉េខាងជើងបង្កើនសកម្មភាពផ្គើនរបស់ខ្លួនកាន់តែខ្លាំងឡើង ជាពិសេសទើបបាញ់មីស៊ីលមួយគ្រាប់ទៀតនៅថ្មីៗនេះ។ នេះជាជំនួបទល់មុខលើកទីបី បន្ទាប់ពីការជួបលើកទីមួយនៅអាល្លឺម៉ង់ និងលើកទីពីរនៅវៀតណាម។
មេដឹកនាំកូរ៉េខាងត្បូង មូន ចេអ៊ីន នឹងចាកចេញទៅកាន់រដ្ឋធានីប៉េកាំង នៅថ្ងៃទី១៣ ខែធ្នូ ដើម្បីធ្វើទស្សនកិច្ចផ្លូវរដ្ឋរយៈពេល៤ថ្ងៃ ដែលគ្រោងបញ្ចប់នៅថ្ងៃទី១៦ ខែធ្នូ តាមការអញ្ជើញរបស់ប្រធានាធិបតីចិន ស៊ី ជិនភីង ។ នេះជាដំណើរទស្សនកិច្ចលើកទីមួយរបស់លោក មូន ទៅកាន់ចិន និងជាទស្សនកិច្ចនៅបរទេសលើកទីពីរ ចាប់តាំងពីឈ្នះឆ្នោតក្លាយជាប្រធានាធិបតីកូរ៉េខាងត្បូងកាលពីខែឧសភាកន្លងទៅ។
ជំនួបពិភាក្សាទ្វេភាគីទល់មុខគ្នាលើដំបូង ទំនងជាផ្ដោតសំខាន់លើបញ្ហានុយក្លេអ៊ែរ និងមីស៊ីលរបស់កូរ៉េខាងជើង ក្រៅតែពីការជជែកលើទំនាក់ទំនងទ្វេភាគីដែលកំពុងល្អប្រសើរ។ បើតាមទីភ្នាក់ងារព័ត៌មាន Yonhap អ្នកនាំពាក្យវិមានប្រធានាធិបតីកូរ៉េខាងត្បូង Park Soo-hyun និយាយថា លោក មូន នឹងជួបជាមួយបណ្ដាមេដឹកនាំជាន់ខ្ពស់ចិន ស្ដីពីទំនាក់ទំនងរយៈពេល២៥ឆ្នាំមកនេះ និងសម្រាប់ថ្ងៃអនាគតខាងមុខ។
បន្ថែមពីលើនោះ មេដឹកនាំកូរ៉េខាងត្បូង និងចិនក៏ពិភាក្សា ស្វែងរកមធ្យោបាយសន្តិវិធីដើម្បីដោះស្រាយបញ្ហានុយក្លេអ៊ែរកូរ៉េខាងជើង និងបង្កើតសន្តិភាពនៅឧបទ្វីបកូរ៉េផងដែរ។ ទស្សនកិច្ចរបស់លោក មូន នៅចិនខាងមុខ ធ្វើឡើងពីរសប្ដាហ៍បន្ទាប់ពីកូរ៉េខាងជើង ដែលនៅស្ងៀមជាច្រើនថ្ងៃមកហើយ បានសាកល្បងមីស៊ីលបាលីស្ទិកចម្ងាយឆ្ងាយ Hwasong-15 ។
ទស្សនកិច្ចរបស់ប្រធានាធិបតីកូរ៉េខាងត្បូងពេលនេះ ជាសញ្ញាបង្ហាញពីការឈានទៅរកភាពប្រក្រតីឡើងវិញនៃទំនាក់ទំនងរវាងអ្នកជិតខាងទាំងពីរ ដែលល្អក់កករដោយការពង្រាយប្រព័ន្ធការពារអាកាស THAAD របស់អាមេរិកនៅកូរ៉េខាងត្បូង។ ចិនជំទាស់គម្រោងនេះដាច់ខាត និងបានឲ្យកូរ៉េខាងត្បូងបញ្ឈប់ការពង្រាយជាបន្ទាន់។ ទោះជាមានការជំទាស់ពីចិន THAAD ត្រូវបានដំឡើងរួចស្រេច ដែលធ្វើឲ្យចិនខឹងសម្បារខ្លាំង និងបានចាត់វិធានការសងសឹកវិញដែរ។
នៅដំណាច់ខែតុលា រដ្ឋមន្ត្រីការទូតកូរ៉េខាងត្បូង កាង ឃ្យុងវ៉ា ប្រកាសថា កូរ៉េខាងត្បូងឈប់ទទួលប្រព័ន្ធការពាររបស់អាមេរិកទៀត ហើយក្រុងសេអ៊ូលមិនចង់ក្លាយជាផ្នែកមួយនៃយុទ្ធសាស្ត្រការពារមីស៊ីលរបស់ក្រុងវ៉ាស៊ីនតោនឡើយ។ ការប្រកាសបែបនេះ ធ្វើឲ្យចិនសប្បាយចិត្តខ្លាំង រហូតបង្កជាបរិយាកាសល្អសម្រាប់ទស្សនកិច្ចលោក មូន ចេអ៊ីន តែម្ដង៕
Tag:
កូរ៉េខាងត្បូង
ចិន
កូរ៉េខាងជើង
© រក្សាសិទ្ធិដោយ thmeythmey.com