កីឡាអន្តរជាតិ
អន្តរជាតិ
Scolari ទំនងជាឡើងដឹកនាំអូស្ត្រាលី ក្នុងព្រឹត្តិការណ៍ World Cup នៅរុស្ស៊ី
× លោក Luiz Felipe Scolari ជាអ្នកចាត់ការនាំមុខគេក្នុងបញ្ជីឈ្មោះរបស់សហព័ន្ធកីឡាបាល់ទាត់អូស្ត្រាលី (FFA) ដើម្បីឡើងដឹកនាំក្រុមកីឡាបាល់ទាត់ជម្រើសជាតិអូស្ត្រាលី ក្នុងព្រឹត្តិការណ៍ FIFA World Cup ឆ្នាំ២០១៨ នៅរុស្ស៊ី។
អតីតអ្នកចាត់ការទូទៅក្រុមជម្រើសជាតិប្រេស៊ីល និងព័រទុយហ្គាល់រូបនេះ បានប្រាប់ទីភ្នាក់ងារសារព័ត៌មាន Reuters ថា សហព័ន្ធកីឡាបាល់ទាត់អូស្ត្រាលីពិតជាបានទាក់ទងលោកឲ្យដឹកនាំក្រុមប្រជែងពានលំដាប់ពិភពលោកនៅរុស្ស៊ីឆ្មាំក្រោយ។
ភ្នាក់ងាររបស់ Scolari ក៏បានបង្ហើបដែរថា ក្រុមរហស្សនាម Socceroos ចង់បានអតីតអ្នកចាត់ការក្រុម Chelsea វ័យ ៦៩ឆ្នាំនេះទៅជំនួសតំណែងលោក Ange Postecoglou ដែលលាលែងពីតំណែង កាលពីខែវិច្ឆិកាកន្លងទៅ។
ការចង់បានពីសំណាក់ FFA នេះ ស្របពេលលោក Scolari នៅទំនេរពីការងារក្រោយបញ្ចប់កិច្ចសន្យរយៈពេល២ឆ្នាំកន្លះក្នុងនាមជាអ្នកចាត់ការក្រុម Guangzhou Evergrande ក្នុងលីកកំពូលចិនផងដែរ។
«ខ្ញុំជាបេក្ខភាពម្នាក់ដែលបានពិភាក្សាជាមួយភាគីអូស្ត្រាលី ហើយពួកគេសួរខ្ញុំថា ខ្ញុំចាប់អារម្មណ៍ដឹកនាំក្រុមនេះទៅ World Cup ឬទេ»។ Scolari និយាយដូច្នេះ។
ជុំវិញសំនួរខាងលើ អ្នកចាត់ការដែលធ្លាប់នាំប្រេស៊ីលឈ្នះជើងឯកឆ្នាំ២០០២ បានឆ្លើយថា លោករីករាយនឹងពិភាក្សាអំពីតួនាទីនេះ ប៉ុន្តែលោកចង់ដឹកនាំក្នុងរយៈពេលវែង មិនមែនត្រឹមតែក្នុងព្រឹត្តិការណ៍ World Cup ឆ្មាំ២០១៨ នេះនោះទេ។
អូស្ត្រាលី បានកៅអីទៅរុស្ស៊ីឆ្នាំក្រោយបន្ទាប់ពីផ្តួលក្រុមហុងដូរ៉ាសក្នុងការប្រកួតវគ្គ Play-off ហើយបានចាប់ឆ្នោតស្ថិតក្នុងពូល C ត្រូវប្រជែងជាមួយ បារាំង ប៉េរូ និងដាណឺម៉ាក៕
Tag:
បាល់ទាត់
FIFA World Cup
រុស្ស៊ី
© រក្សាសិទ្ធិដោយ thmeythmey.com